الماتىدا ۇلتتىق سپورت تۇرلەرىنەن ازيا چەمپيوناتى وتەدى
«2019 -جىل قازاقستاندا جاستار جىلى دەپ جاريالانعان بولاتىن. وسىعان بايلانىستى 15-22 -ءساۋىر ارالىعىندا ۇلتتىق سپورتتىڭ ءتورت تۇرىنەن، اتاپ ايتقاندا كوكپار، اۋدارىسپاق، تەڭگە ءىلۋ، جامبى اتۋدان ازيا چەمپيوناتى وتەدى. سايىس الماتى قالاسىنداعى اتشاباردا ۇيىمداستىرىلادى. 8 كوماندا قاتىسادى دەپ كۇتىپ وتىرمىز. بۇگىنگى كەڭەس وتىرىسىنا ون مەملەكەت قاتىسىپ وتىرعاندىقتان، بۇل چەمپيوناتقا مەن بارلىق كوماندالاردى شاقىرامىن» ، - دەدى استانادا الەمنىڭ 10 ەلىنىڭ ۇلتتىق سپورت فەدەراتسيا باسشىلارىنىڭ قاتىسۋىمەن وتكەن بۇكىل الەمدىك كوكپار قاۋىمداستىعىنىڭ كەڭەسىندە قر ۇلتتىق سپورت تۇرلەرى قاۋىمداستىعىنىڭ اتقارۋشى ديرەكتورى راحات جاقسىباي.
قاۋىمداستىق وكىلى ءوز سوزىندە چەمپيوناتقا 21 جاسقا دەيىنگى سپورتشىلار قاتىساتىنىن تىلگە تيەك ەتتى.
«سونىمەن بىرگە، 20-21 - ءساۋىر ارالىعىندا بۇكىل الەمدىك ەتنوسپورت كونفەدەراتسياسىنىڭ ەكىنشى حالىقارالىق كونفەرەنتسياسى وتكىزىلەدى. وعان 30-40 مەملەكەت قاتىساتىنى كۇتىلۋدە. ايتۋلى جيىنعا 20 عا تارتا ەلدىڭ سپورت ءمينيسترى شاقىرىلعالى وتىر. كونفەرەنسيا بارىسىندا ات سپورتىن دامىتۋ ماسەلەلەرى تالقىلانادى» ، - دەدى ول.
ەسكە سالا كەتسەك، استانادا الەمنىڭ 10 ەلىنىڭ ۇلتتىق سپورت فەدەراتسيا باسشىلارىنىڭ قاتىسۋىمەن بۇكىلالەمدىك كوكپار قاۋىمداستىعىنىڭ كەڭەسى وتكەن بولاتىن. كەڭەستە قاۋىمداستىققا جاڭا مۇشەلەر قابىلدانىپ، حالىقارالىق جارىستاردى ۇيىمداستىرۋ ءتارتىبى قارالدى. جيىندا كوكپاردىڭ حالىقارالىق ەرەجەلەرى تالقىلاندى. كەڭەسكە قازاقستان، ماجارستان، تۇركيا، قىتاي، وزبەكستان، تاجىكستان، اۋعانستان، موڭعوليا، قىرعىز رەسپۋبليكاسى، رەسەي ۇلتتىق فەدەراتسياسىنىڭ وكىلدەرى قاتىستى.
سونداي- اق، كەڭەس كەزىندە كوكپاردىڭ حالىقارالىق ەرەجەسىنە حاتتاما نەگىزىندە جوعارىدا اتالعان 10 ەلدىڭ ۇلتتىق فەدەراتسيا باسشىلارى قول قويدى.