مەملەكەتتىك قىزمەتشىلەر دۋبايدا ءبىلىم الاتىن بولدى

None
None
استانا. قازاقپارات - دۋبايداعى WGS-2019 جاھاندىق ءسامميتىنىڭ الاڭىندا ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسى مۋحاممەد بەن راشيد ال ماكتۋم اتىنداعى مەملەكەتتىك باسقارۋ مەكتەبى جانە امىرلىكتىڭ ديپلوماتيا اكادەمياسىمەن ءوزارا ءىس- قيمىلدى كەڭەيتۋ تۋرالى ۋاعدالاستىققا قول جەتكىزدى.

قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى ارىپتەستىك قاتىناستاردى حالىقارالىق ىنتىماقتاستىق تۋرالى جاڭا ۋاعدالاستىقتارمەن نىعايتا وتىرىپ، ونى بۇكىل الەم بويىنشا دامىتۋدا.

كەزدەسۋ بارىسىندا دۋباي مەملەكەتتىك باسقارۋ مەكتەبىنىڭ اتقارۋشى پرەزيدەنتى، د- ر الي سەباا ال مارري ەكىجاقتى ىنتىماقتاستىقتىڭ ناتيجەلىلىگىن اتاپ ءوتتى، سونداي- اق تاعىلىمداما جانە اكادەميالىق موبيلدىلىكتى ۇيىمداستىرۋ بويىنشا العا قويىلعان ماقساتتاردىڭ ورىندالاتىندىعىن راستادى.

سونىمەن قاتار، د- ر الي سەباا ال مارري اكادەميامەن ءوزارا ءىس- قيمىلدى كەڭەيتۋگە دايىندىعىن ءبىلدىردى. اكادەميا رەكتورى فاتيما جاقىپوۆانىڭ ايتۋىنشا، جۋىق ارادا دۋبايدا قازاقستاندىق مەملەكەتتىك قىزمەتشىلەردى وقىتۋ باعدارلاماسى ىسكە قوسىلادى. مەملەكەتتىك ورگانداردىڭ قىزمەتىنە حالىقتىڭ قاناعاتتانۋىن ارتتىرۋ، ءتيىمدى كوممۋنيكاتسيالار، سيفرلاندىرۋ مەن جاساندى ينتەللەكتىنىڭ يننوۆاتسيالىق قۇرالدارىن ەنگىزۋ بويىنشا دۋباي تاجىريبەسىن زەرتتەۋ جانە ءارى قاراي تاراتۋ باعدارلاماعا نەگىز بولادى. وقۋ قورىتىندىلارى بويىنشا ق ر مەملەكەتتىك ورگاندارىنىڭ قىزمەتىن ترانسفورماتسيالاۋ مەن مەملەكەتتىك قىزمەتشىلەر جۇمىسىنا اقىلدى تەحنولوگيالاردى ەنگىزۋ كۇتىلەدى. باعدارلاما شەڭبەرىندە دۋبايدىڭ مەملەكەتتىك ورگاندارىندا وقۋ دارىستەرى ۇيىمداستىرىلاتىن بولادى. ءبىر اپتا ىشىندە ق ر- نىڭ 20-25 مەملەكەتتىك قىزمەتشىسىن وقىتۋ الدىن الا جوسپارلانۋدا.

 بۇدان باسقا، امىرلىكتىڭ ديپلوماتيالىق اكادەمياسىنىڭ باس ديرەكتورى بەرناردينو لەونمەن كەزدەسۋ بارىسىندا قوس تاراپ تا امىرلىكتىڭ ديپلوماتيالىق اكادەمياسىندا قازاقستاندىق اكادەميا ماگيسترانتتارىنىڭ تاعىلىمدامادان ءوتۋ جانە ب ا ءا تاجىريبەسىن ەسكەرە وتىرىپ، ق ر ديپلوماتتارى ءۇشىن بىرلەسكەن بىلىكتىلىكتى ارتتىرۋ باعدارلاماسىن ازىرلەۋ مۇمكىندىگىن راستادى.

ق ر پرەزيدەنتىنىڭ جانىنداعى مەملەكەتتىك باسقارۋ اكادەمياسىنىڭ باستى باسىمدىقتارىنىڭ ءبىرى مەملەكەتتىك باسقارۋ سالاسىندا ءبىلىم بەرۋدىڭ حالىقارالىق ستاندارتتارى بويىنشا دايارلانعان ءارى مەملەكەتتىك قىزمەتتە جاڭا يدەيالار مەن تاسىلدەردى ىزدەستىرۋگە دايىن مەملەكەتتىك قىزمەتشىلەر پۋلىن قالىپتاستىرۋ بولىپ تابىلادى.

سوڭعى جاڭالىقتار