الەم شارلاۋدا ەسكەرەر دۇنيەلەر

None
None
 استانا. قازاقپارات - الەم ەلدەرىنە ساياحات جاساۋ - بۇگىندە ءاربىر زاماناۋي ادامنىڭ ارمانىنا اينالدى دەسەك، ارتىق ايتقاندىق ەمەس. ارينە، ەل كورۋ، جەر ارالاۋدىڭ، ادام تانۋدىڭ پايداسى دا جوق ەمەس.

 ساياحات بارىسىندا جاڭا دۇنيەلەردى كورىپ، تانىمىڭدى كەڭەيتۋگە، جاڭا كوزقاراستارعا يە بولۋعا مۇمكىندىك بار. تەك ساياحات ەرەجەلەرىن جاقسى ءبىلۋ كەرەك. وسى ورايدا نازارلارىڭىزعا پاۋلو كوەلو جاساعان ساياحات ەرەجەلەرىن ۇسىنىپ كورمەكپىز. كەرەك دەگەنىڭىزدى ءتۇرتىپ الىڭىز:

 1. مۇراجايلاردان تىيىلۋ. كەڭەستىڭ قۇلاققا تۇرپىدەي ءتيۋى ابدەن مۇمكىن، ءبىراق ءسوزدىڭ بايىبىنا بارىپ كورەيىكشى: وزگە قالادا جۇرگەندە ونىڭ وتكەنىنەن بۇرىن ناعىز وسى شاعىن بىلگەن قىزىقتى ەمەس پە؟ سەن ءبارىبىر وتكەندى قالپىنا كەلتىرە المايسىڭ. ادامدار بالا شاعىنان بەرى سولاي تاربيەلەنگەندىكتەن، مۇراجايعا بارۋدى وزىنە پارىز رەتىندە بەكىتىپ العان. ارينە، مۇراجايعا بارۋ وتە ماڭىزدى، ءبىراق، سەن وزىڭە نە كەرەك ەكەندىگىن شەشىپ العانىڭ ءجون. ونداعى ەسكى دۇنيەلەر ساعان نە بەرە الادى؟ ولاردى كىتاپتان، عالامتور بەتتەرىنەن كورىپ الۋعا بولماي ما؟

 2. ويىن- ساۋىق ورتالىقتارىنا بار. ول جەردەن قالانىڭ، ادامداردىڭ ناعىز ءومىرىن كورە الاسىڭ، وي تۇيەسىڭ. ويىن- ساۋىق دەگەندە، بي كەشتەرى وتەتىن نەمەسە ادامدار ىشەتىن جەر ەمەس، جەرگىلىكتى تۇرعىندار، قاراپايىم حالىق جينالاتىن ورتا ايتىلىپ تۇر. گازەت ساتىپ ال دا، ورىندىققا جايعاس، وتكەن كەتكەندەردى سىرتتاي باقىلاپ كور. بىرەۋ سەنى سوزگە تارتقان بولسا، بارىڭدى سالىپ، سويلەسىپ كور.

 3. اشىق بول. ەڭ مىقتى گيد - جەرگىلىكتى تۇرعىن. ولار ارنايى قىزمەتتە ىستەمەگەنىمەن، ءبارىن بىلەدى، ءوز قالاسىن جاقسى كورەدى. كوشەگە شىق تا، "قالاي بارۋعا بولادى؟ " سىندى سۇراقتاردى كەز كەلگەن ادامعا باعىتتا، بىرىنشىسىمەن ۇيلەسپەسەڭ، ەكىنشىسى سەنىڭ كوڭىلىڭنەن شىعادى. جاقسى ادامدار كەزدەسىپ جاتسا، ءبىر كۇن بويى كەز كەلگەن ساۋالىڭا جاۋاپ الىپ، ەڭ جاقسى جەرلەرمەن سەرۋەندەي الاسىڭ.

