قازاقستاننىڭ قاي وڭىرلەرىندە جاسوسپىرىمدەر قىلمىسى ءورشىپ تۇر

استانا. قازاقپارات - ق ر ءبىلىم جانە عىلىم مينيسترلىگى بالالار مەن جاسوسپىرىمدەر قىلمىسى تۋرالى سانايعاقتاردى جاريالادى، دەپ حابارلايدى قازاقپارات ءتىلشىسى.

«بۇگىندە كامەلەت جاسىنا تولماعان 5 مىڭنان استام قازاقستاندىق ەسەپتە تۇر. جاسوسپىرىمدەر اراسىنداعى قىلمىس الماتىدا - %33,5،  قىزىلوردا، ماڭعىستاۋ وبلىستارى مەن استانادا - %18، اقمولا مەن اقتوبە وبلىستارىندا - %11، تۇركىستان وبلىسىندا - %7,8 كوبەيگەن. ارتى ولىمگە ۇلاسقان مەكتەپ وقۋشىلارىنىڭ توبەلەسىن، ءبىرىن-ءبىرى كەمسىتۋىن بۇكىل ەل كوردى. ءبىر عانا اقتوبە وبلىسىندا ءۇش وقيعا تىركەلدى، شىمكەنت كوللەدجىنىڭ ستۋدەنت قىزدارى وقۋشى قىزداردى توناعانى ءۇشىن ۇستالدى، تۇركىستان وبلىسىنداعى بالالار سىنىپتاسىن قاتىگەزدىكپەن ساباعان. وتكەن جىلى بۇل وبلىستا 20 بالادان اقشا جيناعان جاس ءوسپىرىم ۇستالدى، بالالاردىڭ بىرەۋى وزىنە قول جۇمساعان. قاراعاندىدا پيسسەرياداعى ورىنعا تالاسقان بالالار توبەلەس شىعارعان»، - دەدى بالالار قۇقىعىن قورعاۋ بويىنشا ق ر ءبىلىم جانە عىلىم ءمينيسترىنىڭ كەڭەسشىسى رايسا شەر ق ر ب ع م القاسىنىڭ كەڭەيتىلگەن وتىرىسىندا.

ونىڭ ايتۋىنشا، 2018 -جىلى بالالارعا قاتىستى قىلمىستار سانى ەكى مىڭنان استى. تۇركىستان (207)، اقتوبە (187)، سولتۇستىك قازاقستان (59) وبلىستارىندا جانە شىمكەنت (2017 -جىلى - 122، 2018 -جىلى - 166)، استانا (2017 -جىلى - 72، 2018 -جىلى - 84) قالالارىندا بالالارعا قاتىستى قىلمىستىڭ ءورشۋى بايقالادى.

«وتكەن جىلى پرەزيدەنت تاپسىرماسىمەن بالالاردىڭ ءال-اۋقاتى يندەكسى جۇرگىزىلدى. ەڭ تومەنگى يندەكستەر قوستاناي (%0,60)، اقمولا (%0,65) جانە الماتى (%0,68) وبلىستارىندا تىركەلگەن. ال قاۋىپسىزدىك يندەكسى جالپى قازاقستان بويىنشا 0,7 پروتسەنتتى كورسەتكەن»، - دەدى كەڭەسشى.

مينيسترلىك كەلتىرگەن دەرەكتەرگە سايكەس، بۇگىندە ءبىلىم بەرۋ ۇيىمدارىندا ەكى مىڭنان استام مەكتەپ ينسپەكتورى مەن 7 مىڭنان استام پسيحولوگ جۇمىس ىستەيدى. ودان بولەك، 4 مىڭعا جۋىق الەۋمەتتىك پەداگوگ بار.