ازامات ءمالجانباي. تەك - پوەما
ازامات ءمالجانباي - 2007-جىلى ارقالىق قالاسىنىڭ «جىل ادامى» اتاعىنىڭ يەگەرى، 2008 -جىلعى قوستاناي وبىلىسى اكىمدىگىنىڭ «التىن كىتاپقا» ەسىمى جازىلعان، 2014 -جىلى «دارىندى بالالارعا- تالانتتى ۇستاز» قالالىق جانە رەسپۋبليكالىق پەداگوگيكالىق وليمپياداسىنىڭ 1-ورىن يەگەرى. 2017 -جىلى استانا قالاسىنىڭ اكىمى ءا. يسەكەشيەۆتىڭ العىس حاتىمەن، 2019 -جىل باسىندا قر مادەنيەت جانە سپورت ءمينسترىا. مۇحامەدي ۇلىنىڭ العىس حاتىمەن ماراپاتتالعان. استانا قالاسى «اتامەكەن» قازاقستان كارتاسى» ەتنو- مەموريالدىق كەشەنى «ەكسكۋرسيا» ءبولىمىنىڭ باسشىسى.
تەك
(پوەما)
1
ۇلى رۋحتىڭ نۇرىنا بولەنگەندە ەل،
قانىم تاسىپ، كەۋدەمدى ولەڭ كەرنەر.
بۇل دالا ۇلى دالا بولماي قايتسىن،
تورىندە تولىپ تۇرسا كەمەڭگەرلەر.
ۇلى دالا بۇل نەتكەن اسقاق ۇعىم،
سول جايىندا ءورىلسىن تاسپا جىرىم.
تۋعان ەلدىڭ تاريحى قازاق ءۇشىن،
بولۋ كەرەك باس مۇرا، باس تاعىلىم.
اتاجۇرتتىڭ كورگەندە گۇل ەتەگىن،
رۋحى مىقتى ۇلتىمدى جىر ەتەمىن.
ۇلى دالا قاسيەتىن سەزۋ ءۇشىن،
ءبىلۋ كەرەك نە نارسە ۇلى ەكەنىن.
ۇلى دەگەن بۇل ءسوزدىڭ تەرەڭ ءمانى،
ۇلىلىقتى قاستەرلەۋ ەل ارمانى.
وتكەن كۇنگە قاراساڭ ءبىر بۇرىلىپ،
ءبىزدىڭ ۇلى دالادا نە بولمادى؟ !
شابىت كەرنەپ بويىڭدى لاپىلداسا،
قيىن بولماس جىر جازۋ اقىنعا اسا.
ۇلى دالا بولا ما قويناۋىنا،
نەبىر ۇلى سىرلارىن جاسىرماسا.
تاني السا ءوز تەگىن ءدۇبارالار،
قازىنا كوپ قازاقتا مۇرا بولار.
وسى ۇلى دالادا تۋعان جوق پا؟
نەبىر ۇلى ابىز بەن عۇلامالار.
جەتكىزگەنمەن جاۋىنا توسىن حابار،
ساتقىن ادام تۇبىندە وتىن بولار.
وسى ۇلى دالادا وتكەن جوق پا؟
نەبىر ۇلى جورىق پەن وقيعالار.
كەم بولعان جوق بۇل ولكە دارىنعا اسا،
تۇسىنەر جان ءبىر ساتكە دامىلداسا.
ۇلى دالا بولار ما ەد ۇلى حاندار،
ەل بيلەپ ۇلى وردالار سالىنباسا؟ !
ءبي مەن بەك، كوسەم داۋدان قورعاماسا،
ۇلى اقىندار جورىق جىر تولعاماسا.
ۇلى دالا كەتەر مە ەدى جاۋ قولىندا،
ءباھادۇر بابالارىم قورعاماسا.
پەندەگە باقىت بىردەن ورناعان با؟
از ەمەس قۋانعان دا، سورلاعان دا.
سايىپقىران وعلاندار تۋار ما ەدى؟
نەبىر ۇلى انالار بولماعاندا.
كوركەيىپ پاراساتپەن يمان باعى،
يسلام سالىپ بەردى ىزگى ارنانى.
ۇلى اللانىڭ بىلەر مە ەدىك حيكمەتىن،
ۇلى دالا بولماسا ءدىندارلارى.
