دەنساۋلىق ساقتاۋ ءمينيسترى دارىگەرلەردىڭ ورتاشا جالاقىسىن ايتتى
بۇل تۋرالى بۇگىن ق ر دەنساۋلىق ساقتاۋ مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى ەلجان ءبىرتانوۆ ايتتى، دەپ حابارلايدى قازاقپارات ءتىلشىسى.
«جالاقىعا قاتىستى ايتار بولسام، ايلىقتىڭ ءوسۋ قارقىنىن بايقاپ وتىرمىز. وتكەن جىلدىڭ سوڭىندا تىڭعىلىقتى ساراپتاما جۇرگىزىپ، بارلىق دەرلىك مەملەكەتتىك ۇيىمداردان كىم قانشا اقشانى ناقتى قولىنا الاتىندىعى تۋرالى مالىمەتتەر جينادىق. 2018 -جىلى دارىگەرلەردىڭ ناقتى قولىنا تيەتىن ورتاشا جالاقىسى 142 مىڭ تەڭگەنى قۇرادى. جىل سايىن دارىگەرلەردىڭ دە، مەدبيكەلەردىڭ دە جالاقىسىندا ازداعان ءوسىم بار»، - دەدى مينيستر.
ونىڭ ايتۋىنشا، دارىگەرلەردىڭ ىشىندە العاشقى شۇعىل مەديتسينالىق كومەك كورسەتەتىن مامانداردىڭ جالاقىسى جوعارى.
«ءبىز بۇعان قول جەتكىزۋگە تىرىسقان ەدىك، الداعى ۋاقىتتا دا تىرىسا بەرەمىز. العاشقى شۇعىل مەديتسينالىق كومەك قىزمەتكەرلەرىنىڭ جالاقىسى ەڭ جوعارى بولۋى ءتيىس دەپ ەسەپتەيمىز جانە دەنساۋلىق ساقتاۋ جۇيەسىندەگى ولاردىڭ ءرولى بارىنشا بەلسەندى بولۋى قاجەت»، - دەدى ە. ءبىرتانوۆ.