قاراعاندىلىقتار «ازيا بالالارى» قىسقى ويىندارىنىڭ جۇلدەگەرى اتاندى

قاراعاندى. قازاقپارات - قاراعاندىلىقتار «ازيا بالالارى» حالىقارالىق قىسقى ويىنداردىڭ جۇلدەگەرى اتاندى.

ولار شورت-ترەكتە «التىن» جانە بياتلوندا «كۇمىس» جۇلدە ەنشىلەدى، دەپ حابارلايدى ءوڭىر باسشىسىنىڭ رەسمي سايتى.

«ازيا بالالارى» حالىقارالىق قىسقى ويىندار وڭتۇستىك ساحاليندە ءوتتى. سايىسقا قازاقستان، موڭعوليا، وزبەكستان، تۇركىمەنستان، نەپال، كورەي رەسپۋبليكاسى، تايلاند، گونكونگ، يوردانيا، تاجىكستان، فيليپپين، جاپونيا، اۋعانستان، قىرعىزستان، ءۇندىستان، ب ا ءا، كۋۆەيت، سيريا، ارمەنيا جانە رەسەي ەلدەرىنەن 16 جاسقا دەيىنگى سپورتشىلار قاتىستى.

جارىستار سپورتتىڭ 8 ءتۇرى بويىنشا ءوتتى: مانەرلەپ سىرعاناۋ، شورت-ترەك، تاۋ شاڭعى سپورتى، سنوۋبورد، بياتلون، شاڭعى جارىسى، ترامپليننەن شاڭعىمەن سەكىرۋ جانە حوككەي. بۇل سپورت تۇرلەرىنىڭ ءارقايسىسى بويىنشا قازاقستاندىق قۇراما وكىلدەرى قاتىستى.

قاراعاندى وبلىسى اتىنان كومانداعا ەكى سپورتشى ەندى: دامير قۇرمانوۆ (شورت-ترەك) جانە دانيل انوشكين (بياتلون).

دامير قۇرمانوۆ كوماندا قۇرامىندا 3000 مەتر قاشىقتىقتاعى ەستافەتادا التىن مەدال يەلەندى. ال دانييل انوشكين 2x6 شاقىرىم ەستافەتاسىندا «كۇمىس» جۇلدەگەر اتاندى.

ەكى سپورتشى دا ءا. مولداعۇلوۆا اتىنداعى سپورتتاعى دارىندى بالالار وبلىستىق مەكتەپ-ينتەرناتىنىڭ تاربيەلەنۋشىلەرى.

«ازيا بالالارى» حالىقارالىق قىسقى ويىنداردا قازاقستان قۇراماسى بارلىعى 20 مەدال ولجالاپ، التىنشى جالپى كوماندالىق ورىندى يەلەندى.