2
وتان دەسە ەلجىرەپ ەت جۇرەگىم،
كوك بايراقتى كورگەندە كوك تىرەدىم.
ۇلى دالا ەلىنىڭ ۇلى ءتورى،
ۇلى تورعاي دالاسى دەپ بىلەمىن.
بىلمەيمىن قانشالىقتى باتىل بولدىم،
تورعايدىڭ سۋىن ءىشىپ اقىن بولدىم.
جاسىمنان قانعا سىڭگەن ءبىر ادەتىم،
قازىنالى قارتتارعا جاقىن بولدىم.
قازاقتىڭ از ەمەس قوي دارىندىسى،
تۋمىسىنان سۇڭعىلا ارىندىسى.
سونىڭ ءبىرى كەنجەاحمەت سەيىت مارقۇم،
تورعايداعى تاريحتىڭ تامىرشىسى.
تۇلپار عىپ باپتاعانداي قازاناتتى،
قاسىنا ەرتىپ مەندەي ازاماتتى.
بۇلقىنعان جۇرەگىمدى سەزدى مە ەكەن؟
سىر تۇنعان تورعاي جەرىن ارالاتتى.
- سەن دە ەرتەڭ بۇل ولكەنىڭ تۇلەگى بول،
كوپ مۇندا اسىل ەرلەر ۇلى ەدى دەر.
شىراعىم باعالاساڭ تورعاي دەگەن،
ارۋاق قونىپ، نار شوككەن كيەلى جەر!
سەكەڭە بولدىم با ەكەن جاقسى اتقوسشى،
تۋعان ەل شەجىرەسىن باپتاپ توكتى.
ۇلى ولكەگە ارنالعان تاعزىمدى،
تۋعان جەرى قىزبەلدەن باستاپ كەتتى:
- سارىقوپانىڭ اناۋ ءبىر جىراسىنان،
بالالىقتى قۋالاپ قىر اسىرعام.
مەندەگى پاك كوڭىلدىڭ مولدىرلىگى،
دارىعان قىزبەل تاۋدىڭ تۇماسىنان.
باسىلدى- اۋ، كوزىمە وتتاي بۇگىن ۇيام،
ءجۇر، بەرى، قاندىرايىن تۇنىعىنان.
«ويان قازاق» دەپ وتكەن ەر ءمىرجاقىپ،
تۇلەگەن وسى قىزبەل تۇعىرىنان.
وسىلاي تۋعان جەرىن تانىستىرىپ،
ارمانمەن ۇيالاتتى الىسقا ءۇمىت.
ودان كەيىن اقكولگە الىپ بارىپ،
احاڭمەنەن جىبەردى تابىستىرىپ.
- جۇك كوتەرەر ۇل ەدىڭ كوڭىلى نار،
ارىستاردىڭ ءومىرىن مول ۇعىپ ال.
ءبىر شاراپات احاڭنان جۇعار بالكىم،
اقكولىنە - دەدى - ءبىر شومىلىپ ال.
3
بۇل ساپار ماعان شالقار شابىت بەردى،
ەل ءۇشىن توگەم ەندى انىق تەردى.
تالاي جەردى كورسەتىپ، ەڭ سوڭىندا،
ءبىر ەسكى زيراتتارعا الىپ كەلدى.
ەسكە الىپ كەشەگى وتكەن زامان زارىن،
شەرتتى قارت كوكەيدەگى كوپ ارمانىن.
- جان بالام، بىلەمىسىڭ عاسىر بۇرىن،
مىنا جاتقان قابىردە نە بولعانىن؟ !
دەدى دە باستاپ كەتتى وسيەتىن،
- اۋليەلەر كوپ قوي دەپ باس يەتىن.
كاتەن دەگەن داموللا جاتىر مۇندا،
قان ارقىلى كورسەتكەن قاسيەتىن.
ەركەشە بولادى دەپ ادام قانى،
تىلىنە تيەك ەتتى داموللانى.
«قانى ءبىر، قان تارتادى» دەگەن راس-
دەدى دە مىنا ءجايدى باياندادى:
- كوزدەگەنى بولعان سوڭ تۇنىق ارمان،
بالا كاتەن بۇحارادان ءبىلىم العان.
