شىمكەنتتە ون ءۇش جاسار بالا جانىپ جاتقان ۇيدەن ەكى ءبۇلدىرشىندى قۇتقارىپ قالدى

شىمكەنت. قازاقپارات - شىمكەنتتە ون ءۇش جاسار جاس ءوسپىرىم جانىپ جاتقان ۇيدەن ەكى ءبۇلدىرشىندى قۇتقارىپ قالدى.

6 جانە 7 جاستاعى بالا ورتكە ورانعا ۇيدە قالىپ كەتكەن بولاتىن، دەپ حابارلايدى قازاقپارات ءتىلشىسى.

قالالىق ت ج د باسپا ءسوز قىزمەتىنىڭ مالىمەتىنشە، ءورت كۇندىزگى ساعات 16:39-دا قۇرساي مولتەك اۋدانىندا ورىن العان. ۇيدە ۇلكەندەردىڭ قاراۋىنسىز 3 بالا قالعان. ولاردىڭ ۇلكەنى ءتۇتىندى كورىپ، قورىققاندىقتان كورشىلەرىنە كومەك سۇراۋعا بارادى. سەبەبى، اتا-اناسى ۇيدەن شىعىپ كەتكەن. وسى كەزدە سول ماڭدا تۇراتىن 13 جاستاعى جاس ءوسپىرىم ويلانباستان، ەكى كىشكەنە بالا قالعان ۇيگە جۇگىرەدى. تۇتىنگە تولا ۇيدەن 2013 -جىلعى قىز بالانى جانە 2015 -جىلى تۋعان ۇل بالانى دەر كەزىندە شىعارىپ العان. ارتىنشا شاعىن ءۇيدىڭ بارلىعى وتقا ورانعان.

«ءورت ءسوندىرۋ قىزمەتىنە قاراستى №1 -مامانداندىرىلعان جاساقتىڭ جەكە قۇرامى (14 ادام) وقيعا ورنىنا كەلىپ، جاڭاقۇرىلىس كوشەسى بويىنداعى ۋاقىتشا سالىنعان ۇيدەگى ءورتتى سوندىرۋگە كىرىستى. ءورت 60 شارشى مەتردى شارپىعان. جالىن 18.30-دا سوندىرىلگەن» دەلىنگەن ت ج د حابارلاماسىندا.

ال، ورتتەن شىعارىلعان بالالار قورقىپ قالعان. دەگەنمەن قازىرگى جاعدايى قاناعاتتانارلىق. قازىرگى ساتتە ماماندار ءورتتىڭ شىعۋ سەبەبىن انىقتاۋدا.