پەتروپاۆلدا جاڭا ىقشام اۋدان بوي كوتەردى
پەتروپاۆل قالاسىنىڭ شەتىندە «سولنەچنىي-2» دەپ اتالاتىن جاڭا ىقشام اۋدان بوي كوتەردى. مۇندا بىركەلكى جوبا بويىنشا 200-دەن استام ءبىر قاباتتى ءۇي سالىنعان. قۇرىلىس «نۇرلى جەر» باعدارلاماسى بويىنشا جۇزەگە اسىرىلىپ، باسپانالار جەر تەلىمدەرىنە كەزەكتە تۇرعاندارعا بەرىلمەك.
«جوبا 2017-جىلدان باستاپ جۇزەگە اسىرىلىپ كەلەدى. باسپانالار ەكى ۇلگى بويىنشا سالىنىپ جاتىر. ۇيلەردىڭ اۋماعى 70-90 شارشى مەترگە دەيىن، اۋلالارىنا كەسپە تاس توسەلەدى. وعان قوسا، ەلدى مەكەنگە ينجەنەرلىك جەلىلەردى تارتۋ، جول سالۋ جوسپارلانعان»، - دەيدى پەتروپاۆل قۇرىلىس ءبولىمىنىڭ سەكتور مەڭگەرۋشىسى ماريام مۇقاشيەۆا.
نىساندا ەكى مەردىگەر قۇرىلىس كومپانياسى جۇمىس ىستەپ جاتىر. كومپانيا وكىلدەرىنىڭ ايتۋىنشا، ۇيلەر دايىن كۇيىندە تاپسىرىلادى. اسحانا مەن قوناق بولمەسى قوسىلعان، ەكى جاتىن بولمەسى بار. ورتالىقتاندىرىلعان جىلىتۋ جۇيەسى جوق، ياعني پەشتى تۇرعىن ءوزى جاعادى. ەسەسىنە سۋ ۇيگە كىرگىزىلگەن، كارىز جۇيەسى تارتىلعان.
«قالالىق اكىمشىلىك بانككە الاتىن كىسىلەردىڭ ءتىزىمىن بەرۋى ءتيىس. سول ءتىزىم بويىنشا بانك جۇمىس ىستەپ، تولەم قابىلەتتىلىگىن تەكسەرەدى. ءۇيدىڭ ءبىر شارشى مەترىنىڭ باعاسى 120 مىڭ تەڭگە»، - دەيدى «تۇرعىن ءۇي قۇرىلىس جيناق بانكى» ا ق س ق و ف مامانى التاي جۋانىشپايەۆ.
پەتروپاۆل قالالىق اكىمدىگىنىڭ جەر قاتىناستارى ءبولىمىنىڭ رەسمي ينتەرنەت-رەسۋرسىنداعى اقپارات بويىنشا، وبلىس ورتالىعىندا جەر تەلىمدەرى تۇرعىندارعا 2014-جىلدان بەرىلە باستادى. وسى ارالىقتا 500 دەن استام ۋچاسكە ۇلەستىرىلگەن. قازىر 10 سوتىق جەرگە كەزەك 10 مىڭعا جۋىقتاعان.