ودان قالسا قاجى بولىپ مەككە بارىپ،
عيبراتتى جول كورگەن ۇلىلاردان.
تورعايدا تالاي تەكتى مولدا بولعان،
مەشىت ساپ ىزگىلىككە وردا قۇرعان.
داموللادان وقىعان شاكىرت بىتكەن،
شەتىنەن ءدىن مەن دىلگە جورعا بولعان.
جان- جاعىنا ءسان بەرگەن، ساۋلەت بەرگەن،
ىرىزدىق ءۇزىلسىن بە، اۋلەتتى ەردەن؟ !
يمانىنىڭ بايلىعىن ساقتاعان سوڭ،
اللا وعان مالدان دا مول داۋلەت بەرگەن.
ۇلتىنىڭ ازاتتىعىن مۇرات كورگەن،
سول جولدا ساجدە قىلىپ جىلاپ كەلگەن.
كەزىندە الاش ورداعا كومەك ءۇشىن،
ەر- تۇرمانى سايلانعان ءجۇز ات بەرگەن.
مىرزالىقپەن ۇيالتىپ ساراڭداردى،
ساۋاپتى ىسپەن باستى ءار قادامداردى.
كورىپكەلدىك قاسيەتى بولعان سوڭ دا،
بىلمەيتىن جان قالمادى داموللانى.
بۇل باقىت ءبىراق كوپكە سوزىلماپتى،
تاقىمداپ كىم تارتپايدى ءومىر لاقتى.
سۇم زامان ءاپ- ساتتە استاڭ- كەستەڭ بولىپ،
زالىمدار قانشاما ەردىڭ جولىن جاپتى.
سەمىرگەن داۋرەن ءوتىپ قارا سۋعا،
مال- مۇلىك تۇسكەن تالاۋ، تالاسۋعا.
قايىرشىنىڭ قالتاسىن قاعىپ كەتكەن،
كامپەسكە داموللانى اياسىن با؟ !
بۇل سۇمدىقتى قانشاما حالىق كوردى،
وشپەس ۇرەي جۇرەكتە قالىپ قويدى.
وسىنداي زوبالاڭنىڭ اراسىندا،
داموللا ءبىر- اق تۇندە عايىپ بولدى.
سول كەتكەننەن مول كەتتى ورالمادى،
كەلەر دەگەن ءتاتتى ءۇمىت كوپ الدادى.
ارتتا قالعان جارى مەن ءتورت بالاسىن،
وتىز ەكى اشتىعى كەپ جالمادى.
قوساقتالىپ كارى- جاس، بالامەنەن،
تولىپ كەتتى ولىككە دالا دەگەن.
ول ازداي ءۇش ءىنىسى تاعى اتىلدى،
«حالىق جاۋى» دەيتۇعىن جالامەنەن.
ويداعى بولماعان سوڭ ەر قالاۋى،
قايتەدى شۇلعاۋ بولماي ەل جالاۋى.
قارا سۋى قاتىقتاي ۇيىپ تۇرعان،
ءبىر اۋلەتتىڭ وسىلاي ءسوندى الاۋى.
ارادا زامان زۋلاپ جىلدار ءوتتى،
ارمان- تىلەك سەل بولىپ قۇمعا كەتتى.
شىركىن- اي، بوستاندىقتىڭ ءبىر تاڭى ءۇشىن،
سان بوزداق عازيز باسىن قۇربان ەتتى.
4
اجال قۋىپ جۇرسە دە سور داۋىلدا،
ولمەيدى ەكەن پەندە اللا قولداۋىندا.
ارادا جيىرما سەگىز جىل وتكەندە،
كۇتپەگەن ءبىر قۋانىش بولدى اۋىلدا.
تىرلىكپەن ويلاعان سوڭ جانباعىستى،
بۇگىندە ەل ەرتە تۇرىپ قامدانىستى.
قىر باسىنان اق سالدە، اق كيىمدى،
جاندى كورىپ بار اۋىل تاڭعالىستى.
اڭ- تاڭ بولىپ اۋىلدىڭ ادامدارى،
بۇل توسىن كورىنىسكە الاڭدادى.
«ە، قۇداي جاقسىلىققا باستاي كور دەپ»
تالاسباي مولدا سولاي ادىمدادى.
