ازيا بالالارى ويىندارى: استانالىق سپورتشى «كۇمىس» ولجالادى
كسەنيا شەۆچۋك وليمپيادالىق رەزەرۆ دايىنداۋ ورتالىعىنىڭ جانە №2 -مامانداندىرىلعان بالالار- جاسوسپىرىمدەر سپورت مەكتەبىنىڭ شاكىرتى.
ويىنداردى ۇيىمداستىرۋشىلار شاڭعى جارىسىنىڭ باعدارلاماسىنا جاڭا سايىس ءتۇرىن - «دوستىق» ەستافەتاسىن ەنگىزگەن. وندا كوماندالار كومپيۋتەردىڭ كومەگىمەن جەرەبە تاستاۋ ارقىلى ءارتۇرلى قاتىسۋشى- كوماندالاردىڭ وكىلىنەن قۇرىلادى.
«ەستافەتادا بارلىعى 20 جاساق باسەكەگە ءتۇستى. ءار كەزەڭدە سپورتشىلار 3 شاقىرىم باعىندىردى. كسەنيا ەكىنشى كەزەڭگە ءتۇستى. ول ەستافەتانى ءسىبىر فەدەرالدى وكرۋگىنىڭ سپورتشىسى ۆالەريا سموليچتەن قابىلداپ الدى. ۆ. سموليچ ءبىرىنشى ەستافەتادا 09 مينۋت 56 سەكۋند كورسەتكىشپەن كوش باستادى. ەكىنشى كەزەڭدى باعىندىرۋعا ەلوردالىق سپورتشى 11 مينۋت 35 سەكۋند جۇمساعان. ەستافەتانى ساحالين وبلىسىنىڭ شاڭعىشىسى ماريا كولوميەتس اياقتادى. ونىڭ ۋاقىتى - 11 مينۋت 16 سەكۋند. ەستافەتانىڭ ەرەجەسىنە سايكەس، جارىس قورىتىندىسى ءار كوماندانىڭ قاتىسۋشىلارىنىڭ قاشىقتىقتى باعىندىرۋعا جۇمسالعان ەڭ از ۋاقىتى بويىنشا شىعارىلدى. كسەنيا، ماريا جانە ۆالەريا، جالپى العاندا، 32 مينۋت 48 سەكۋندتا جارىستى اياقتادى»، - دەلىنگەن باسقارما حابارلاماسىندا.
اتالعان سپورتشىلار پولينا ميلۋزوۆا (ءسىبىر فەدەرالدى وكرۋگى)، داريا موروزوۆا (ساحالين وبلىسى) جانە اننا كارپەتستىڭ (قيىر شىعىس فەدەرالدى وكرۋگى) كومانداسىنان 16 سەكۋندقا قالىپ قويعان. قولا جۇلدە قازاقستان رەسپۋبليكاسىنىڭ وكىلى ايشا راكيشەۆاعا (10 مينۋت 20 سەكۋند) ماسكەۋلىك ماريا لياميناعا (10 مينۋت 47 سەكۋند) جانە ساحالين وبلىسىنىڭ سپورتشىسى اناستاسيا تكاچەنكوعا (11 مينۋت 54 سەكۋند) بۇيىردى.
ەسكە سالا كەتەيىك، بۇدان بۇرىن قازاقستاندىق شورتترەكشىلەردىڭ «ازيا بالالارىندا» التىن جانە كۇمىس جۇلدەنى جەڭىپ العانىن جازعان بولاتىنبىز.
سونىمەن قاتار بۇعان دەيىن جاس بياتلونشى ۆاديم كۋرالەس ءبىر التىن، ءبىر قولا، ال ارينا شەشۋكوۆا كۇمىس مەدالدى وڭىرىنە تاققان ەدى.
17 -اقپاندا مارەگە جەتەتىن «ازيا بالالارى» ويىندارىندا جاسى 16-دان اسپاعان سپورتشىلار ونەر كورسەتۋدە.