اقتوبەلىك اۋىلداستارىنا تەگىن قىمىز تاراتىپ ءجۇر

 اقتوبە. قازاقپارات - اقتوبەنىڭ العا اۋدانى، بەستاماق اۋىلىندا تۇراتىن انارحان بەردىبەكوۆا اۋىلداستارىنا تەگىن قىمىز تاراتىپ وتىر، دەپ حابارلايدى قازاقپارات ءتىلشىسى.

22 جاستاعى انارحان بەردىبەكوۆا «Zhas project» جوباسىنا قاتىسىپ، 1 ميلليون تەڭگە ۇتىپ الدى. قارجىنىڭ 600 مىڭ تەڭگەسىنە قۇلىندى بيە ساتىپ السا، قالعان اقشاعا جەم- ءشوپ جينادى.

«الەۋمەتتىك جوبا تۋرالى ايتىلعان كەزدە وتباسىمىزبەن اقىلداسىپ، بيە ۇستاپ، قىمىز دايىنداۋعا توقتالدىق. مەن ءوزىم ەشتەڭە بىلمەدىم. بيە ساۋۋدى ەنەم ۇيرەتتى، ءوزى قىمىز ىستاپ بەردى. قازىر الەۋمەتتىك جاعىنان از قامتىلعان، مۇقتاج وتباسىعا جەتكىزىپ بەرەمىن. اپتاسىنا ەكى رەت ۇيلەرىنە بارىپ، قىمىز تاراتىپ ءجۇرمىن» ، - دەدى انارحان بەردىبەكوۆا.

قىمىز ارقىلى اۋىل تۇرعىندارىنىڭ دەنساۋلىعىن جاقسارتۋعا ۇلەس قوسىپ جۇرگەن ا. بەردىبەكوۆا مۇقتاج وتباسىلاردىڭ ءتىزىمىن اۋىلدىق اكىمدىكتەن الدى. التى اي بويى تەگىن بال قىمىز تاراتۋ مىندەتىن العان جاس كاسىپكەر الداعى ۋاقىتتا وسى ءىستى جالعاستىرماق. « ءبىز ازىرگە قىمىزدىڭ ءبىر ءتۇرىن دايىنداپ ءجۇرمىز. جاستار ءۇشىن جاڭا مۇمكىندىك بەرىلگەن كەزدە بىردەن جوبا ۇسىنىپ، جەڭىمپاز اتاندىم. الداعى ۋاقىتتا جەكە كاسىپتى دامىتىپ، ۇلتتىق سۋسىننىڭ بىرنەشە ءتۇرىن دايىنداعىمىز كەلەدى. سونىمەن قاتار، سيىر، ەشكى سۇتىنە سۇرانىس بار» ، - دەدى ول.