كىتاپ اراسىنداعى كوك ءيىسىن كەتىرۋ تاسىلدەرى

استانا. قازاقپارات - كونەنىڭ جادىگەرلەرى بارلىعىمىز ءۇشىن اسىل مۇرا بولماق. الايدا سول مۇرامىزدىڭ شاڭ باسقان ارحيۆتە جاتىپ، يىستەنىپ كەتەتىن كەزى بولادى. كەزەكتى ماتەريالىمىزدا وسى جاعىمسىز يىستەن ارىلىپ، قاجەتتى كىتابىڭىزدى ۇزاق ۋاقىت بويى ساقتاۋعا كومەكتەسەتىن نۇسقاۋلىقتار ۇسىنامىز.

 ەڭ الدىمەن، كىتاپتىڭ نە سەبەپتى يىستەنەتىنىن انىقتايىق: 1. كىتاپ تۇرعان جەردىڭ دىمقىلدىعىن تەكسەرىپ كورىڭىز. كەز كەلگەن باكتەريا مەن كوكتىڭ پايدا بولۋىنا ىلعال مەن دىمقىلدىڭ ءوزارا دۇرىس ارەكەتتەسپەۋى سەبەپ بولادى. ەگەر ءشاي ءىشىپ وتىرىپ، كىتاپ وقيتىن ادەتىمىز بولسا، اراسىنا توگىلگەن ءشاي دە كىتاپ بەتتەرىنىڭ ءبىر- بىرىنە جابىسىپ قالۋىنا سەبەپ بولۋى مۇمكىن. ال كىتاپتىڭ دىمقىلدىعىن تومەندەگى بەلگىلەرىنە قاراپ انىقتاۋعا بولادى: - كىتاپ بەتتەرىنىڭ شەتكى بولىگى ءبىر- بىرىنە قاتتى جابىسادى. جانە سۋ جەتپەگەن ايماعى وڭاي اشىلادى؛ - ءتۇسى سارعىشتانىپ كەتەدى؛ - اراسى كوگەرگەنى بايقالادى؛ - دىمقىل جەرتورە سەكىلدى ءبىر ءيىس شىعادى.

 2. تەمەكى تۇتىنىنەن زاقىمدانباعانىن تەكسەرىڭىز. كىتاپ اراسىندا جاعىمسىز ءيىستىڭ پايدا بولۋىنا تەمەكى ءتۇتىنى سەبەپشى بولۋى مۇمكىن. تەمەكى تۇتىنىمەن زاقىمدانعان كەزدە كىتاپ قۇرعاق، ءبىراق سارعىش تۇسكە بويالادى. كىتاپتىڭ جاعىمسىز يىسىنەن ارىلۋ تاسىلدەرى 1. كىتاپتىڭ كوگەرگەنىن بايقاساڭىز، ونى بىردەن تازارتۋعا كىرىسىڭىز. 2. كىتاپتى تىگىنەن ۇستەل ۇستىنە قويىڭىز. بەتتەرىن اقىرىن جەلدەتىڭىز. ەگەر جەلدەتۋگە ساۋساقتارىڭىزدىڭ قاۋقارى جەتپەي جاتسا، اراسىن پىشاقتىڭ كومەگىمەن اشىڭىز نەمەسە قىسقىشتى پايدالانىڭىز.

3. كىتاپتى قۇرعاق ءارى جىلى جەرگە قويىڭىز. ارتىنشا بارلىق بەتتەرىنىڭ كەپكەنىنە كوز جەتكىزىڭىز. ونى كەپتىرۋ ءۇشىن كۇن ساۋلەسىن پايدالانۋىڭىزعا بولادى. الايدا كۇن ساۋلەسى كەيبىر ارىپتەردى وقىلمايتىنداي ءوشىرىپ جىبەرۋى مۇمكىن. ياعني تۋرا كۇننىڭ استىنا قويۋدىڭ قاجەتى جوق. ءيىستى كەتىرۋ ءۇشىن ابسوربەنتتى پايدالانۋ بۇل ءتاسىلدى قۇرعاق، ءبىراق جاعىمسىز ءيىسى بار كىتاپتار ءۇشىن پايدالاناعان ءجون. 1. مىسىق دارەتحاناسىن تولتىرعىشتى پايدالانىپ كورىڭىز. ول ءۇشىن سىزگە كىشكەنە كونتەينەر جانە ۇلكەن كونتەينەر، ابسوربەنت رەتىندە اس سوداسى، مىسىق دارەتحاناسىن تولتىرعىش زات، اعاش كومىر قاجەت بولادى.

