باستىقتاردىڭ كابينەتتەرىن كىشىرەيتۋ اكسياسى قاي مەكەمەلەردە جالعاسادى

  استانا. قازاقپارات - ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى «جاڭا فورمات» اكسياسىن مەكتەپتەردى تەكسەرۋدەن باستادى.

اكسيانىڭ نەگىزگى ماقساتى - باستىقتاردىڭ كابينەتتەرىن وڭتايلاندىرىپ، بيۋدجەت شىعىندارىن بارىنشا قىسقارتۋ، دەپ حابارلايدى قازاقپارات ءتىلشىسى.

 استانا قالالىق دەپارتامەنتىنىڭ باسشىسى جازيرا جىلقىشيەۆانىڭ ايتۋىنشا، مەكتەپتەردەن كەيىن مەديتسينا مەكەمەلەرى تەكسەرىلەدى.

 «ءبىز بۇل اكسيانى جايدان- جاي باستاعان جوقپىز. بۇگىندە مەملەكەتتىك مەكەمە باسشىلارى ءۇشىنشى- ءتورتىنشى قاباتتا كەرەمەت ۇلكەن كابينەتتەردە وتىرادى. مىسالى، استانادا وقۋشىلار كوپ. ال ديرەكتوردىڭ كابينەتىن بوساتۋدىڭ ارقاسىندا قوسىمشا سىنىپتاردى اشۋعا مۇمكىندىك بار. قوسىمشا ءبىلىم بەرۋ، روبوتوتەحنيكا، شىعارماشىلىق شىڭداۋ سياقتى سىنىپتاردى اشۋعا بولادى. ول ءۇشىن قوسىمشا عيمارات تا سالۋدىڭ قاجەتى جوق. ديرەكتور كابينەتىن بوساتىپ بەرسە بولدى. ونىمەن جالاقىسى ازايمايدى، قىزمەتى دە تومەندەمەيدى. ەندىگى كەزەكتە ءبىز ەمحانا باسشىلارىنىڭ كابينەتتەرىن تەكسەرەمىز. بىلتىر ءبىز ءبىراز جۇمىس جاسادىق. وسى جولى ءبىرىنشى باسشىلاردى دا تومەن ءتۇسىرىپ، حالىققا جاقىن وتىرعىزاتىن بولامىز» ، - دەدى ج. جىلقىشيەۆا قازاقپارات تىلشىسىنە بەرگەن سۇحباتىندا.

 ايتا كەتەيىك، اكسيا اياسىندا مەكتەپ ديرەكتورلارىنىڭ كابينەتتەرى تىم ۇلكەن ەكەنى انىقتالدى. مىسالى، 90 شارشى مەتردى قۇرايتىن قابىلداۋ، تىنىعۋ جانە قوناقتارمەن كەزدەسۋ بولمەلەرى بار. وعان قوسا، ەسەپ- قيساپ پەن كادر بولىمدەرىنىڭ كەڭ كابينەتتەرى كەزدەستى.

 «نەگىزى، زاڭ بويىنشا مەكتەپ باسشىلىعىنىڭ كابينەتى 32 شارشى مەتر بولۋى كەرەك. ال قابىلداۋ ءبولىمى 12 شارشى مەتردە ورنالاسۋى شارت. استانا مەكتەپتەرىندە اتالعان نورمالار ساقتالمايدى. ماسەلەن، 54- مەكتەپ- ليسەيدە ديرەكتور 90 شارشى مەتردى قامتيتىن جۇمىس، دەمالىس جانە قابىلداۋ بولىمدەرىن بوساتىپ بەردى. ءقازىر ول جەردە مۇعالىمدەرگە ارنالعان جۇمىس بولمەسى ورنالاستى. ديرەكتوردىڭ جاڭا كابينەتى 13 شارشى مەتر بولدى. سول سياقتى 17- مەكتەپ- ديرەكتورىنىڭ كابينەتى 40 شارشى مەتر بولسا، قازىر ول ءبىرىنشى قاباتقا اۋىستىرىلدى. بۇرىنعى كابينەتتە وقۋشىلار روبوتوتەحنيكا جانە شىعارماشىلىق شىڭداۋ بويىنشا ءبىلىم الۋدا» ، - دەيدى ج. جىلقىشيەۆا.

 ونىڭ سوزىنە قاراعاندا، 80- مەكتەپ- گيمنازياسىنىڭ ديرەكتورى دا جاڭا اكتسيانى قولدادى. ول 53 شارشى مەتردى بوساتىپ بەردى. قازىر ول جەردە قوسىمشا ساباقتار ءوتىپ جاتىر. 71- مەكتەپ- ليسەيى دە سولاي. ديرەكتورى 50 شارشى مەتردى بوساتىپ، ءبىرىنشى قاباتقا كوشتى.

 «بۇگىندە اتالعان مەكتەپتەردىڭ باسشىلىعى استىندا وتىرىپ، ءبارىن كورىپ وتىرادى. وقۋشىلاردىڭ كىرگەنىن- شىققانىن جانە باسقا دا جاعدايلاردى باقىلاۋعا مۇمكىندىك بار. اتا- انالار شۋ شىعارسا، ونى دا كورە الادى. حالىققا جاقىن بولۋ دەگەن وسى. «وسىنى وزدەرىڭىز ويلامادىڭىز با؟ » دەپ سۇراساق، جوق دەيدى» ، - دەپ اتاپ كورسەتتى ج. جىلقىشيەۆا.