تۇركىستان وبلىسىندا جەتىمدەر ءۇيى تولىقتاي جابىلادى

 تۇركىستان. قازاقپارات - تۇركىستان وبلىسىندا بالالار ءۇيى وتباسى فورماتىنا كوشىپ، جەتىمدەر ءۇيى تولىقتاي جابىلادى. بۇل تۋرالى بۇگىن وبلىس اكىمى جانسەيىت تۇيمەبايەۆ مالىمدەدى. وبلىس باسشىسى جاستار جىلىندا ەلباسى وتباسى ينستيتۋتى مەن قۇندىلىقتارىن دامىتۋعا ەرەكشە نازار اۋدارعانىن اتاپ ءوتتى، دەپ حابارلايدى قازاقپارات ءتىلشىسى.

«ءداستۇرلى وتباسى قۇندىلىقتارى ساقتالعان تۇركىستان وبلىسىنداعى كوپبالالى وتباسىلار ۇلتتىق دەموگرافياعا ايتۋلى ۇلەس قوسىپ كەلەدى. قازىر وبلىستا 130 مىڭنان استام كوپبالالى وتباسى بار. ولاردىڭ ىشىندە  16500 وتباسىعا 27 نەمەسە 100 مىڭ ادامعا اتاۋلى الەۋمەتتىك كومەك كورسەتىلەدى. بيىل كوپبالالى وتباسىلارىنداعى جۇمىسسىز اتا- انالاردىڭ جۇمىس تابۋىنا، بالالارعا ەڭبەك نارىعىندا باسەكەگە قابىلەتتى بولۋى ءۇشىن قاجەتتى تەحنيكالىق جانە كاسىبي ءبىلىم بەرۋ ماقساتىندا ارناۋلى كومەك كورسەتۋدى كوزدەيتىن "قولعابىس" جوبالار كەشەنىن جۇزەگە اسىرامىز. اتاپ ايتقاندا، 2019 -جىلى وبلىستا "ەڭبەك جانە ناتيجەلى جۇمىسپەن قامتۋ" باعدارلاماسى شەڭبەرىندە 3,3 ميلليارد تەڭگەگە 3700 دەن استام بالاعا تەحنيكالىق جانە كاسىبي ءبىلىم گرانتى بەرىلەدى. ونىڭ ىشىندە كوپبالالى وتباسىدان شىققان بالالارعا باسىمدىق بەرىلەدى» ، - دەدى جانسەيىت قانسەيىت ۇلى.

ايماق باسشىسىنىڭ سوزىنشە، وبلىستاعى ازاماتتاردى الەۋمەتتىك تۇرعىدا دەمەۋ ءۇشىن اتقارىلعان جۇمىستار مۇنىمەن شەكتەلمەيدى.

ماسەلەن، «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان مەملەكەتتىك باعدارلاماسى» اياسىندا وتكەن جىلى  69682 ادام قامتىلىپ، جىلدىق جوسپار 10,1 پايىزعا ارتىعىمەن ورىندالعان.

اتاپ ايتقاندا،  1160 ادام 6,2 ميلليارد تەڭگەگە جەڭىلدەتىلگەن پايىزبەن شاعىن نەسيە السا،  44097  ازامات جۇمىسقا ورنالاستى. قىسقا مەرزىمدى كاسىبي وقۋعا  5440 ادام جولدانىپ،  4117 ادام تۇراقتى جۇمىسپەن قامتىلدى. الەۋمەتتىك جۇمىس ورىندارىنا  4529 ادام جولدانىپ، ونىڭ  2818 تۇراقتى جۇمىسقا ورنالاستىرىلدى. جاستار پراكتيكاسىنا 4305 ادام جولداندى. اۋىلدىق جەرلەردە ءبىرىنشى كەزەكتە قاجەت ماماندىقتاردى وقىتۋ ماقساتىندا «ءار اۋىلعا ءوز شەبەرى» جوباسى ىسكە اسىرىلۋدا. 2558 ازامات 24 بىلىكتىلىك نەگىزىندە وقۋعا جولداندى. جالپى جىل باسىنان  31000 جاڭا جۇمىس ورنى اشىلدى.