اكتريسا قازا تاپقان جول اپاتى: سوتتالۋشى يلياس كار تۇسىنىك بەردى
سوتتا يلياس كاردىڭ تەرگەۋ بارىسىندا جول اپاتىنىڭ جاي-جاپسارىن ايتقان ۆيدەو كورسەتىلدى. سوتتالۋشىنىڭ سوزىنە قاراعاندا، ول اباي-سەيفۋللين داڭعىلدارىنىڭ قيىلىسىنداعى باعدارشامدا قىزىل ءتۇس جانعانعا دەيىن ءوتىپ كەتۋگە ارەكەت جاساعان.
«مەن ءوتىپ كەتەمىن دەپ ويلادىم، ءبىراق ۇلگەرمەي قالدىم. ول (Mitsubishi Galant - جابىرلەنۋشىنىڭ ماشيناسى) توقتاپ قالعان اۆتوبۋستىڭ ار جاعىنان شىعا كەلدى. سولاي سوقتىعىستىق. مەن ونى كورگەن جوقپىن. سودان كەيىن ماشينادان شىعىپ، وقيعا ورنىنا جۇگىرىپ باردىم. اۋدارىلعان ماشينا وڭ جاعىمەن جاتقان ەدى. ءبىز ماشينانى ورنىنا قويماقشى بولدىق. سول كەزدە الدەكىمدەر دارىگەرلەر كەلمەيىنشە ولارعا تيىسپەۋ كەرەكتىگىن ايتىپ ايعاي سالدى. مەن ەسەڭگىرەپ قالىپ ەدىم، سوندىقتان كەتىپ قالدىم. سەيفۋللين داڭعىلىمەن كەتتىم دە، ۇيلەردىڭ اراسىندا تاڭعى 8-گە دەيىن ءجۇردىم. سوسىن ماسانچي كوشەسىنە شىعىپ، «باراحولكا» جاققا كەتتىم. سول جەردە دوسىمدى كەزدەستىرىپ، سونىمەن بولدىم»، - دەدى يلياس كار تەرگەۋ كەزىندە تۇسىرىلگەن ۆيدەودا.
ول سونداي- اق تەرگەۋ بارىسىندا مەيرامحانادان كاراوكەگە دەيىن Gelandewagen-دى جۇرگىزىپ بارعانىن ايتقان.
سوت وتىرىسىندا يلياس كار كورپوراتيۆتىك كەشتە الكوگول ىشپەگەنىن قايتالاپ ايتتى.
«مەن اۋىرعاندىقتان سوڭعى التى جىلدان بەرى الكوگولدى ىشىمدىك ىشپەيمىن. مەن سۋ نەمەسە كولا ءىشتىم. شوت شامامەن 400 مىڭ بولدى»، - دەدى كار سوتتا.
سوت بارىسىندا ول كاراوكەگە دەيىن قالاي جەتكەنى تۋرالى تاعى ايتىپ بەردى. ءبىراق ونىسى الدىڭعى تۇسىنىكتەن الشاقتاۋ بولدى.
«مەن مەيرامحانادان Grand Opera كاراوكەسىنە دەيىن تاكسيمەن جەتتىم، ال ايەلىم مەن كەيبىر قىزمەتكەرلەرگە «ساۋ جۇرگىزۋشىنى» شاقىرتتىق. تەرگەۋ كەزىندە مەن مۇنى ايتقان جوقپىن. ويتكەنى اۋىر قىلمىس جاسادىم، تەرگەۋشىنىڭ مەنىڭ قايدا جانە قالاي كەتكەنىمدى بىلگەنى كەرەك دەپ ويلادىم. باستىسى، وقيعاعا سەبەپشىمىن»، - دەدى سوتتالۋشى.
ەسكە سالا كەتەيىك، قايعىلى وقيعا 2018 -جىلعى 29 -جەلتوقساندا بولعان ەدى. اباي جانە سەيفۋللين داڭعىلدارىنىڭ قيىلىسىندا Mersedes Gelаndеwagen جانە Mitsubishi Galant كولىكتەرى سوقتىعىسقان بولاتىن. Mersedes Gelаndеwagen باعدارشامنىڭ قىزىل تۇسىنە ءوتىپ كەتكەن. جول اپاتىنان 3 ادام - Mitsubishi Galant جۇرگىزۋشىسى مەن ەكى جولاۋشى كوز جۇمدى. سونىڭ ءبىرى - بەلگىلى اكتريسا شولپان ەلگەزەك.
جانتۇرشىگەرلىك جول اپاتىنان امان قالعان اكتريسا ايزادا ساتىبالديەۆا اۋرۋحانادان 1 -اقپاندا شىقتى.
جول اپاتىنىڭ ەگجەي-تەگجەيىن بولعان وقيعانى كوزىمەن كورگەن كۋاگەرلەر ايتىپ بەردى.
تەرگەۋ بارىسىندا، سوتتالۋشىنىڭ جول اپاتىن جاساعان كەزدە ماس بولعانى انىقتالعان بولاتىن.
34 جاستاعى بيزنەسمەن يلياس كاردىڭ ىسىنە قاتىستى سوت وتىرىسى 12 -اقپاندا باستالدى.
اۆتورى: مايا تەڭىزبايەۆا