نۇرجان تولەنديەۆتىڭ ەكى جىلدان بەرى سالىق تولەمەي كەلگەنى بەلگىلى بولدى

 استانا. قازاقپارت - شىمكەنتتە قارىزى ەڭ كوپ ادامدار ساياساتكەرلەر مەن ارتىستەر. مەملەكەتتىك كىرىس ىستەرى قالالىق دەپارتامەنتىنىڭ ماماندارى وسىلاي دەپ وتىر.

ساياساتكەرلەر مەن ارتىستەردىڭ قارىزى ءجۇز مىڭداپ سانالادى. بۇل جولى تەك ەسكەرتۋ جاسادى. ەگەر قارىز وتەلمەگەن جاعدايدا، اكىمشىلىك شارا قولدانادى، دەپ جازادى وتىرار.

«تاراز» ىقشاماۋدانىنىڭ تۇرعىنى نۇرجان تولەنديەۆتىڭ قارىزىن تەكسەردىك. 2017-جىلدان بەرى ونىڭ 146 مىڭ 866 تەڭگە قارىز ەكەنى انىقتالدى. بۇل جولى وسى سومانى وتەۋ تۋرالى ەسكەرتۋ جىبەردىك. بۇعان دەيىن دە ەلەكتروندى تۇردە حابارلاما جىبەرگەنبىز. باستاپقىدا، بەس كۇن، كەيىن ءبىر اي كۇتەمىز. سوسىن سوت ورىنداۋشىلارىن ارالاستىرامىز»، - دەيدى شىمكەنت قالاسى ەڭبەكشىقازاق اۋدانى بويىنشا مەملەكەتتىك كىرىس باسقارماسىنىڭ باس مامانى مەيرامبەك بەكسۇلتانوۆ.

ودان بولەك تاعى ءبىر ءزاۋلىم ءۇيدىڭ يەسى مەملەكەتكە قارىز. كورشىلەرى ول ءۇيدىڭ بوس تۇرعانىن، وندا ساياساتكەر تۇراتىنىن ايتتى. قازىر استانادا جۇمىس ىستەپ جاتقان كورىنەدى.

«تاراز» ىقشاماۋدانىندا تۇراتىن سالىق تولەۋشى دانيار پسەبايەۆ جەكە مۇلىك پەن جەر سالىعى ءۇشىن 213 مىڭ تەڭگە قارىز. ەسكەرتۋ جىبەردىك. ماتەريال سوت ورىنداۋشىلارىنا جىبەرىلدى. بۇل 2017 -جىلدان بەرى تولەنبەگەن قارىز»، - دەيدى م ك ب باس مامانى دياس ءشارىپ.

شىمكەنتتە ابىرويلى سانالاتىن بۇل ىقشاماۋداندا قارىزى تولەنبەگەن بايلار جەتەرلىك. وڭىردە ءجۇز مىڭداپ قارىزى بار 20 ءۇي يەسى بار. ولار سالىق تولەۋگە اسىعار ەمەس.

Stan.kz