 - ۇلكەن كونتەينەردىڭ جارتىسىنا جەتكىزىپ مىسىق دارەتحاناسىن تولتىراتىن زاتتى سالىڭىز؛

 - ارتىنشا جاعىمسىز ءيىستى كىتاپتى كىشى كونتەينەردىڭ تۇبىنە سالىپ، ونى ۇلكەن كونتەينەردىڭ ىشىنە جايعاستىرىڭىز؛

 - ۇلكەن كونتەينەردىڭ بەتىن جاقسىلاپ جاۋىپ، ابسوربەنتكە سالىنعان كىتاپتى بىرنەشە كۇنگە قالدىرىڭىز؛

 - كىتاپتى بىرنەشە كۇن سايىن الىپ قاراڭىز. كىتاپتىڭ ءيىسى كەتپەيىنشە وسى ءراسىمدى قايتالاي بەرىڭىز؛

- بۇدان بىلاي كىتاپتى قۇرعاق جەرگە قويىڭىز؛

- مىسىق دارەتحاناسىن تولتىراتىن زاتتى بەلسەندى كومىرمەن نەمەسە اعاش كومىرمەن الماستىرۋعا بولادى. ءبىراق كىتاپ بەتتەرىنىڭ كومىرمەن جاناسپاۋىن قاداعالاڭىز.

 2. اس سوداسىن پايدالانىپ كورىڭىز - شىنى ىدىسقا سالىنعان اس سوداسىن پلاستيك قوراپتىڭ نەمەسە قوقىس تاستايتىن شەلەكتىڭ ىشىنە قويىڭىز. ىشىنە كىتاپتى سالىپ، قاقپاعىن اۋا كىرمەيتىندەي ەتىپ جابىڭىز. 48-72 ساعاتقا قالدىرىپ، ارتىنشا تەكسەرىڭىز. جاعىمسىز ءيىس كەتپەيىنشە وسى ءراسىمدى قايتالاي بەرىڭىز؛ - كىتاپتىڭ ءاربىر 10 بەتىنىڭ اراسىنا اس سوداسىن سەبىڭىز. كۇن كوزىنە قويىپ، ارادا ءبىراز ۋاقىت وتكەن سوڭ بەتتەرىن الماستىرىپ وتىرۋدى ۇمىتپاڭىز. قوسىمشا كەڭەستەر:

 - جاعىمسىز يىستەردىڭ بارلىعى كوك يىسىنەن پايدا بولۋى مۇمكىن ەمەس. ⅩⅩعاسىرعا دەيىنگى كىتاپتار ساپاسى وتە تومەن قاعازدان جاسالعانىن ەسكەرىڭىز؛

 - ءوزىڭىز ءۇشىن قۇندىلىعى جوعارى كىتاپتى ساقتاۋ ءۇشىن ءارحيۆتى پوليەتيلەندى مۇشەكتى پايدالانعان ءجون. مۇنداي مۇشەكتەردى كىتاپ دۇكەندەرىنەن ساتىپ الۋعا بولادى؛

 - كىتاپتى 10-15 سەكۋندكە ميكروتولقىندى پەشكە سالىپ قويۋعا بولادى؛

 - سارعىش تۇسكە بويالعان كىتاپتى اعارتا المايسىز. سوندىقتان اسا كەرەك كىتاپتىڭ ەلەكتروندى نۇسقاسىن پايدالانعان ءجون. ال ءسىز كوگەرگەن كىتاپتى قالاي تازارتاسىز؟

Massaget.kz