قۇرساقتاعى سابيدەن جەريتىن ايەلدەر قاي وڭىردە كوپ

استانا. قازاقپارات - سولتۇستىك قازاقستان مەن استانا قالاسىندا ايەلدەر ءجيى تۇسىك جاساتادى. بۇل تۋرالى بۇگىن ق ر دەنساۋلىق ساقتاۋ ۆيتسە-ءمينيسترى ءلاززات اقتايەۆا ايتتى، دەپ حابارلايدى قازاقپارات ءتىلشىسى.

«وتكەن جىلى بالا تۋۋ جاسىنا جەتكەن 1000 ايەلدىڭ 91 ى بوسانسا، بالا تۋاتىن جاستاعى 1000 ايەلدىڭ 15 ى تۇسىك جاساتقان. وسىعان بايلانىستى كەزدەيسوق جۇكتىلىكتىڭ الدىن الۋ ماسەلەسى بارىنشا وزەكتى»، - دەدى ول ق ر دەنساۋلىق ساقتاۋ مينيسترلىگىنىڭ كەڭەيتىلگەن القا ماجىلىسىندە.

ونىڭ ايتۋىنشا، ەلىمىزدە بالا تۋۋعا قابىلەتتى جاستاعى ايەلدەردىڭ 38 پايىزى كەزدەيسوق جۇكتىلىكتەن قورعالعان. وسى رەتتە ول جۇكتى بولۋعا قارسىلىعى بار ايەلدەرگە دارىگەرلەر تاراپىنان كونتراتسەپتيۆتى پرەپاراتتار بەرىلەتىنىن ايتتى.

«دەگەنمەن، وتكەن جىلى جۇكتى بولۋعا كەرى كورسەتىلىمى بار 3045 ايەل جىنىستان تىس اۋىر اۋرۋلار ەسەبىنە الىندى»، - دەدى ول.

ل. اقتايەۆانىڭ دەرەگىنشە، قوستاناي مەن ماڭعىستاۋ وبلىستارى جۇكتىلىككە قارسى پرەپاراتتارمەن از قامتىلعان. ال باتىس قازاقستان مەن قاراعاندى وبلىستارى مۇنداي پرەپاراتتاردى ساتىپ الۋعا مۇلدەم از قاراجات بولگەن.

«ەڭ جوعارى تۇسىك جيىلىگى سولتۇستىك قازاقستان وبلىسى مەن استانا قالاسىندا»، - دەدى ۆيتسە- مينيستر.

ءلاززات اقتايەۆا سونداي-اق قازاقستاندا انا ءولىم-جىتىمىنە سەبەپ بولاتىن جايتتاردى اتادى.

ايتا كەتەيىك، بۇگىنگى القا ماجىلىسىندە ق ر دەنساۋلىق ساقتاۋ ءمينيسترى ەلجان ءبىرتانوۆ ناۋقاستى اۋرۋحاناعا جاتقىزۋداعى بىلىقتاردى اشىق ايتىپ بەردى. جيىندا قازاقستاندىق دارىگەرلەردىڭ ورتاشا جالاقىسى دا ايتىلدى.

سونداي-اق ۆەدومستۆو باسشىسىنىڭ پىكىرىنشە، وڭىرلەردە دارىگەرلەر تاپشىلىعىن جويۋ جەرگىلىكتى اتقارۋشى ورگانداردىڭ جۇمىسى.

ءمالىم بولعانداي، ەلىمىزدە ەمحاناعا تىركەلمەگەن 1,4 ميلليونعا جۋىق ادام بار.

جيىن سوڭىندا ماجىلىسكە جينالعان دەنساۋلىق سالاسىنىڭ باسشىلارى، ماماندار ورىندارىنان تۇرىپ، بي بيلەدى.