قاراعاندىلىق بالالار سالعان سۋرەتتەر دەليدەگى كورمەدە كورسەتىلدى
باعدارلامانىڭ ماقساتى ءۇندىستان تۇرعىندارى مەن قوناقتارىن قازاق حالقىنىڭ مادەنيەتىمەن، سالت- داستۇرلەرىمەن تانىستىرۋ. كورمەگە قاتىسۋ ءۇشىن قاراعاندى قالاسىنداعى يۋنەسكو كلۋبى - №2 ونەر مەكتەبىنىڭ دارىندى وقۋشىلارى، «بالاقاي» جانە «بايتەرەك» بالاباقشالارىنىڭ تاربيەلەنۋشىلەرىنىڭ تاڭداۋلى 30 جۇمىسى ىرىكتەپ الىندى. كورمەگە قاراپايىم قوناقتار عانا ەمەس، ونەر سالاسىنداعى ساراپشىلار دا اسا قىزىعۋشىلىق تانىتتى. باعدارلاما اياسىندا جاس ونەرپازدار ۇستازدارىمەن بىرگە يۋنەسكو كلۋبى مارتەبەسىنە يە جەرگىلىكتى مەكتەپتەرگە بارىپ، كونسەرتتەر قويدى، شەبەرلىك ساباقتارىن وتكىزدى. ودان ارى ىنتىماقتاستىق ورناتۋ ءۇشىن مەكتەپتەر اراسىندا الداعى ۋاقىتتا بىرلەسكەن عىلىمي- زەرتتەۋ جانە مادەني شارالاردى وتكىزۋدى كوزدەيتىن ءوزارا تۇسىنىستىك تۋرالى مەموراندۋمدارعا قول قويىلدى. وسى ساپاردى قازاقستاننىڭ يۋنەسكو ۇلتتىق كلۋبتار فەدەراتسياسىنىڭ قاراعاندى وبلىسى بويىنشا وڭىرلىك وكىلدىگى ءۇندىستاننىڭ يۋنەسكو كلۋبتارى مەن قاۋىمداستىقتارى كونفەدەراتسياسى جانە قازاقستاننىڭ ءۇندىستانداعى ەلشىلىگىنىڭ قولداۋىمەن ۇيىمداستىردى.