قازاقستان مۇناي وڭدەۋ كولەمىن ۋاقىتشا ازايتتى

استانا. قازاقپارات - ق ر ەنەرگەتيكا ءمينيسترى قانات بوزىمبايەۆ قازاقستان قاي مەرزىمنەن باستاپ بەنزيندى ەكسپورتتايتىنىن ايتتى، دەپ حابارلايدى قازاقپارات ءتىلشىسى.

«بيىل 100 پايىزعا ىشكى قاجەتتىلىكتى قامتاماسىز ەتەمىز. اعىمداعى جىلى 500 دەن 650 مىڭ تونناعا دەيىن بەنزين پروفيتسيتى بولادى. بۇل پروفيتسيت 2019-جىلدىڭ ءبىرىنشى ايىنان بەرى بايقالىپ وتىر. وسىعان بايلانىستى قاڭتار-اقپاندا ءبىز مۇناي وڭدەۋ زاۋىتتارىندا ءوندىرۋ كولەمىن ءبىرشاما تومەندەتتىك»، - دەدى مينيستر سەناتتىڭ جالپى وتىرىسىندا.

ايتا كەتەيىك، بۇگىنگى جالپى وتىرىستا «2010-جىلعى 9- جەلتوقسانداعى ق ر ۇكىمەتى مەن ر ف ۇكىمەتى اراسىنداعى قازاقستان رەسپۋبليكاسىنا مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى قارالدى.

«وسى كەلىسىمدى راتيفيكاتسيالاعاننان كەيىن، سەناتقا مۇناي ونىمدەرىنىڭ بولەك تۇرلەرىن رەتتەۋ مەن اينالىمى تۋرالى زاڭناماسىمەن كەلەمىز. ءبىرىنشى توقساننىڭ سوڭىندا بەنزين ەكسپورتىن باستايمىز، سونداي-اق وسى جىلعا جوسپارلاعان وڭدەۋ كولەمىنىڭ ورنىن تولتىرامىز. مەنىڭ ويىمشا، بۇل سالا مەملەكەتتىڭ باقىلاۋىندا بولادى، ال ەكسپورت قوسىمشا تابىس الىپ كەلەدى. ياعني مۇناي وڭدەۋشى زاۋىتتار قوسىمشا تابىسقا يە بولادى»، - دەدى قانات بوزىمبايەۆ.