تەننيس: زارينا دياس تا دۋباي ءتۋرنيرىنىڭ العاشقى اينالىمىنان اسا المادى

استانا. قازاقپارات - قازاقستاندىق تەننيسشى زارينا دياس دۋباي ءتۋرنيرىنىڭ العاشقى اينالىمىندا سلوۆەنيالىق داليلا ياكۋپوۆيچپەن كۇش سىناستى، دەپ حابارلايدى قازاقپارات ءتىلشىسى.

الەمدىك رەيتينگتە ز. دياس بۇگىن 94-ورىنعا كوتەرىلسە، قارسىلاسى 85-ساتىدا ەدى.

زارينا جۇلدە قورى 2,5 ميلليوننان استام ا ق ش دوللارىنا باعالانعان نەگىزگى تۋرنيرگە ىرىكتەۋ سايىستارىن ءساتتى وتكىزگەننەن كەيىن قوسىلعان بولاتىن. ال د. ياكۋپوۆيچ ىرىكتەۋ سايىسىنىڭ فينالىندا ۇتىلىپ قالسا دا، نەگىزگى جارىسقا ارنايى شاقىرتۋ الدى.

تاجىريبەلى تەننيسشى د. ياكۋپوۆيچ 1991 -جىلعى بولسا، زارينا ودان ەكى جاس كىشى ەدى.

ءبىرىنشى پارتيادا ەسەپ 1:1 بولىپ تۇرعان مەزەتتە قازاقستاندىق تەننيسشى برەيك جاساپ، العا شىقتى. سودان كەيىن ءوز گەيمدەرىن قۇر جىبەرمەي، تاعى ەكى برەيككە قول جەتكىزىپ، سەتتى ءتامامدادى - 6:1.

ەكىنشى سەتتە بىردەن برەيك جاساعان سلوۆەنيالىق تەننيسشى العا شىقتى - 2:0. ءتورتىنشى گەيمدە زارينا ءتورت بىردەي برەيك- پوينتتى ءمۇلت جىبەردى - 1:3. ەسەسىنە د. ياكۋپوۆيچ تاعى ءبىر برەيك جاساپ، ءوز گەيمىن دە الدى - 5:1. تاعى دا برەيك - 6:1.

ءۇشىنشى، شەشۋشى پارتيادا ەسەپ 2:1 بولعان ساتتە د. ياكۋپوۆيچ برەيك جاساپ، ءوز گەيمىن دە الدى - 4:1. بۇدان كەيىن باپكەرىنىڭ اقىل- كەڭەسىنە جۇگىنگەن زارينا ەسەپتى قىسقارتتى - 2:4. ءبىراق قارسىلاسى تاعى ءبىر برەيكپەن ماتچتى قورىتىندىلادى - 6:2.

ءبىرشاما تارتىستى وتكەن باسەكە ساعات جارىمداي ۋاقىتقا سوزىلدى.

سلوۆەنيالىق سپورتشىنىڭ ەكىنشى قارسىلاسى وتە مىقتى. داليلا ءبىرىنشى اينالىمدا بوس بولعان الەمنىڭ 7-راكەتكاسى، گەرمانيالىق انجەليكا كەربەرمەن شەبەرلىك بايقاسادى.

ەرلەر اراسىندا قازاقستاننىڭ ءبىرىنشى، الەمنىڭ 50-راكەتكاسى ميحايل كۋكۋشكين فرانسيادا مارسەل ءتۋرنيرىنىڭ (جۇلدە قورى - 668 485 ەۋرو) العاشقى اينالىمىندا رەيتينگتە 61-ورىندا تۇرعان امەريكالىق دەنيس كۋدلامەن كەزدەسەدى.

تاعى ءبىر قازاقستاندىق تەننيسشى، الەمدىك رەيتينگتەگى 149-ورىنداعى الەكساندر بۋبليك يتاليادا بەرگامو چەللەندجەر تۋرنيرىندە باق سىنايدى.

ەسكە سالا كەتەيىك، بۇدان بۇرىن قازاقستاندىق تەننيسشىلەردىڭ دۋباي تۋرنيرىندەگى قارسىلاستارى انىقتالعانىن، ودان كەيىن يۋليا پۋتينتسيەۆانىڭ العاشقى اينالىمنان اسا الماعانىن، بۇگىن م. كۋكۋشكيننىڭ ۇزدىك ەلۋلىككە ەنگەنىن جازعان بولاتىنبىز.