پولشالىق قاريا قازاقستاننان ىزدەگەن وتباسىن رەسەيدەن تاپتى
قازاقپاراتتىڭ ساۋالىنا جاۋاپ قاتقان ماكينسك سەلولىق وكرۋگىنىڭ اكىمدىگىندەگىلەر ءبىراز جايدىڭ بەتىن اشتى. ميرينچۋك وتباسى شىنىمەن دە ءبىرجان سال اۋدانىنىڭ ماكينكا اۋىلىندا تۇرىپ، كەيىن 90- جىلدارى رەسەيگە قونىس اۋدارعان. ولار بىزگە ۋستينيانىڭ 58 جاستاعى نەمەرەسى تاتيانا ميرينچۋكپەن بايلانىسقا شىعۋعا كومەكتەستى. بۇگىنگى تاڭدا تاتيانا رەسەيدىڭ ومبى قالاسىنان 58 شاقىرىم قاشىقتىقتا ورنالاسقان ومبى وبلىسى ماريانوۆكا كەنتىندە تۇرادى.
«ميرينچۋك ۋستينيا ۆاسيليەۆنا - مەنىڭ اجەم. مەن ونىڭ ورتانشى ۇلى پەتردىڭ ۇلكەن قىزىمىن. پولياكتاردىڭ، ونىڭ ىشىندە يزا تاتەيدىڭ ءبىزدىڭ ۇيگە كەلگەنى ءالى ەسىمدە. ولار اجەمنىڭ ۇيىندە بولدى، اكەم مەن اجەم ولاردى قۇشاق جايا قارسى الدى. ب ا ق- تا جاريالانعان سۋرەتتەردەگى - يزا تاتەي» ، - دەدى قازاقپارات تىلشىسىنە تاتيانا.
وكىنىشكە قاراي، 1910 -جىلى تۋعان ۋستينيا و دۇنيەلىك بولعان.
«ناۋرىز ايىندا ونىڭ باقيلىق بولعانىنا 34 جىل تولادى. ال، اتامىز ماكسيم اندرەيەۆيچ 1988 -جىلى قايتىس بولدى. اكەمىز دە 1993 -جىلى دۇنيەدەن ءوتتى. وتكەن جىلى انامىز دا مارقۇم بولدى. اكەمىز قايتىس بولعان سوڭ انامىزدى جالعىز قالدىرمايىق دەپ رەسەيگە الىپ كەتتىك» ، - دەيدى نەمەرەسى.
تاتيانانىڭ سوزىنشە، ۋستينيانىڭ ۇلكەن ۇلى روستوۆ وبلىسىندا تۇردى. ونىڭ ەكى بالاسى قالدى. ورتانشى ۇلدان تۋعان قىزدىڭ وتباسى ومبى وبلىسىندا جانە گەرمانيادا تۇرادى. ال، كىشى ۇلىنىڭ تۋىستارى الماتى وبلىسىندا تۇرىپ جاتىر. ۇلكەن ۇلى اناتولي مەن كىشى ۇلى ۆيكتور پولشاعا قوناققا باردى.
دەگەنمەن، ماتەريال ازىرلەنىپ جاتقاندا تاتيانا ميرينچۋك Kyzylorda-news.kz باس رەداكتورىنىڭ ورىنباسارى جانىبەك يسايەۆقا حابارلاسىپ ۇلگەرىپتى.
«ۋلامەن فەيسبۋك ارقىلى بايلانىستامىن. الگىندە عانا وعان تاتيانانىڭ كوورديناتتارىن جىبەردىم. ءبىز بۇل وقيعانى ودان ءارى قاداعالاپ، جالعاسى نە بولعانىن ايتامىز» ، - دەدى قازاقپارات تىلشىسىنە تەلەفون ارقىلى ج. يسايەۆ.
ءوز كەزەگىندە پان ۋلا بۇل وقيعاعا بەي- جاي قاراماي، كومەك قولىن سوزعاندارعا ريزاشىلىعىن ءبىلدىردى.
«ميرينچۋك وتباسىن ىزدەۋگە كومەكتەسكەندەرگە كوپ راحمەت. ارادا كوپ جىلدار وتسە دە، ءبىز ۋستينيا ميرينچۋكتىڭ جومارت جۇرەگى مەن كومەگىن ۇمىتقان جوقپىز جانە ولارعا العىسىمىز شەكسىز» ، - دەپ جازدى ول قازاقپارات تىلشىسىنە.
ەسكە سالا كەتەيىك، وتكەن عاسىردىڭ العاشقى جارتىسىندا قازاقستانعا جەر اۋدارىلعان ۋلا كوتاربانىڭ وتباسىنا ماكينكا اۋىلىنىڭ تۇرعىنى ۋستينيا ميرينچۋك كومەكتەسكەن بولاتىن. ول جەر اۋىپ كەلگەن پولياكتاردى قامقورلىعىنا الىپ، سوڭعى نانىمەن بولىسكەن ەدى. سوعىستان كەيىن يزابەللا پولشاعا قايتا ورالدى. قوس وتباسى ءبىراز ۋاقىت حابارلاسىپ، قال- جاعداي سۇراسىپ تۇردى. الايدا، كەيىن بايلانىس ءۇزىلدى. ينتەرنەت ارقىلى ىزدەۋ ناتيجە بەرمەگەن سوڭ قاريا ۋستينيا ميرينچۋكتىڭ وتباسىن تابۋ ءۇشىن Kyzylorda-news.kz رەداكسياسى ارقىلى قازاقستاندىقتاردان كومەك سۇراعان ەدى.
اۆتور: وكسانا ماتاسوۆا