وبىر دەرتىنە ايەلدەرگە قاراعاندا ەرلەر كوپ شالدىعادى
ونىڭ 50,1 پايىزى - ەرلەردىڭ ۇلەسىندە، دەپ حابارلايدى قازاقپارات ءتىلشىسى «الەۋمەتتىك مەديتسينالىق ساقتاندىرۋ قورىنا» سىلتەمە جاساپ.
ۆەدومستۆونىڭ مالىمەتىنشە، سوڭعى بىرنەشە جىل بويى وبىر دەرتى كوش باستاپ تۇر. 2018-جىلى وبىر دەرتىنە شالدىعۋ بويىنشا - 258، ءسۇت بەزى وبىرى - 229 جانە اسقازان وبىرى بويىنشا 149 وقيعا تىركەلدى. بۇدان كەيىن تەرى جانە توق ىشەك وبىرى ءجيى كەزدەسەدى.
ال، ەرلەر اراسىندا وبىر دەرتىنە شالدىعۋ بويىنشا - 205 وقيعا، اسقازان وبىرى - 109 فاكتى تىركەلدى. بۇدان كەيىن ەركەكتىك بەز، تەرى جانە اس قورىتۋ ىسىگى دە ءجيى كەزدەسەدى.
«كەۋدە حيرۋريگياسى بولىمشەسى جىلىنا شامامەن 300 وتا جاسايدى. وكپە وبىرى ءبىزدىڭ وبلىستا عانا ەمەس، رەسپۋبليكا جانە دۇنيەجۇزى بويىنشا كوش باستاپ تۇر. مۇنىڭ باستى سەبەبى - وكپەدەگى اۋىرسىنۋ رەتسەپتورلارىنىڭ جوقتىعى. بۇل جامان دەرتكە شالدىققان ادام وكپەدەگى ىسىك ۇلعايىپ، سىرتىنا شىققان كەزدە عانا اۋرۋدى سەزە باستايدى. بۇل وكپە وبىرىنىڭ ءۇشىنشى-ءتورتىنشى دەڭگەيى، ياعني بۇل كەزدە ادامنىڭ ەمدەلۋىنە مۇمكىندىك مۇلدەم بولمايدى. جالپى، وبىردىڭ كەز كەلگەن ءتۇرى قاۋىپتى. باستاپقى كەزدە اۋرۋدىڭ ەشقانداي بەلگىلەرى بايقالمايدى. تەك پروفيلاكتيكالىق مەديتسينالىق تەكسەرىس جانە سكرينينگ ارقىلى عانا ەرتە باستان انىقتاۋعا بولادى»، دەيدى اقمولا وبلىستىق كوپبەيىندى اۋرۋحاناسىنىڭ كەۋدە حيرۋرگيا بولىمشەسىنىڭ مەڭگەرۋشىسى مارلەن اتامبايەۆ.
ايەلدەر اۋرۋىنا كەلەتىن بولساق، ءبىرىنشى ورىندا ءسۇت بەزى وبىرى - 2018-جىلى 229 وقيعا، ودان كەيىن جاتىر وبىرى - 86، تەرى وبىرى - 82، وكپە وبىرى - 53 جانە اسقازان وبىرى - 40 وقيعا. جاتىر وبىرىنا ۇشىراعان 86 ايەلدىڭ 65 دە (76 پايىزى) سكرينينگ ارقىلى انىقتالدى.
«مەملەكەت سكرينينگتى ءۇش باعىت بويىنشا تەگىن وتۋگە مۇمكىندىك ۇسىنىپ وتىر. ونىڭ ىشىندە 40 جانە 70 جاس ارالىعىنداعى ايەلدەر ءسۇت بەزى مامموگرافياسى، 30 جانە 70 جاس ارالىعىنداعى ايەلدەر جاتىر وبىرىنا دياگنوستيكا، 50 جانە 70 جاس ارالىعىنداعى ەركەكتەر مەن ايەلدەر توق جانە اشى ىشەك وبىرىنا سكرينينگتەن وتە الادى. سكرينينگكە جولدامانى تۇرعىلىقتى جەرى بويىنشا ەمحانادان الۋعا بولادى»، - دەيدى «الەۋمەتتىك مەديتسينالىق ساقتاندىرۋ قورى» ك ە ا ق اقمولا وبلىستىق فيليالىنىڭ ديرەكتورى نۇرلان احىلبەكوۆ.