 4. جالعىز ساياحاتتا نەمەسە كۇيەۋىڭدى يا ايەلىڭدى ەرتكەنىڭ ءجون. وسىلاي عانا ءوز ەلىڭنەن ءبىرجولا كەتە الاسىڭ. توپ بولىپ جۇرەتىن بولساڭ، ءوز تىلىڭدە سويلەۋدى جالعاستىرا بەرەسىڭ جانە جاڭا ورىندارعا ەمەس، اينالاڭداعى جولداستارىڭنىڭ اڭگىمەلەرىنە كوپ نازار اۋداراسىڭ.

 5. سالىستىرما. ەشتەڭەگە سالىستىرمالى تۇردە قاراما: باعاسىنا، تازالىققا، ءومىر ساپاسىنا، ترانسپورتقا. ەشبىرىنە! سەن ءوزىڭنىڭ جاقسى ءومىر سۇرەتىنىڭدى دالەلدەۋ ءۇشىن ساياحات جاسامايسىڭ. الدە سولاي ما؟ وزگەنىڭ ومىرىمەن ەتەنە جاقىن تانىس، ۇيرەنەتىڭدى الىپ، جيرەنەتىنىڭنەن باس تارت!

 6. سەنى ءبارى تۇسىنەدى. ءوزىڭ بارعان ەلدىڭ تىلىندە سويلەي الماساڭ دا، قورقۋشى بولما. پاۋلو كوەلو كوپتەگەن ەلدەردە بولدى. ول سول ەلدىڭ ءبىراۋىز ءسوزىن بىلمەسە دە، ءاردايىم كومەك قولىن سوزاتىنداردى تاپتى، ولاردىڭ كوپشىلىگى ساياحاتشىنىڭ ەڭ جاقىن دوستارىنا اينالىپ كەتكەن. كوپ ادامدار جالعىز جۇرگەندە اداسىپ كەتەمىز دەپ ويلايدى. ءوزىڭ توقتاعان قوناق ءۇيدىڭ ءۆيزيتتى كارتاسى قالتاڭدا بولسا - قورقاتىن دانەمە جوق. كەز كەلگەن جۇرگىزۋشىگە كورسەتسەڭ، كەرەك جەرىڭە ۋاقىتىندا جەتكىزەدى.

 7. تىم كوپ ساۋدا جاساما. اندا- مۇندا تاسىپ اۋرە بولمايتىن زاتتارعا اقشا جۇمساماعانىڭ ءجون. ماسەلەن، تەاتر بيلەتتەرى، مەيرامحانالار، ويىن- ساۋىق ورتالىقتارىنا بارىپ كور. مۇندا ءبارىن كورۋ كەرەك! قازىرگى جاھاندانۋ زامانىندا ءوزىڭ قالاعان زاتتى عالامتور ارقىلى دا ساتىپ الۋعا بولادى.

 8. الەمدى ءبىر ايدا اينالىپ شىعامىن دەپ اۋرەگە تۇسپەڭىز. اپتاسىنا بەس قالانى ارالاپ شىققانشا، ءبىر قالادا 4-5 كۇن ايالداعان دۇرىس. قالانى قىرسىق ايەلگە تەڭەۋگە بولادى. جان- جاقتى تانىپ، كوڭىلىن اۋلاعانشا ۋاقىت كەرەك.

 9. ساياحات - بۇل شىتىرمان وقيعالار. گەنري ميللەر ءبىر سوزىندە: "ريمگە بارىپ، سيكستينسك كاپەللاسىن كورۋدى پارىز سەزىنىپ كورگەنگە قاراعاندا، ءالى ەشكىم ەستىپ- بىلمەگەن بەيتانىس شىركەۋدى اشقان ارتىق"، - دەپ ايتقان ەكەن. ءيا، وعان دا بارۋ كەرەك، ءبىراق جاتتاندى جولدارمەن ءجۇرۋ - جاڭالىق ەمەس. ءوزىڭدى ەركىن سەزىن، ءوزىڭ ءالى بىلمەيتىن دۇنيەنى ىزدەپ تاپ، بۇل سەنىڭ ءومىرىڭدى وزگەرتۋى مۇمكىن.. .

Massaget.kz

سوڭعى جاڭالىقتار