دوسايەۆ قارجى مينيسترىنە: سىزگە جان-جاقتى قىسىم بولادى
بۇگىن ق ر قارجى مينيسترلىگىنىڭ كەڭەيتىلگەن القا ماجىلىسىندە پرەمەر-ءمينيستردىڭ ورىنباسارى ەربولات دوسايەۆ وسىنداي تالاپ قويدى، دەپ حابارلايدى قازاقپارات ءتىلشىسى.
جيىن بارىسىندا ۆيتسە-پرەمەر بيۋجەتتىك پروتسەستەر تيىمدىلىگى بويىنشا جۇمىستاردى جەدەلدەتىپ، ونى ستراتەگيالىق جوسپارلاۋمەن ۇيلەستىرۋ قاجەتتىگىنە باسا نازار اۋداردى.
«ءبىز بەس جىلدان كەيىن بەلگىلى ءبىر سالادا مىناداي كورسەتكىشتەرگە قول جەتكىزەمىز دەپ مىندەت قويىپ جاتامىز. ال ودان كەيىن ءبىزدىڭ ورتالىق مەملەكەتتىك ورگاندار «قارجى مينيسترلىگى اقشا بەرمەگەندىكتەن قول جەتكىزە المادىق» دەپ شىعادى. قارجىلاي قامتاماسىز ەتۋ بولماسا نەلىكتەن مۇنداي مىندەتتەمەلەر الۋعا رۇقسات بەرەمىز؟ جۇمىس قيىن. ءاليحان اسحان ۇلى، ادەتتە سىزگە قىسىم جاسايتىن بولادى، جان-جاقتان ۇزدىكسىز قوڭىراۋ تۇسەدى»، - دەدى قارجى مينيسترىنە قايىرىلعان ەربولات دوسايەۆ.
ۆيتسە-پرەمەر جەرگىلىكتى بيۋجەتتىڭ اشىقتىعىن قامتاماسىز ەتۋگە قاتىستى پروبلەمانىڭ دا بار ەكەنىن ايتتى.
«بۇكىل الەمدىك ەكونوميكالىق فورۋمنىڭ جاھاندىق باسەكەگە قابىلەت رەيتينگىندە ءبىز «بيۋجەت اشىقتىعى» ينديكاتورى بويىنشا 2017-جىلى 53 بال الدىق. بۇل قوعامنىڭ بيۋجەتتىك پروتسەستەرگە قاتىسۋى جانە بيۋجەتتىك قۇجاتتارعا قولجەتىمدىلىگى لايىقتى دەڭگەيدە ەمەستىگىن بىلدىرەدى. بىزدە جەرگىلىكتى بيۋجەتپەن بايلانىستى ماسەلەلەر دە قالىپ وتىر. بۇل جەردە ادىستەمەلىك تۇرعىدا قاجەتتى ۇسىنىستار ەنگىزۋ قاجەت. اعىمداعى جىلى بيۋجەت جانە سالىق كودەكستەرىنە وزگەرىستەر ەنگىزۋ كوزدەلىپ وتىر. وسى نورمالاردىڭ بارلىعىن بەرىڭىزدەر، قاراستىرايىق»، - دەدى ە. دوسايەۆ.