مۇحتار تايجان: اۋىل شارۋاشىلىعى جەرىن جالعا بەرۋ تەتىگىن وزگەرتۋ كەرەك

استانا. قازاقپارات - پارلامەنت ماجىلىسىندە ۇكىمەتتىك ەمەس ۇيىمداردىڭ، قوعامدىق ۇيىمداردىڭ وكىلدەرى اۋىل شارۋاشىلىعى جەرلەرىن ءتيىمدى پايدالانۋ ماسەلەسى بويىنشا ءوز ۇسىنىستارىن ءبىلدىردى، دەپ حابارلايدى قازاقپارات ءتىلشىسى.

ايتا كەتسەك، پارلامەنت ماجىلىسىندە قازىرگى ۋاقىتتا «جەر رەسۋرستارىن ءتيىمدى پايدالانۋدىڭ وزەكتى ماسەلەلەرى» اتتى دوڭگەلەك ۇستەل ءوتىپ جاتىر.

بولاتحان تايجان اتىنداعى قوردىڭ پرەزيدەنتى، جەر رەفورماسى بويىنشا كوميسسيا مۇشەسى مۇحتار تايجان جەر رەسۋرستارىن ءتيىمدى پايدالانۋ ماسەلەلەرى بويىنشا بىرنەشە ۇسىنىس ءبىلدىردى. ونىڭ ايتۋىنشا، جەر بويىنشا مەملەكەتتىك مەنشىكتى ساقتاي وتىرىپ، جالعا بەرۋ نارىعىن دامىتۋ ماڭىزدى. مۇحتار تايجان اتاپ وتكەندەي، جەردىڭ جال نارىعى تەك قانا قازاقستان ازاماتتارى اراسىندا جانە 100 پايىز قازاقستاندىق فيرمالاردىڭ اراسىندا بولۋى ءتيىس. نارىق اشىق ءارى ەلەكتروندى بولۋى كەرەك.

«ءبىزدىڭ ۇسىنىسىمىز - ءبىرىڭعاي اگرارلىق سالىقتى ەنگىزۋ. ول نە دەگەن ءسوز. بۇگىنگى تاڭدا ەگەر مەن جەرمەن اينالىسپاسام، مەن جەردىڭ سالىعىن تولەمەيمىن. ياعني، جەر بوس جاتا بەرەدى. ال ەگەر مەن جۇمىس جاساي بەرسەم، ماعان قوسىمشا 7-8 سالىق قوسىلادى. سوندا ماعان جەرمەن اينالىسۋ، جەرمەن جۇمىس ىستەۋ ءتيىمدى دە ەمەس. ءبىز بۇنى وزگەرتۋىمىز كەرەك دەپ ەسەپتەيمىن. جەردى جالعا الدىڭ با - سول جىلدان باستاپ، سەن ءبىرىڭعاي سالىقتى تولەۋىڭ كەرەك. ياعني، ساعان جەرمەن اينالىسپاۋ ءتيىمدى بولمايدى. ال ەگەر جۇمىس ىستەي بەرسەڭ، سالىقتى وڭاي تولەۋگە بولادى. بۇل جەردە جەمقورلىققا دا جول بەرمەيمىز. سەبەبى، سالىقتى ساناۋ وتە وڭاي. ەشقانداي ەسەپشى دە كەرەك ەمەس. سول سەبەپتى، ءبىزدىڭ نەگىزگى ۇسىنىستارىمىزدىڭ ءبىرى - ءبىرىڭعاي اگرارلىق سالىقتى ەنگىزۋ»، - دەدى ول.

سونىمەن بىرگە، دوڭگەلەك ۇستەل بارىسىندا جەردى پايدالانۋ پروتسەستەرى بويىنشا قاتاڭ باقىلاۋ ورناتۋ ءۇشىن عارىشتىق مونيتورينگ جۇيەسىن زاڭداستىرۋ كەرەك.

مۇحتار تايجاننىڭ ايتۋىنشا، بانك كەپىلدىگىنەن اۋىل شارۋاشىلىعى جەرلەرىن اشىپ شىعۋ بويىنشا زاڭنامالىق شەشىمدەردى تابۋ كەرەك.