اسىعىس جەتىپ باردى، شەكە تەرلەپ،
قۋاندى كورگەنىم شىن راس ەكەن دەپ.
قۇشاق جايا ۇمتىلدى ءۇن شىعارىپ:
- اعاكەم، اسىل تۋعان كاتەكەم! - دەپ.
كوز جاسىن قوس مولدانىڭ قۇداي كوردى،
وسىنداي قيىن تاعدىر سىناي بەردى.
- ۋا، تالاسباي، سەنبىسىڭ؟ - دەدى داعى،
كاتەكەم قۇشاعىنا قۇلاي بەردى.
قايتادان اۋىلعا اللا قۇت دارىتتى،
كوڭىل كونشىپ، جان جىلىپ، ءىش تابىستى.
امان- ساۋ «كاتەن كەپتى» دەگەن حابار،
تورعايدىڭ دالاسىندا قۇستاي ۇشتى.
ويداعى شەشىلگەندەي جۇمباقتارى،
اعىلدى ەل كاتەكەڭمەن سىرلاسقالى.
كۇندىز- ءتۇن ساپىرىلىسىپ كەلگەن حالىق،
ەسىگىن تالاسبايدىڭ قۇرعاتپادى.
ارالاپ جات ولكە مەن تالاي جەردى،
كاتەكەڭ ارەڭ كوردى ارايلى ەلدى.
سوندا دا قايران كوڭىل بايىز تاپپاي،
ەسىككە اشقان سايىن قاراي بەردى.
ۇمىتپەن بىرەۋلەردى كۇتىپ وتىر،
الاڭداپ ءتوزىمى ىشتەي ءبىتىپ وتىر.
سونى اڭعارعان كورەگەن تالاسباي قارت،
كۇيزەلىستىڭ كۇيىنە ءتۇسىپ وتىر.. .
- كاتەكە، از بولمادى دۇشپانىمىز،
ءسىز كەلىپ قۋاندى ارعىن، قىپشاعىڭىز.
ءسىز كەتكەن سوڭ، الاي- دۇلەي تۇنەك بولىپ،
كەلمەسكە ۇشىپ كەتتى قۇستارىڭىز!
سونى ايتىپ تالاسباي قارت ەڭكىلدەدى،
- ءبىر اللا سىزگە سابىر بەرسىن، - دەدى.
قايعىلى حاباردى ەستىپ كاتەن مولدا،
ءۇنسىز عانا بۇگىلىپ سەلكىلدەدى.
- كاتەكە، كوڭىل بىتكەن تولقىپ وتىر،
مەنىڭ دە جانىمدى دەرت شەرتىپ وتىر.
سابىر عىپ، ءبىر- ەكى اۋىز ءسوز ايتىڭىز،
بۇيتسەڭىز اعايىندار قورقىپ وتىر.. .. .
ەستىسە دە كاتەكەڭ،
بىردەن تىلگە كەلمەدى.
ءبىراز ءۇنسىز وتىرىپ،
تەبىرەنىپ سويلەدى.. .
- اينالايىن تالاسجان،
كىم جەتەدى باعاڭا.
ازازىلدەر سەنىڭ دە،
جارماسىپتى- اۋ جاعاڭا.
تايماي وتكەن تاعدىردان،
ريزامىن تاعاڭا.
وسى كۇنگە جەتكەنشە،
سىناقتان امان وتكەنشە،
نە بولمادى دەيسىڭدەر،
مىناۋ عارىپ اعاڭا؟ !
وتقا جانىپ كەتكەن بە؟
اق وردالى شاڭىراق.
الدىمنان شىعار دەپ ەدىم،
ءتورت بالام شۋلاپ جامىراپ..
ورىستە جاتسا دەۋشى ەدىم،
ءتورت تۇلىك مالىم ماڭىراپ..
كورىنبەيدى عوي ءۇش ءىنىم،
كورىسسەم دەپ ەم اڭىراپ..
اسىل جار كوزگە تۇسپەدى،
شىعار- اۋ دەپ ەم ءدامىن اپ..
جان تۇگىلى، مۇنداي كەزدەردە،
ەركەلەپ شىعار الدىنان،
ءيتىن دە ادام ساعىناد.. .
