قىزىلوردادا رەسپۋبليكالىق جاس اقىندار ايتىسى ءوتتى

 قىزىلوردا. قازاقپارات -  قىزىلوردا قالاسىندا رەسپۋبليكالىق «جاستىقتىڭ وتى جالىنداپ» جاس اقىندار ايتىسى ءوتتى. وعان ەلىمىزدىڭ كوپتەگەن ايماقتارى مەن سىر وڭىرىنەن ونەر الەمىنە ەندى قادام باسقان دارىندى جاستار قاتىستى، دەپ حابارلايدى قازاقپارات ءتىلشىسى.

رەسپۋبليكالىق جاس اقىندار ايتىسىنا  قىزىلوردا قالاسىنىڭ اكىمدىگى قولداۋ ءبىلدىردى. قالالىق مادەنيەت جانە تىلدەردى دامىتۋ ءبولىمىنىڭ ۇيىمداستىرۋمەن وتكەن مادەني شارادا قازىلار القاسىنا بەلگىلى اقىن ءجۇرسىن ەرمان باسشىلىق جاسادى. جاس اقىندار قازاقتىڭ ورەلى ونەرىن بيىكتەتتى. وزدەرىنىڭ قابىلەت- قارىمىن كورسەتتى. مارجان ءسوزدىڭ مايەگىن تەرىپ، كوپشىلىكتى كوركەم ويمەن كوزايىم ەتتى. جاس اقىندار ايتىسىندا استانالىق داۋرەن ىسقاق باس بايگەگە يە بولدى. ءبىرىنشى ورىن سىر ءوڭىرىنىڭ نامىسىن قورعاعان نۇرزات قارۋعا بۇيىرسا، ەكىنشى ورىنعا الماتىلىق نۇربول جاۋىنبايەۆ لايىقتى دەپ تانىلدى. ۇزدىك ۇشتىكتى استانالىق نارتاي تىلەۋقۇل تۇيىندەدى. ەستەرىڭىزگە سالا كەتەلىك، كەشە  قىزىلوردادا «جاستار جىرلايدى» اتاۋىمەن رەسپۋبليكالىق ايتىس مارەسىنە جەتتى.