استانادا كوپبالالى انالار قاۋىمداستىعى قۇرىلماق

استانا. قازاقپارات - استانا قالاسىنىڭ قوعامدىق كەڭەسى ەلوردادا كوپبالالى انالار قاۋىمداستىعىن قۇرۋدى كوزدەپ وتىر، دەپ حابارلايدى قازاقپارات ءتىلشىسى.

«ءبىز قازىرگى ۋاقىتتا كوپبالالى انالار قاۋىمداستىعىن قۇرۋدى كوزدەپ وتىرمىز. ول قاۋىمداستىققا بەلسەندىلەر ەنسە دەيمىز. وسىلايشا، بەلسەندىلەرمەن بىرگە كوپبالالى وتباسىلاردىڭ ماسەلەلەرىن شەشۋدى ويلاستىرۋدامىز. مەنىڭ ويىمشا، بۇل دۇرىس قادام. جۋىق ارادا ءبىز قاۋىمداستىقتى قۇرۋ تۋرالى جۇمىستى اياعىنا دەيىن جەتكىزەمىز»، - دەدى استانا قالاسى قوعامدىق كەڭەسىنىڭ ءتوراعاسى سانسىزباي ەسىلوۆ ەلوردا اكىمدىگىندە وتكەن جيىندا.

ەسكە سالا كەتسەك، بۇعان دەيىن استانا قالاسى قوعامدىق كەڭەسىنىڭ ءتوراعاسى سانسىزباي ەسىلوۆ ەلورداداعى كوپبالالى وتباسىلاردىڭ ماسەلەسى تۋرالى ءسوز قوزعاپ، ولاردىڭ باسپانا ماسەلەسىن جەكە-جەكە كەزەك بويىنشا شەشۋ كەرەكتىگىن ءمالىم ەتكەن ەدى.

«مەملەكەت بۇل ماسەلەگە بەت بۇرار دەگەن ويدامىن. قازىرگى ۋاقىتتا ۇكىمەت جۇمىس توبىن قۇرىپ، اتالمىش ماسەلەنى شەشۋدى كوزدەپ وتىر. كوپبالالى وتباسىلاردىڭ ەڭ الدىمەن باسپانا ماسەلەسىن شەشۋ كەرەكتىگى تۋرالى باستامانى 100 پايىز قولدايمىز. سەبەبى، بۇل وتباسىلار كۇردەلى ماتەريالدىق جاعدايىمەن قوسا باسپانانى جالداپ تۇرۋعا ءماجبۇر. 50-100 مىڭ تەڭگەگە كىشكەنە عانا بولمە جالداپ تۇرادى. سول سەبەپتى، كوپبالالى وتباسىلاردىڭ ەڭ الدىمەن باسپانا ماسەلەسىن شەشۋ كەرەك. جەتىم بالالار، سوعىس ارداگەرلەرى سياقتى كوپبالالى وتباسىلاردىڭ دا باسپانا بويىنشا جەكە كەزەگى بولۋى ءتيىس. سەبەبى، قازىرگى ۋاقىتتا ەلورداداعى باسپانا بويىنشا ورتاق كەزەكتە 46 مىڭعا جۋىق ادام تۇر»، - دەيدى سانسىزباي ەسىلوۆ.