قايتەيىن، تاعدىر، قايتەيىن،
بار سانىنەن ايىرىلىپ،
ەسكى جۇرت قاپتى- اۋ قاڭىراپ.. .
اينالايىن اعايىن،
قايسى ءبىرىن ايتايىن،
ەسىل ەلدىڭ باسىنان،
زۇلمات كۇندەر ءوتتى عوي.
قايران قازاق ەلىم دەپ،
تۋىپ وسكەن جەرىم دەپ،
قۇربان بولىپ سان ەرلەر،
بارماق تىستەپ كەتتى عوي.
قاس جاۋلارىم انتالاپ،
بوساعامدى بالتالاپ،
قازانىمدى تەپتى عوي.
بي مەن بەكتەر ەت جەيتىن،
ءدامى اۋىزدان كەتپەيتىن،
بەرەكەلى استاۋلار،
يتاياق بوپ كەپتى عوي.
وتكەن كۇنگە سالاۋات،
قىرىق جىل قىرعىن بولسا دا،
اجالدى ولەر دەپتى عوي.
ءوزى جار بولىپ قۇدايىم،
ءۇمىتىن سىيلاپ ىلايىم،
جۇرەككە نۇرىن سەپتى عوي.
ارمانىم جوق ەندى ولسەم،
قۋ سۇيەگىم ساۋدىراپ،
تۋعان جەرگە جەتتى عوي.. .!
وسىلاي تاعدىر قاتتى سىناق قىلدى،
زارىنان داموللانىڭ قۇلاق تۇندى.
تورعايدىڭ دالاسى دا مۇڭعا باتىپ،
اسپانى ءۇش كۇن بويى جىلاپ تۇردى.
بىلگەن سوڭ سۇم ءومىردىڭ نارقىن جاقسى،
سابىرمەن ءىش كۇيىگىن سالقىنداتتى.
الىس- جاقىن ارالاپ اعايىندى،
كاتەكەڭ ءبىراز كۇندەي ماۋقىن باستى.
جاستىعى وتكەن ارالاپ بۇلا قىردى،
كاتەكەڭنىڭ ساعىنىش كۇيى اعىلدى.
اكە مەن اناسىنىڭ زيراتىنا،
باس ءيىپ ءۇش كۇن بويى دۇعا قىلدى.
باعالاپ مۇنداي نۇرلى ءسات تۋماسىن،
كاتەكەڭ ءبىلدى ورايدىڭ تاپتىرماسىن.
قاسىنا ءۇش- ءتورت جىگىت ەرتىپ الىپ،
تىرەدى تامقامىسقا اتتىڭ باسىن.
تامقامىس اتا قونىس جەرلەرى ەدى،
ەشقانداي مۇندا قازىر ەل جوق ەدى.
مۇندا كەلگەن سەبەبى، سوناۋ جىلدار،
وتە قۇندى قازىنا كومگەن ەدى.
قايران كوڭىل ءبىر سۋىپ، ءبىر ىسىعان،
ايىرىلدى قاراداي تىنىشىنان.
بۇل كۇندە تومپەشىك بوپ قالعان ءۇيدىڭ،
قازدىردى باتىس جاق شەت بۇرىشىنان.
بولعان سوڭ نيەت ءتۇزۋ، ماقسات ىزگى،
جىگىتتەر دە شيرىعىپ شاققا تۇردى.
قازعان جەر كىندىك بويى بولا بەرە،
كۇرەك ءجۇزى ءبىر قاتتى زاتقا ءتيدى.
الگى زات توڭكەرىلگەن قازان ەكەن،
ءارى قاراي ابايلاپ قازادى ەكەن.
قازاندى تىك كوتەرىپ العان ساتتە،
ادامدار اڭ- تاڭ بولىپ قالادى ەكەن.
قۇدايدىڭ قۇدىرەتىنە قارا تۇر،
سول كورىنىس ءالى وشپەي سانادا تۇر.
ساز بالشىققا باسىلعان انىق بولىپ،
الاقان مەن تاباننىڭ ءىزى جاتىر.
جانىندا سارعايعان ءبىر كون دوربامەن،
اق ماتا، ۇرشىعىمەن ءجىبى جاتىر.
