قازاقستاندا حالىق تۇرمىسىن قالاي جاقسارتقالى جاتىر؟
جۇمىس توبىنىڭ باسشىسى، ق ر پرەمەر-ءمينيسترىنىڭ ورىنباسارى ەربولات دوسايەۆ اتاپ وتكەندەي، ەرتەڭ وسىعان قاتىستى زاڭ جوباسى ۇكىمەتكە ەنگىزىلگەلى جاتىر.
«2020-جىلدان باستاپ مەملەكەتتىك الەۋمەتتىك ساقتاندىرۋ قورى ەسەبىنەن الەۋمەتتىك تولەمدەردىڭ مولشەرىن ارتتىرۋ بويىنشا زاڭ جوباسى ەرتەڭ ۇكىمەتتىڭ تالقىلاۋىنا ۇسىنىلادى»، - دەدى ول.
بۇل جەردە ەڭبەك جارامدىلىعىنان ايىرىلعان ازاماتتاردىڭ الەۋمەتتىك تولەمىن ورتاشا ەسەپپەن - 35 پايىزعا، اسىراۋشىسىنان ايىرىلعانداردىكىن - 34 پايىزعا، جۇمىسىنان ايىرىلعانداردىڭ تولەمىن - 40 پايىزعا ارتتىرۋ تۋرالى ءسوز قوزعالىپ وتىر.
«الداعى ەكى اپتادا الدىن الا جينالعان ۇسىنىستاردى زەردەلەپ، ودان كەيىن زاڭنامالىق جانە قارجىلىق قامتاماسىز ەتۋ تەتىكتەرىن زەرتتەگەن سوڭ ءبىرىنشى توقساننىڭ سوڭىنا دەيىن زاڭ جوباسىن ۇكىمەتتە قاراۋدى كوزدەپ وتىرمىز»، - دەدى ەربولات دوسايەۆ.
ۇكىمەت باسشىسى ورىنباسارىنىڭ ايتۋىنا قاراعاندا، باسپاناعا مۇقتاج كوپبالالى وتباسىلار ءۇشىن مۋنيتسيپالدى جالدامالى تۇرعىن ۇيگە قولجەتىمدىلىكتى ارتتىرۋ تەتىگى جەكە قاراستىرىلعان.
«ءبىزدىڭ جۇمىستىڭ باستى باعىتتارى - مەكەنجاي بويىنشا الەۋمەتتىك كومەك الۋدى جەڭىلدەتۋ، سونىمەن بىرگە بيۋروكراتيالىق پروتسەدۋرالاردى قىسقارتۋ، مەملەكەتتىڭ قولداۋىنا مۇقتاج كوپبالالى وتباسىلارعا جاردەماقى تولەۋ مەحانيزمىن جەتىلدىرۋ. كوپبالالى وتباسىلاردىڭ بالالارى ءۇشىن مەكەنجاي بويىنشا الەۋمەتتىك كومەك بەرۋ، مەكتەپتە ىستىق تاماق بەرۋ، قوعامدىق كولىكتە ءجۇرۋدى جەڭىلدەتۋ سەكىلدى ماسەلەلەر كەڭىنەن قامتىلاتىن بولادى»، - دەيدى ەربولات دوسايەۆ.