ۇلكەن الماتى كولىندە سىرعاناعان بويجەتكەن قايىڭدىدا روليك ءتۇسىردى

الماتى. قازاقپارات - ۇلكەن الماتى كولىندە مانەرلەپ سىرعاناۋىمەن كوزگە تۇسكەن كسەنيا پانكراتوۆا كولسايداعى قايىڭدى كولىندە سىرعاناپ، روليك ءتۇسىردى، دەپ حابارلايدى قازاقپارات ءتىلشىسى.

بۇل ۆيدەو بويجەتكەننىڭ Instagram پاراقشاسىندا جاريالاندى.

«قايىڭدى كولىنىڭ عاجايىپ سۇلۋلىعى! سۋىق! اياق استىندا تىرسىلداپ جارىلعان مۇز. بۇل شىنايى تابيعات ءۇنى» ، - دەپ جازدى بويجەتكەن ۆيدەوعا تۇسىنىكتەمە رەتىندە.

بۇل جولى دا كسەنيا قاۋىپتى جاعدايدا سىرعاناعان. ءتۇسىرىلىم كەزىندە مۇز ەرىپ، سىقىرلاپ جارىلىپ جاتقان.

بۇل جولى سپورتشى قىزعا قالالىق تۋريستىك ورتالىق تاپسىرىس بەرگەن. تۋريستىك ورتالىق وسى ۆيدەو ارقىلى قازاقستاننىڭ تۋريستىك مۇمكىندىگىن ارتتىرا تۇسپەك.

 ايتا كەتۋ كەرەك، الماتىلىق مانەرلەپ سىرعاناۋشى، باپكەر كسەنيا پانكراتوۆا ۇلكەن الماتى كولىندە كونكيمەن سىرعاناپ ۆيدەو تۇسىرگەن بولاتىن. ۆيرۋستى بەينەروليك الەۋمەتتىك جەلىدە تاراپ كەتتى. بۇل بەينەروليكتى 2 اپتا ىشىندە 1 ميلليون ادام تاماشالاعان.

 سونىمەن قاتار، جاقىندا بويجەتكەن رەسەيدىڭ «پەرۆىي كانال» ارناسىنىڭ «ۆيدەلي ۆيدەو» باعدارلاماسىندا قوناقتا بولدى. باعدارلاما قوناقتارى دا سۇحبات ۇستىندە بويجەتكەننىڭ تالانتى مەن قازاقستاننىڭ تابيعاتىنا تامسانۋمەن بولدى.

«ۆيدەوعا قاراپ نە ايتۋعا بولادى؟ ارتىستىك - 10, تەحنيكا - 10, 1 ميلليون ادام قاراعان» ، - دەدى ۆيدەونى تاماشالاعان سوڭ جۇرگىزۋشى.