مينيسترلىك بۇرىن سوتتى بولعان ادامداردى جۇمىسپەن قامتۋعا ەكپىن قويماق

 استانا. قازاقپارات - ق ر ىشكى ىستەر مينيسترلىگى اكىمدىكتەردەن بۇرىن سوتتى بولعان ادامداردى جۇمىسپەن قامتۋدى تالاپ ەتپەك. بۇل تۋرالى بۇگىن پارلامەنت ماجىلىسىندەگى ۇكىمەت ساعاتىندا ق ر ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ ءمالىم ەتتى، دەپ حابارلايدى قازاقپارات.

«جاستار اراسىنداعى قۇقىق بۇزۋشىلىقتىڭ الدىن الۋعا قاتىستى قادامداردى وزگەرتەمىز. جالپى، سوڭعى 5  جىلدا جاستار جانە كامەلەتكە تولماعاندار تاراپىنان ورىن العان قىلمىس تومەندەپ كەلەدى. الايدا ەڭ باستى پروبلەما جۇمىسپەن قامتۋعا بايلانىستى بولىپ وتىر. سەبەبى 2018 -جىلى تىركەلگەن 46 مىڭ قىلمىستىڭ ىشىندە 35 مىڭنان استامى جۇمىسسىزدارعا تيەسىلى. ياعني ولار ءبىلىمىن جەتىلدىرۋگە بارماعاندار، تۇراقتى جۇمىسى مەن تۇرعىلىقتى جەرى جوق جاندار» . - دەدى ج. سۇلەيمەنوۆ.

ونىڭ سوزىنە قاراعاندا، 30 مىڭنان استام ادام پروباتسيا ەسەبىندە تۇر. ونىڭ ىشىندە 11,5 مىڭنان استامى جۇمىسپەن قامتىلماعان.

«بۇل تۇرعىدا اكىمدىكتەردەن ءبىرىنشى كەزەكتە باس بوستاندىعىنان ايىرۋ ورىندارىنان بوساتىلعانداردى جۇمىسپەن قامتۋدى تالاپ ەتپەكپىز» ، - دەدى جانات سۇلەيمەنوۆ.

 بۇدان بۇرىن حابارلانعانداي، بۇگىن ۇكىمەت ساعاتىندا قر قوعامدىق دامۋ ءمينيسترى دارحان كالەتايەۆ NEET ساناتىنداعى جاستاردىڭ ۇلەسىن تومەندەتۋ شارالارى تۋرالى ايتتى.

 سونىمەن قاتار ول وسى اپتادا استانا، الماتى جانە شىمكەنت قالالارىندا جاستاردى پاتەرمەن قامتاماسىز ەتۋگە ارنالعان جوباعا بايلانىستى كەلىسىم جاسالاتىندىعىن اتاپ ءوتتى.