اقبوكەندەردىڭ جاپپاي قىرىلۋ سەبەبىن نەگە تابا الماي وتىرمىز - ۆلاديمير بوجكو
سول جەردە ءماجىلىس ءتوراعاسىنىڭ ورىنباسارى ۆلاديمير بوجكو اقبوكەندەردىڭ جاپپاي قىرىلۋ وقيعاسىن ەسكە الدى، دەپ حابارلايدى قازاقپارات ءتىلشىسى.
«بۇگىن ماڭىزدى ءبىر ماسەلە كوتەرىلدى. ءبىزدىڭ عىلىمي- زەرتتەۋ ينستيتۋتتارىمىز قايدا؟ زوولوگيا ينستيتۋتى نە ىستەپ وتىر؟ ءبىز ءالى كۇنگە دەيىن 200 مىڭ اقبوكەننىڭ نەدەن قىرىلعانىن تابا الماي وتىرمىز. مەن ۇكىمەتتە جۇمىس ىستەگەندە بىرەۋ تۇرادى دا، اقبوكەندەر پاستەرەللەزدەن قىرىلىپ قالدى دەيدى. ەكىنشىسى تاعى ءبىر سەبەبىن ايتادى. ءبىراق ءالى كۇنگە دەيىن ناقتى جاۋاپ جوق»، - دەدى ۆ. بوجكو.
ونىڭ ايتۋىنشا، ەلىمىزدىڭ فلوراسى مەن فاۋناسىنا قاۋىپ ءتوندىرىپ وتىرعان ۆەتەرينارلىق اۋرۋلاردىڭ وشاقتارىن انىقتاۋ قاجەت. ونسىز اقبوكەندەر دە، بەكىرە دە قىرىلا بەرەدى.
«كاسپييدە كوكسەركە نەگە قىرىلىپ جاتىر؟ قازىر جايىق جاقتا ەكى شارۋاشىلىقتا بەكىرە بالىقتارى قىرىلىپ قالدى. وزەندە مۇزدىڭ استىندا ءولى بالىق قالقىپ ءجۇر. ءبىراق ءبارىمىز ءۇن-ءتۇنسىز وتىرمىز. كادىمگىدەي تىنىشتىق. ءتورت اي ءوتتى. ءبىراق سەبەبىن ەشكىم بىلمەيدى. بالىق كىمنىڭ كەسىرىنەن ۋلاندى؟ ەندى ول جەردە بەكىرەنىڭ كوبەيەتىنىنە كۇمانىم بار»، - دەپ اتاپ كورسەتتى ۆ. بوجكو.
ايتا كەتەيىك، وسىدان ءتورت جىل بۇرىن قازاقستاندا نەبارى ءۇش اپتانىڭ ىشىندە 200 مىڭنان استام اقبوكەن قىرىلدى. باس كەزىندە ماماندار اتالعان وقيعانىڭ سەبەبىن تابا المادى. شەتەلدىك ماماندار دا كومەككە شاقىرىلدى. ولاردىڭ سوزىنە قاراعاندا، اقبوكەندەردىڭ قىرىلۋىنا Pasteurella multocida ينفەكسياسى سەبەپ بولدى.
بۇگىندە الەم بويىنشا كيىكتەردىڭ باسىم بولىگى قازاقستان دالاسىندا قونىستانعان. جانۋارلاردىڭ اتالعان ءتۇرىن اتۋعا رۇقسات جوق. الايدا براكونەرلەر اقبوكەندەردى اتىپ، ءمۇيىز ساۋداسىنان پايدا تابادى. جەرگىلىكتى جەردە اقبوكەندەردەن كەسىپ العان ءمۇيىزدىڭ ءبىر كەلىسى 150 مىڭ تەڭگەگە ساتىلادى. الماتىدا ونىڭ باعاسى 400 مىڭعا دەيىن بارادى. ال قىتايدا ءمۇيىزدىڭ ءبىر كەلىسىنە 4 مىڭ ا ق ش دوللارىن بەرەدى. سەبەبى ول جاقتا اقبوكەندەردىڭ مۇيىزىنەن ءداستۇرلى مەديتسينادا سان الۋان دارىلەر جاسايدى.