سەناتورلار «ۇلكەن وتباسى» ارنايى باعدارلامانىڭ قاجەتتىگىن ايتتى
سەناتور مۇرات باقتيار ۇلىنىڭ ايتۋىنشا، ۇكىمەت «التىن القا، كۇمىس السقاسى» بار انالاردىڭ، اسىراۋشىسى جوق (اجىراسقان، جەسىر ت. ب. ) انالاردىڭ، مۇگەدەك ايەلدەردىڭ، مۇگەدەك بالاسى بار انالاردىڭ الەۋمەتتىك- تۇرمىستىق ءال- اۋقاتىن كوتەرۋ ءۇشىن ءاربىر بالاعا كامەلەتتىك جاسقا جەتكەنشە ەڭ تومەنگى جالاقىنىڭ 50 پايىز كولەمىندە جاردەماقى تولەۋدىڭ مۇمكىندىكتەرىن قاراستىرۋ قاجەت.
«ەكىنشىدەن، كوپتەگەن دامىعان ەلدەردە بار كوپ بالالى وتباسىن قولداۋ جانە جاردەمدەسۋ ماقساتىندا «ۇلكەن وتباسى» ارنايى مەملەكەتتىك باعدارلاما قابىلدانۋى ءتيىس» ، - دەدى دەپۋتات.
ونىڭ سوزىنە قاراعاندا، مەملەكەتتىك اتاۋلى الەۋمەتتىك كومەكتى تاعايىنداۋ بارىسىندا وتباسىندا بىرگە تۇراتىن زەينەتكەردىڭ، مۇگەدەكتىڭ، ستۋدەنتتىڭ جانە ءبىر جاسقا دەيىنگى بالا كۇتىمىنە، مۇگەدەك بالانى قاراعانى ءۇشىن تولەنەتىن جاردەماقىلار مەن شاكىرتاقى كولەمىن تابىس كوزى رەتىندە ەسەپكە الماۋ كەرەك.
«كوپ بالالى انالار مەن تۇرمىسى تومەن وتباسىلارىڭ ۇكىمەتتىڭ تۇرعىن ۇيىمەن قامتاماسىز ەتۋگە باعىتتالعان سانالۋان باعدارلامالارعا قاتىسۋ مۇمكىندىگىنىڭ جوق بولۋىنا بايلانىستى كوپشىلىگى تۇرۋعا وتە قولايسىز- تار، جالدامالى ورىندار مەن پاتەرلەردە تۇرۋعا ءماجبۇر. سوندىقتان دا ولاردىڭ ءۇي كەزەكتىلىگىن بولەك تىركەۋ شارالارىن جانە ولار ءۇشىن بارىنشا قولجەتىمدى الدىن- الا جارناپۇل تولەمەي جالعا بەرىلەتىن، ەلىمىزدىڭ بارلىق قالالارى مەن اۋدان ورتالىقتارىندا سالاتىن تۇرعىن ءۇي ماسەلەسىن شەشۋگە باعىتتالعان جۇيەلى ءىس- شارالار قابىلدانۋى ءتيىس» ، - دەدى سەناتور.
وسى ورايدا، ول كوپ بالالى انالار مەن مۇگەدەكتەردى جانە اۋىر قيىن ومىرلىك جاعدايداعى ءومىر ءسۇرىپ جاتقان ازاماتتارىمىزدى قولداۋعا باعىتتالعان ارنايى كەشەندى الەۋمەتتىك باعدارلاما ازىرلەۋدى سۇرادى.