كومپيۋتەرلىك ويىندار بالالارعا قالاي اسەر ەتەدى؟

 استانا. قازاقپارات - قازىر عالامتورعا جانە كومپيۋتەرلىك ويىندارعا تاۋەلدى جاسوسپىرىمدەردىڭ سانى كۇننەن- كۇنگە ارتۋدا. بالانىڭ ۆيرتۋالدى الەممەن اۋەستەنۋىنە قاتىستى كەي سۇراقتارعا جاۋاپ ىزدەيمىز.

كومپيۋتەرلىك ويىنداردى كوپ ويناۋ شىنىمەن دە زيان با؟ قانداي دا ءبىر ناقتى دەڭگەيدە ارينە، زيان. بالالار دارىگەرلەرى كومپيۋتەر الدىندا ۇزاق وتىرۋ سەمىزدىككە، دامۋىنداعى ارتتا قالۋشىلىققا، ۇيقى پروبلەمالارىنا جانە كۇيزەلىسكە اكەلەتىندىگىن ەسكەرتەدى. كومپيۋتەرلىك ويىندار بالانىڭ قاتىگەز بولۋىنا ىقپال ەتە مە؟ ول ويىنعا بايلانىستى: ەگەر قاراپايىم دامىتۋشى ويىندار بولسا، ارينە، جوق. ال كومپيۋتەرلىك اتىسۋ ويىندارىنا قاتىستى ءالى دە ناقتى جاۋاپ جوق. كەي زەرتتەۋلەر قاتاڭ ويىندار كەيدە بالانىڭ اگرەسسيۆتى بولۋىنا اسەر ەتەتىندىگىن دالەلدەگەنمەن، شىنايى ولىممەن ونىڭ ەش قاتىسى جوق ەكەندىگىن انىقتادى. جالپى مۇنداي ويىننىڭ بالانىڭ ارەكەتىنە قانشالىقتى اسەر بەرەتىندىگى ءالى دە تولىق زەرتتەلمەگەن.

ياعني، تەك «كومپيۋتەرلىك اتىسۋ» ويىندارى عانا زيان با؟ جوق، نەمىس زەرتتەۋشىلەرى كومپيۋتەرلىك اۆتوموبيل جارىستارى دا بالاعا بەلگىلى ءبىر دەڭگەيدە زيانىن تيگىزەتىنىن ايتادى. مۇنداي ويىندار ناتيجەسىندە، شىنايى ومىردە دە جول ءجۇرۋ ەرەجەسىن بۇزۋعا اكەلگەن جاعدايلار كەزدەسكەن. ەندەشە، كومپيۋتەردەگى دامىتۋشى ويىنداردى ويناي بەرسە بولا ما؟ كومپيۋتەردەن دامىتۋشى ويىنداردى ويناۋعا بولادى، ءبىراق عالىمدار ودان بالاعا ەش پايدا جوق دەپ ويلايدى. وندا بالا كومپيۋتەر الدىندا ۇزاق وتىرماس ءۇشىن نە ىستەۋ كەرەك؟ بالادان بىردەن گادجەتتەرىن تارتىپ الماڭىز. بۇل ارەكەتىڭىزبەن بالانىڭ سىزگە دەگەن سەنىمىن جوعالتىپ الىپ، وعان جاۋ بولاسىز. ونىڭ ورنىنا مىنا كەڭەستەرگە قۇلاق ءتۇرىڭىز:

- بارلىق وتباسى ءۇشىن كومپيۋتەرلىك (كەز كەلگەن گادجەت) ويىنعا ارنالعان ناقتى ەرەجەلەر ويلاپ تابىڭىز. مىسالى، مۇنداي ويىنداردى ويناۋعا بولمايتىن جەرلەردى بەلگىلەڭىز: ول ءاسۇي، كولىك جانە ت. ب بولۋى مۇمكىن. سول سياقتى ۇيىقتارعا ءبىر ساعات قالعاننان باستاپ ەشكىمنىڭ گادجەتكە جولاماۋىن سۇراڭىز. بۇل ەرەجەلەر تەك بالالارعا ەمەس، ەرەسەكتەرگە دە قويىلۋى ءتيىس؛

 - بالاعا كومپيۋتەرلىك ويىننىڭ ورنىنا باسقا لايىقتى ءىس ۇسىنىڭىز. ول سپورت، ۇستەل ويىنى، وتباسىلىق كەش، سەرۋەندەۋ جانە ت. ب بولۋى مۇمكىن؛

 - بالاعا كومپيۋتەرلىك ويىنداردى كوپ ويناۋدىڭ زياندى تۇستارىن ءتۇسىندىرىپ بەرىڭىز. شىنايى ومىردە زورلىققا ورىن جوق ەكەندىگىن ايتىڭىز. ۆيرتۋالدى الەمنەن شىعىڭىز!

Massaget.kz