جاستارعا ارنالعان پاتەرلەر قانداي ساناتتارعا بەرىلەتىنى ايقىندالدى

استانا. قازاقپارات - وسى اپتادا استانا، الماتى جانە شىمكەنت قالالارىندا جاستاردى پاتەرمەن قامتاماسىز ەتۋگە ارنالعان جوبا كەلىسىمدەلمەك.

بۇل تۋرالى پارلامەنت ماجىلىسىندەگى ۇكىمەت ساعاتىندا ق ر قوعامدىق دامۋ ءمينيسترى دارحان كالەتايەۆ ءمالىم ەتتى، دەپ حابارلايدى قازاقپارات ءتىلشىسى.

«استانا، الماتى جانە شىمكەنت قالالارىندا جاستار ءۇشىن جىلىنا 1 مىڭ پاتەر قاراستىرىلعان جانە ول جالعا الۋ تارتىبىمەن ىسكە اسىرىلادى. وسى باعىتتا قامتىلاتىن ساناتتاردى دايارلاپ، وكىلەتتى ورگاندارعا، سونداي- اق الماتى، استانا، شىمكەنتتىڭ اكىمدىكتەرىنە تاپسىردىق. مەنىڭ ويىمشا، وسى اپتانىڭ بارىسىندا جاستار ساناتتارىن كەلىسىمنەن وتكىزەمىز»، - دەدى مينيستر.

ونىڭ سوزىنە قاراعاندا، پاتەر الۋعا ۇمىتكەرلەردىڭ جاس ارالىعى انىقتالعان. بۇل تۇرعىدا 29 جاسقا دەيىنگى دەڭگەي ايقىندالدى، سەبەبى زاڭناماعا سايكەس، جاستار ساناتى 29 جاسقا دەيىن بەلگىلەنگەن. سونىمەن قاتار، جاستار مىندەتتى تۇردە جۇمىس ىستەۋى ءتيىس.

«بىزدە بالدىق جۇيە ەسكەرىلگەن. ۇسىنىلعان مەزىم بويىنشا پاتەر 3 جىلعا بەرىلەدى، وسىدان كەيىن كوميسسيا شارتتىڭ مەرزىمىن ۇزارتۋدى قاراستىرادى. بۇل باعدارلاما بويىنشا جاس وتباسى پاتەر العان كەزدە تۇرعىن ءۇي بانكىندە بىردەن ەسەپ-شوت اشۋى ءتيىس. ال كەزەككە توقتالساق، اتالعان قالالاردا جاستار كەم دەگەندە 3 جىل تۇرۋى كەرەك. ازىرگە، وسىنىڭ بارلىعى جوبادا ۇسىنىلدى. ەندى، سارسەنبىگە دەيىن وكىلەتتى ورگاندار ءتيىستى جاۋابىن بەرەدى»، - دەدى دارحان كالەتايەۆ.

ءوز كەزەگىندە ق ر يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن- ءۇي كوممۋنالدىق شارۋاشىلىعى ىستەرى كوميتەتىنىڭ ءتوراعاسى مارحابات جايىمبەتوۆ استانا مەن الماتىدا 350, ال شىمكەنتتە 300 پاتتەر سالىناتىنىن جەتكىزدى.

«شارشى مەترى 180 مىڭ تەڭگە، پاتەر اۋماعى 40 شارشى مەتر بولادى. قازىرگى كەزدە ءۇش قالانىڭ اكىمدىكتەرىمەن جوبانى پىسىقتاپ جاتىرمىز»، - دەدى م. جايىمبەتوۆ.

بۇدان بۇرىن حابارلانعانداي، جاستار جىلىنىڭ اشىلۋىنا ارنالعان سالتاناتتى جيىندا ەلباسى استانا، الماتى جانە شىمكەنت قالالارىندا جاستار ءۇشىن جىلىنا 1 مىڭ پاتەر سالىناتىنىن ايتقان ەدى.