كاتەكەڭ مۇنى كورىپ دۇعا قىلدى،
بارىنەن مۇنداي ساتتە مۇرا قۇندى.
بالشىقتاعى تابان مەن الاقاندى،
كەزەك ءسۇيىپ كوز جاسىن بۇلا قىلدى.
وسىلاي قازىناسىن تاۋىپ الدى،
ۇرشىقتا شەبەر قولدىڭ تابى بار- دى.
اق ماتانى سىعىمداپ يىسكەپ- يىسكەپ،
ورامالعا ءتۇيدى دە سالىپ الدى.
ءاپ- ساتتە مىنە وسىنداي الەم بولدى،
كورگەن كوز بارلىعىنا دالەل بولدى.
داۋىستارى دىرىلدەپ بۇل ءجايىتتى،
جەتكىزۋگە شاماسى ارەڭ كەلدى.
كاتەكەڭ باستاي بەردى اڭگىمەنى:
- كومگەنىم جيىرما سەگىز جاز كۇنى ەدى.
جاڭاعى ۇلبىرەگەن اپپاق ماتا،
جان انامنىڭ ارىنداي جاۋلىعى ەدى.
ءحاديستىڭ ايتاتىنداي ءبىر دەرەگى،
ءجانناتتى انا استىندا تۇر دەپ ەدى.
جاڭاعى بالشىقتاعى ەكى تاڭبا،
اياۋلى اتا- انامنىڭ ىزدەرى ەدى.
ومىردەن ولار مەن دەپ وتكەن ەدى،
تابان ەت، ماڭداي تەرىن توككەن ەدى.
مىنا تۇرعان ىپ- ىستىق الاقانمەن،
الپەشتەپ ماڭدايىمنان وپكەن ەدى.
بۇل ۇرشىق جاتىر دەيسىڭ بۇلاي ناعىپ؟
انام باردا تۇراتىن شىر اينالىپ.
شىر اينالعان ومىردە مەن دە مىنە،
كەلدىم عوي جيىرما سەگىز جىل اينالىپ.
دەدى دە كوز جاسىنا ەرىك بەردى،
جىگىتتەر ايتتى: بەكەم، بەرىك بول دەپ.
كون دوربانى اشتى دا بارلىعىنا،
التىن- كۇمىس بۇيىمدى ءبولىپ بەردى.
ەسكە الىپ وتكەن كۇنمەن، دارحان ەلدى،
شىتىناپ اينا كوڭىل پارشا بولدى.
اتتاناردا تاعى ءبىر دۇعا جاساپ،
تالاسبايدىڭ ۇيىنە قايتا كەلدى.
ىشتەگى ارپالىسىپ سەزىمدەرى،
كاتەكەڭ تۇنىمەنەن كوز ىلمەدى.
تاڭەرتەڭ تالاسبايعا - بالالارىمنىڭ،
باسىنا باستاپ اپار ءوزىڭ، - دەدى.
بۇل ويدى تالاسباي قارت تەز قۇپ الدى،
قاسىنا ەكى- ءۇش جىگىت ەرتىپ الدى.
ويتكەنى كاتەكەڭە ۇلدارىنىڭ،
قابىرىن كورسەتپەككە سەرتى بار- دى.
بارلىعى قورىم جاققا اياڭدادى،
ءدوڭ باسىنا قادالىپ جانارلارى.
جەتكەن سوڭ تالاسباي قارت ايات وقىپ،
جەرلەنگەن ءمايىت جايىن باياندادى:
- وتىز بىردە الاپات اشتىق بولدى،
قاساقانا قازاققا قاستىق بولدى.
قىناداي بوپ قىرىلدى قايران حالىق،
جالعاننان ارماندا ءۇزىپ اقتىق دەمدى.
ءبىز سونداي قاسىرەتتى كورگەن ەدىك،
جەرلەۋگە كۇنىنە سان كەلگەن ەدىك.
كور قازۋ دا قيىن بوپ بارا- بارا،
ءبىر لاحاتقا جەتى ادام كومگەن ەدىك.
امال جوق سولاي بولدى ۇكىمىمىز،
كاتەكە، ءسىز ول ءۇشىن كەشىرىڭىز.
ۇمىتتىم قاي قاتاردا جاتقاندىعىن،
ءسىزدىڭ دە وسى ارادا ەكى ۇلىڭىز.
