كۇش سالساق، كوكپاردى وليمپيادا ويىندارىنا ەنگىزۋگە بولادى - قايرات ساتىبالدى
كەڭەس وتىرىسىندا ءسوز سويلەگەن ق ر ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى قايرات ساتىبالدى ۇلتتىق سپورت تۇرلەرىن دامىتۋ - بىرەگەيلىگىمىز بەن تاريحي جانە مادەني ەرەكشەلىگىمىزدى ايگىلەيتىنىن اتاپ ءوتتى.
«ۇلتتىق سپورتتى دامىتۋ ارقىلى ۇلتتىق كودىمىزدى ساقتايمىز. ادامدار، ەلدەر اراسىنداعى دوستىق قارىم- قاتىناس، مادەني بايلانىس حالىقتارىمىزدى جاقىنداتا تۇسەدى. وتكەن جىلدىڭ قىركۇيەك ايىندا يۋنەسكو مەن ءداستۇرلى سپورت كوميتەتىنىڭ كەڭەس وتىرىسىندا 130 ەلدىڭ وكىلدەرى جينالىپ، قازاقستان ەلورداسى - استانا قالاسىندا ەتنوسپورتتان تۇڭعىش رەت الەمدىك ويىنداردى وتكىزۋ تۋرالى شەشىم قابىلدانعان ەدى. سونىمەن بىرگە، قازاقستاندا تاعى ءبىرشاما حالىقارالىق چەمپيوناتتار ۇيىمداستىرىلدى. اتاپ ايتقاندا، اۋدارىسپاق پەن تەڭگە ىلۋدەن، قۇسبەگىلىكتەن ازيا چەمپيوناتى، جامبى اتۋدان حالىقارالىق چەمپيونات ءوتتى. وسىنىڭ ءبارى دە - ءبىزدىڭ بىرلەسە اتقارعان جۇمىسىمىزدىڭ ارقاسى» ، - دەدى قايرات سابىتالدى.
ونىڭ ايتۋىنشا، كوكپار ويىنىن كورشىلەس ەلدەر ءارقالاي اتايدى.
«دەسە دە، كوكپار بارىمىزگە ورتاق. ونىڭ تەك ەرەجەلەرى بويىنشا ازداعان ايىرماشىلىق بار. بۇگىنگى جيىن كوكپاردى دامىتۋ جۇمىسىنا قوسىمشا سەرپىن بەرەدى دەگەن سەنىمدەمىن. ءبىز بىرىگە وتىرىپ، كوكپاردى الەمدەگى تانىمال سپورت تۇرىنە اينالدىرا الامىز. وسىعان دەيىن ايتىلعانداي، كۇش سالساق كوكپاردى ازيا ويىندارىنىڭ، وليمپيادا ويىندارىنىڭ قۇرامىنا ەنگىزۋگە بولادى» ، - دەدى قايرات ساتىبالدى.
ايتا كەتسەك، ەلورداداعى ۇلتتىق مۋزەيدە الەمنىڭ 10 ەلىنىڭ ۇلتتىق سپورت فەدەراتسيا باسشىلارىنىڭ قاتىسۋىمەن بۇكىلالەمدىك كوكپار قاۋىمداستىعىنىڭ كەڭەسى ءوتىپ جاتىر. كەڭەستە قاۋىمداستىققا جاڭا مۇشەلەر قابىلدانىپ، حالىقارالىق جارىستاردى ۇيىمداستىرۋ ءتارتىبى قارالۋدا. جيىندا كوكپاردىڭ حالىقارالىق ەرەجەلەرى تالقىلاندى.
كەڭەسكە قازاقستان، ماجارستان، تۇركيا، قىتاي، وزبەكستان، تاجىكستان، اۋعانستان، موڭعوليا، قىرعىز رەسپۋبليكاسى، رەسەي ۇلتتىق فەدەراتسياسىنىڭ وكىلدەرى قاتىسۋدا.