اكىم «نە شىقسا دا وڭتۇستىكتەن شىعادى» دەگەن تامسىلگە پىكىر ءبىلدىردى
ايماق باسشىسىنىڭ جىلدىق ەسەبىن سونداي-اق 5 مىڭعا تارتا ادام سەلەكتورلىق رەجيمدە جانە الەۋمەتتىك جەلىلەردە تىكەلەي ەفيردە تىڭداي الدى.
كوپشىلىك الدىندا بايانداما جاساعان جانسەيىت تۇيمەبايەۆ «تۇركىستان وبلىسى حالقىنىڭ ءال- اۋقاتىن ارتتىراتىن ەكونوميكالىق جۇيەمىزدىڭ دامۋ باعىتى قانداي بولماق؟ ءال-اۋقاتتى ارتتىرۋ تۇرعىندارعا قىزمەت جاسايتىن ينفراقۇرىلىمدى قالاي دامىتامىز؟ وركەنيەت زامانىندا تۇركىستان وبلىسىندا ادام كاپيتالىن زاماناۋي ۇلگىدە قالاي قالىپتاستىرامىز؟» دەگەن سۇراقتار توڭىرەگىندە وي قوزعادى. وتكەن جىلى تاريحي شەشىم قابىلدانىپ، تۇركىستان وبلىسى قۇرىلعانىنا، بۇل باسقوسۋدىڭ وبلىستىڭ جاڭا ورتالىعى - تۇركىستان قالاسىندا تۇڭعىش رەت ءوتىپ جاتقانىن اتاپ ءوتتى.
سونىمەن بىرگە، سارىاعاش جانە ماقتاارال اۋداندارىنىڭ ءبولىنىپ، كەلەس پەن جەتىساي اۋداندارىنىڭ قۇرىلۋى ەل الەۋەتىن كوتەرۋ ءۇشىن ماڭىزدى بولعانىن جەتكىزدى.
ءوڭىر باسشىسى تۇركىستان وبلىسى ەكونوميكاسىنىڭ نەگىزگى سۇيرەۋشى سالالارى ونەركاسىپ، كاسىپكەرلىك، اۋىل شارۋاشىلىعى جانە تۋريزم ەكەنىنە توقتالىپ، وسى باعىتتا اۋقىمدى جۇمىستار جۇرگىزىلەتىنىن ايتتى.
باياندامادان كەيىنگى جارىسسوزگە شىققان ازاماتتار تۇركىستاندا مەكتەپتەردى كوبەيتۋ، جاس ماماندارعا پاتەر بەرۋ، تۇركىستاننىڭ جاسىل بەلدەۋىن مولايتۋ جونىندەگى ۇسىنىستارىن ايتا كەلە، اكىم ەسەبىن وڭ باعالادى. ەسەپتىك جيىن بارىسىندا زالداعى ازاماتتار دا كوكەيدە جۇرگەن ساۋالدارىن قويىپ، قاناعاتتانارلىق جاۋاپتارىن الدى.
اتاپ ايتقاندا وبلىس تۇرعىندارىنىڭ دەنى كوممۋنالدى شارۋاشىلىق، ترانسپورت، تۇرعىن ءۇي الۋ، جۇمىسپەن قامتۋ، جول سالۋ جانە وزگە دە ماسەلەلەر توڭىرەگىندە ماسەلەلەر كوتەردى. ءاربىر سۇراقتى مۇقيات تىڭداپ، جاۋاپ بەرگەن ءوڭىر باسشىسى ايتىلعان ۇسىنىستار مەن شاعىمدار ءجىتى نازارعا الىناتىنىن ايتتى.
«ەلباسىمىزدىڭ تۇركىستان وڭىرىنە دەگەن قولداۋىن جاقسى بىلەسىزدەر. قازىر اۋقىمدى جۇمىستار ءجۇرىپ جاتىر. «نە شىقسا دا وڭتۇستىكتەن شىعادى» دەگەن تامسىلگە ۇقساس ءسوز بار. ءوڭىرىمىزدىڭ شىنايى ومىرىمەن ەتەنە تانىس ادام ول ءسوزدى وبلىس حالقىنىڭ ەڭبەكقورلىعى مەن تاپقىرلىعىنا دەگەن ريزاشىلىقپەن، سۇيىسپەنشىلىكپەن ايتادى. وسى جاسامپازدىق قۋاتتى دۇرىس ارناعا بۇرا بىلسەك، تۇركىستان وبلىسىن بىرگە تۇلەتەتىن بولامىز»، - دەدى وبلىس اكىمى.