اقتوبەدە جاستارعا ارنالعان تەلەحيكايا ءتۇسىرىلىپ جاتىر
بارلىعى 10 بولىمنەن تۇراتىن سەريالدىڭ العاشقى ماۋسىمى وقۋ جىلىنىڭ سوڭىندا دايىن بولادى. يدەيا اۆتورى - ازامات ايناعۇلوۆ، رەجيسسەرى - مارات تەلەۋوۆ، ال سەناري اۆتورى - وركەن مۇقاقوۆ.
«جاستارعا ارنالعان تەلەحيكايا قازاق تىلىندە ءتۇسىرىلىپ جاتىر. 15-45 جاس ارالىعىنداعى كورەرمەن ءۇشىن قىزىقتى بولادى. كاستينگكە 180 ادام قاتىسىپ، 8 باستى ءرولدى سومدايتىن ءارتىس تاڭدالدى. ولاردىڭ اراسىندا ستۋدەنتتەر مەن ازىلكەشتەر بار. نەگىزگى وقيعا جاتاقحانادا ءوربيدى. اۋىل مەن قالا جاستارى، كورشىلەس رەسەيدەن كەلگەن ستۋدەنتتەردىڭ قارىم- قاتىناسى، دوستىق پەن ساتقىندىق، ماحاببات پەن ادالدىق، قازىرگى جاستاردىڭ ءومىرى سۋرەتتەلەدى. «اقتوبەنىڭ جاستارى وسىنداي» دەپ كورسەتەمىز» ، - دەدى «قازاقستان» ر ت ر ك» ا ق او فيليالىنىڭ ديرەكتورى، تەلەحيكايا پروديۋسسەرى ەرنۇر بۋراحان.
ال رەجيسسەر مارات تەلەۋوۆ تۋىندى وزگەلەرگە ۇقسامايتىن بولادى دەپ سەندىرىپ وتىر.
«ءبىز رەسپۋبليكاعا كورسەتۋگە بولاتىن تۋىندى دايىنداۋىمىز كەرەك. «اقتوبەدە جاسالعان» دەگەن تالاپقا تولىق ساي كەلەدى. ءتۇسىرىلىم الاڭىنداعى جاستار دا بارىن سالىپ جاتىر. جاستار جىلى بولعان سوڭ ينۆەستورلاردى قولداۋعا شاقىرامىن. بۇل قارجىلىق، سونىمەن قاتار قانداي دا ءبىر عيماراتتى جالعا بەرۋ سەكىلدى كومەك بولۋى مۇمكىن» ، - دەدى ول.
تەلەحيكايانىڭ بيۋدجەتى كوممەرتسيالىق قۇپيا كۇيىندە ساقتالىپ وتىر. ال تەلەحيكايا تۇسىرىلەتىن ەكى بولمەنى ارنا قىزمەتكەرلەرى ءوز كۇشىمەن جاسادى.
«تەلەحيكايا ارنانىڭ جەرتولەسىندە ءتۇسىرىلىپ جاتىر. بولمەگە قاجەتتى زاتتاردىڭ ءبارىن تەلەارنا قىزمەتكەرلەرى ءوز ۇيىنەن تاسىدى. ءبىرى پەردە، ەكىنشىسى تۇسقاعاز اكەلدى. ديزاينەر دە شاقىرىلمادى» ، - دەدى ە. بۋراحان.
ايتا كەتەيىك، ازىرگە تەلەحيكاياعا «Welcome to Aqtobe» دەپ اتاۋ بەرىلدى. ءبىراق كينو تۇسىرۋشىلەر اتاۋ بەرۋدە ۇتقىر ۇسىنىستاردى قابىلداۋعا ءازىر.
«الەۋمەتتىك جەلى ارقىلى حابارلاما بەرگەن كەزدە كاستينگكە جاستار كوپ جينالدى. سونىمەن قاتار، «x كەيىپكەر» بولادى. بۇل ساياساتتا، ونەردە، بيزنەستە جۇرگەن بەلگىلى ادامدار بولۋى ىقتيمال» ، - دەدى يدەيا اۆتورى ازامات ايناعۇلوۆ. الداعى ۋاقىتتا دەمەۋشىلەر تابىلسا، تەلەحيكايانىڭ بىرنەشە ماۋسىمى تۇسىرىلەدى. العاشقى ماۋسىمى 10 بولىمنەن تۇرادى.