داۋرەن ابايەۆ: قازاقستان بيۋجەتىنىڭ جارتىسى الەۋمەتتىك سالالارعا جۇمسالادى

استانا. قازاقپارات - پرەمەر-ءمينيستردىڭ ورىنباسارى ەربولات دوسايەۆ حالىقتىڭ تۇرمىس ساپاسى مەن تابىسىن ارتتىرۋ بويىنشا جۇمىس توبىنىڭ وتىرىسىندا جۇزەگە اسىرىلاتىن شىنايى شارالاردىڭ كونتۋرىن سىزىپ بەردى.

حابار ارناسىنداعى «اشىق ديالوگ» باعدارلاماسىندا قوناقتا بولعان اقپارات جانە كوممۋنيكاتسيالار ءمينيسترى داۋرەن ابايەۆ وسىلاي دەدى، دەپ حابارلايدى قازاقپارات.

«ەربولات اسقاربەك ۇلى (دوسايەۆ - اۆت.) جۇمىس توبىنىڭ وتىرىسىن وتكىزىپ، جۇزەگە اسىرىلاتىن شىنايى شارالاردىڭ كونتۋرىن سىزىپ بەردى. ەڭ الدىمەن، مەكەنجاي بويىنشا الەۋمەتتىك كومەك الۋ كەزىندەگى بيۋروكراتيالىق پروتسەدۋرالاردى جەڭىلدەتۋ ماسەلەسى ايتىلدى. دەمەك، قاعاز جۇمىستارىنىڭ قاتارى ازايادى. جۇمىس توبى مەملەكەتتىڭ قولداۋىنا مۇقتاج كوپبالالى وتباسىلارعا جاردەماقى تولەۋ مەحانيزمىن جەتىلدىرۋدى قاراستىرادى. مەنىڭ ويىمشا، قوعام تاراپى 2020-جىلدان باستاپ الەۋمەتتىك تولەمنىڭ مولشەرىن ارتتىرۋ تۋرالى زاڭ جوباسى ازىرلەنگەنىن جىلى قابىلدار دەگەن ويدامىن. بۇل تەك اتقارىلاتىن جۇمىستىڭ جارتىسى عانا»، - دەدى داۋرەن ابايەۆ.

ءمينيستردىڭ ايتۋىنا قاراعاندا، جۇمىس توبى كوپبالالى انالارمەن كەزدەسۋ كەزىندە اكىمدىكتەر جيناعان بارلىق ۇسىنىستار بويىنشا جۇمىس جۇرگىزەدى.

«مەملەكەت ەشقانداي جۇمىس جاساماي جاتىر دەپ ويلاۋ ءجون ەمەس. بىزدە شامامەن بيۋجەتتىڭ جارتىسى الەۋمەتتىك سالاعا جۇمىلدىرىلادى. ناقتىراق ايتقاندا، الەۋمەتتىك قورعاۋ سالاسىنا بيۋجەتتىڭ 28 پايىزى جۇمسالىپ وتىر. البەتتە، بارلىق تولەمدەر ءبىر ۋاقىتتا ءوسىپ كەتسە دەپ ءبارى تىلەيدى. ءبىراق، بۇل شارۋالاردىڭ ءبارى دە بيۋجەتتىڭ شاماسىنا قاراي شەشىلەتىنىن ەسكەرۋ كەرەك. مەملەكەت ورىنداپ وتىرعان الەۋمەتتىك مىندەتتەمەلەر شوعىرى وتە اۋقىمدى. زەينەتاقى تولەمدەرى، مۇگەدەكتەرگە ارنالعان تولەم، از قامتىلعان وتباسىلاردى قولداۋ، تەگىن مەديتسينالىق كومەك، قىمبات تۇراتىن وتالارعا بەرىلەتىن جەڭىلدىك، كاسىبىن جاڭادان باستاپ جاتقان كاسىپكەرلەرگە كومەك، ءبىلىم گرانتتارى مەن اۋىل شارۋاشىلىعى سۋبسيديالارى - وسى ءتىزىمدى جالعاستىرا بەرۋگە بولادى»، - دەدى داۋرەن ابايەۆ.

ەسكە سالا كەتسەك، بۇگىن ازاماتتاردىڭ تۇرمىس ساپاسى مەن تابىسىن ارتتىرۋ، سونىمەن بىرگە كوپبالالى وتباسىلاردى قولداۋ شارالارىن كۇشەيتۋ بويىنشا جۇمىس توبىنىڭ وتىرىسىندا ق ر پرەمەر-ءمينيسترىنىڭ ورىنباسارى ەربولات دوسايەۆ ءوز ۇسىنىستارىن ايتقان بولاتىن.