ەلباسى حالىقارالىق سپورت سايىستارىنىڭ جەڭىمپازدارىمەن كەزدەستى
باسقوسۋعا ۇلتتىق وليمپيادا كوميتەتىنىڭ پرەزيدەنتى ت. قۇلىبايەۆ، مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى س. ساپيەۆ، فريستايل-موگۋلدان ەڭبەگى سىڭگەن سپورت شەبەرى يۋ. گالىشەۆا، كاسىبي بوكسشى س. احمەدوۆ، مانەرلەپ سىرعاناۋدان حالىقارالىق دارەجەدەگى سپورت شەبەرى ە. تۇرسىنبايەۆا، شاڭعىمەن ترامپليننەن سەكىرۋ سپورتىنان حالىقارالىق دارەجەدەگى سپورت شەبەرى س. تكاچەنكو قاتىستى.
مەملەكەت باسشىسى ەلىمىزدىڭ سپورت سالاسىن دامىتۋعا جانە حالىقارالىق ارەنادا قازاقستاننىڭ ءيميدجىن ىلگەرىلەتۋگە ۇلەس قوسقان جاس شەبەرلەردىڭ ەڭبەكتەرىن ەرەكشە اتاپ ءوتتى.
- مەن سىزدەرمەن جۇزدەسكەنىمە قۋانىشتىمىن. وسى جىل «جاستار جىلى» دەپ جاريالاندى. ال سپورت، نەگىزىنەن، - جاستاردىڭ ءىسى. مەملەكەت بۇل سالانى دامىتۋعا باسا ءمان بەرەدى. سىزدەرگە قاراپ جاستارىمىز سپورتپەن شۇعىلدانۋعا جانە سالاماتتى ءومىر سالتىن ۇستانۋعا ۇمتىلادى. سىزدەردىڭ جەتىستىكتەرىڭىز مەملەكەتتىڭ بەدەلىن ارتتىرۋعا سەپتىگىن تيگىزەدى، - دەدى قازاقستان پرەزيدەنتى.
جاس سپورتشىلار حالىقارالىق جارىستاردا كورسەتكەن ونەرىن، العان اسەرلەرى جونىندە وي ءبولىسىپ، كەلەشەك جوسپارلارى تۋرالى ايتتى.
- مەن قازاقستان جاستارىن ءاردايىم سپورتپەن شۇعىلدانۋعا شاقىرامىن. بارلىق وبلىستاردا زاماناۋي سپورت ينفراقۇرىلىمى بار. ستاديوندار سالىنىپ، جابىق كەشەندەر بوي كوتەردى. سپورت - دەنساۋلىق پەن ۇزاق ءومىر ءسۇرۋدىڭ كەپىلى، - دەدى نۇرسۇلتان نازاربايەۆ.
مەملەكەت باسشىسى جاس سپورتشىلاردىڭ كاسىبي تۇرعىدان ودان ءارى ءوسۋىنىڭ پەرسپەكتيۆالارىنا نازار اۋداردى.
- باعىندىراتىن بيىكتەرىڭىز ءالى الدا ەكەنىن كورىپ وتىرمىن. الەمدىك جارىستان مەدال الۋ وڭاي ەمەس. جاستاردىڭ سىزدەرگە قاراپ بوي تۇزەپ، دەندەرى ساۋ، مىقتى بولىپ وسكەنىن قالايمىن، - دەدى قازاقستان پرەزيدەنتى.
سوڭىندا نۇرسۇلتان نازاربايەۆ اتلەتتەردى قول جەتكىزگەن جەتىستىكتەرىمەن توقتاپ قالماي، جاڭا تابىستارعا جەتە بەرۋگە شاقىردى.
كەزدەسۋدە جاس سپورتشىلارعا قازاقستان پرەزيدەنتىنىڭ اتىنان ەستەلىك سىيلىقتار تابىس ەتىلدى.