وسىلاي بىلگەننەن سوڭ ناقتى اقپاردى،
قابىردىڭ باس جاعىنان باستاپ قازدى.
تىزەدەن اسا بەرە، ءبىر باس سۇيەك،
تابىلىپ قازۋشىلار توقتاپ قالدى.
كاتەكەڭ باس سۇيەكتى الدىنا الىپ،
باكىسىن سۇق ساۋساققا سالدى بارىپ.
ساۋساقتان اتىپ شىققان قىپ- قىزىل قان،
سۇيەككە سارى تاپ بولعان تامدى بارىپ.
وسىلاي اجىراتپاق تانىپ تەكتى،
ءبىراق قان باس سۇيەكتەن اعىپ كەتتى.
بۇل بالا مەنىكى ەمەس، دەگەننەن سوڭ،
جىگىتتەر ارى قاراي قازىپ كەتتى.
بەرمەسىن پەندەگە اللا عارىپتىقتى،
كەلگەندەي قۇداي ايداپ جارىقتىقتى.
قازۋشىلار كوپ بولماي الگى اقىمنان،
ەكىنشى باس سۇيەكتى الىپ شىقتى.
قوس مولدا ءبىر نارسەنى ءبىلىپ كەپتى،
كوكەيدەن كۇمان مەنەن كۇدىك كەتتى.
بۇل جولى باس سۇيەككە تامىزعان قان،
قۇمعا قۇيعان سۋداي بوپ ءسىڭىپ كەتتى!!!
مۇنى كورگەن جان بىتكەن ەگىلەدى،
كاتەكەڭ ءتىپتى بورداي ەزىلەدى.
«جان بالام، قۇلىنشاعىم، بوتاقانىم،
باسىڭا كەلدى اكەڭ» - دەپ ەڭىرەدى.
- شۇكىر اللا بەردىڭ دەپ تىلەگەندى، -
كاتەكەڭ باس سۇيەكتى سۇيە بەردى.
شەر تولعان كەۋدەسىنە قاتتى قىسىپ،
بۇگىلىپ باسىن جەرگە يە بەردى.
قانى تانىپ العان سوڭ تەگىن ءبىلىپ،
ريزا حوش بولعانداي كوڭىل ءۇمىت.
و، قۇدىرەت قۇشاقتاپ باس سۇيەكتى،
تەكتى قارتتىڭ كەتىپتى دەمى ءۇزىلىپ.. ..
5
دەسەك تە بۇل دۇنيە شولاق ەكەن،
بىلەرى دانا قارتتىڭ مول- اق ەكەن.
و، جاساعان قۋراعان سۇيەكتە دە،
مۇنداي ۇلى قاسيەت بولادى ەكەن.
بۇل بالكىم ءبىر تىلسىمنىڭ شەتى شىعار،
وعان قانداي جۇرەكتىڭ وتى شىدار.
قاسيەتتى قازاقتىڭ قانىنداعى،
تەكتىلىك دەگەن ناعىز وسى شىعار.
بىلگەن سوڭ قاسيەتىن تازا قاننىڭ،
قولىما قانىم قىزىپ قالام الدىم.
جالعىز تامشى قاننان- اق مەن وسىلاي،
ەكى ومىردە ۇمىتپاس ساباق الدىم.
بۇل كۇندە ەركىن سانام، ەركىن دەنەم،
قازاق پا تەگىن ايتسا جەلپىنبەگەن؟ !
تولارساقتان قان كەشسە بابالارىم،
ۇرپاقتىڭ قانى تازا بولسىن دەگەن.
جان- ءتانىڭدى جىبەرەر كۇيگە بولەپ،
قان دا ەكەن عوي بىلگەنگە شىن كەرەمەت.
باسىڭ- التىن، بولسا دا قولىڭ- كۇمىس،
قانىڭ تازا بولماسا كىمگە كەرەك؟ !
تىلەگىم تۇلپارىمىز سۇرىنبەسىن،
ازات كۇن ماڭگى كوكتە كۇلىمدەسىن!
ۇلى دالا ەلىنىڭ بويىنداعى،
تەكتىلىكتىڭ تامىرى ۇزىلمەسىن!