قىتايدا كولدە ءجۇزىپ جۇرگەن ەكى مەترلىك جۇمباق جاراتىلىس تۋريستەردى شوشىتتى

  استانا. قازاقپارات - قىتايدىڭ گۋاڭجوۋ قالاسىنداعى ساياباقتا سۋ استىنان شىعا كەلگەن ەكى مەترلىك جاراتىلىس ساياباق قىزمەتكەرلەرى مەن تۋريستەردى قايران قالدىردى. جۇمباق جاراتىلىستىڭ ارقاسى تاسباقانىكىنە ۇقسايدى.

بۇل تۋرالى Daily Mail باسىلىمى حابارلايدى.

بىرنەشە كۇن بۇرىن تۋريستەر بايۋن كولىنەن ءبىرتۇرلى جاراتىلىستى كورىپ قالدى.

«ونىڭ ارقاسى قارا ءتۇستى جانە تاسباقانىكىنە ۇقسايدى. ارتىنشا ونىڭ باسى كورىندى. ول جىلاننىڭ باسىنا ۇقسايدى» ، - دەيدى ساياباق قىزمەتكەرى.

ونىڭ ايتۋىنشا، بالىقتىڭ ۇزىندىعى كەمىندە 2 مەتردى قۇرايدى.

ساياباق اكىمشىلىگى كول اۋماعىن تۋريستەر ءۇشىن جاۋىپ، جاعالاۋعا قاۋىپسىزدىك تۋرالى ەسكەرتۋ ورناتىپ، جۇمباق جاراتىلىستى ىزدەۋگە كىرىستى. قاۋىپسىزدىك قىزمەتىنىڭ باسشىسىنىڭ سوزىنشە، سۋداعى جاراتىلىس تۋرالى بۇعان دەيىن دە بىلگەن. الايدا ونى انىقتاۋ مۇمكىن بولماپتى.

وسىلايشا ەكى كۇن ىزدەستىرۋ جۇمىستارى جۇرگىزىلىپ، ميسسيسيپيلىك ساۋىتتىلار تۇقىمداس ەكى بالىق ۇستالدى. بالىقتاردىڭ ۇزىندىعى 1,2 جانە 0,9 مەتر بولادى. قىزمەتكەرلەر مۇنداي بالىقتار ساياباق كولىنە جۋتسزيان وزەنى ارقىلى ءتۇسۋى مۇمكىن دەپ توپشىلاپ وتىر.

ميسسيسيپيلىك ساۋىتتى - تۇشى سۋدا مەكەندەيتىن ەڭ ءىرى بالىقتاردىڭ ءبىرى. ولاردىڭ ۇزىندىعى 3 مەترگە دەيىن جەتەدى. ال سالماعى 130 كەلىدەن اسادى. ولار سولتۇستىك جانە ورتالىق امەريكادا مەكەندەيدى. الايدا بۇل بالىقتار كاسپي تەڭىزى، ءۇندىستان، گونكونگ جانە سينگاپۋردە بايقالعان.