ەلوردادا ارنايى قىمىز كورمەسى وتەدى
شارا بارىسىندا العاش رەت ەمدىك قاسيەتى بار سۋسىن - قىمىزعا ارنالعان كورمە قويىلادى، دەپ حابارلايدى قازاقپارات ق ح ا سايتىنا سىلتەمە جاساپ.
بارلىق نيەت بىلدىرۋشىلەر ۇلتتىق مۇراجايدىڭ تاقىرىپتىق ەكسپوناتتارىن، ەمدىك سۋسىن دايىنداۋعا ارنالعان قۇرالداردى تاماشالاي الادى، سونداي-اق ەجەلگى جانە قازىرگى زامانعى تەحنولوگيالار بويىنشا دايىندالعان قىمىز بەن بيە ءسۇتىنىڭ ءدامىن تاتىپ كورە الادى.
كورمە قارساڭىندا ۇلى دالادا قىمىزدىڭ پايدا بولۋ تاريحى، سۋسىن دايىنداۋ تەحنولوگياسى، تۇرلەرى تانىستىرىلىپ، ونىڭ ەمدىك قاسيەتتەرى تۋرالى ايتىلادى.
ەسكە سالا كەتسەك، ءتورت جىل بۇرىن قازاقستان حالقى اسسامبلەياسىنىڭ 2015-جىلدىڭ ساۋىرىندەگى 22-سەسسياسىندا سويلەگەن سوزىندە مەملەكەت باسشىسى نۇرسۇلتان نازاربايەۆ قازاقستاندا العىس ايتۋ كۇنىن اتاپ ءوتۋدى ۇسىندى. مەرەكەنى بۇل كۇنى اتاپ ءوتۋدىڭ باستى سەبەبى - قازاقستان حالقى اسسامبلەياسىنىڭ قۇرىلعان كۇنى. بۇل كۇنى كوپتەگەن ەتنوس وكىلدەرى ءبىر-بىرىنە جانە قازاقتارعا ۇلكەن ۇلتتىق كۇيزەلىس تۋدىرعان زاماندا تۇتاس حالىقتاردىڭ كۇشپەن قونىس اۋدارىلىپ، ستاليندىك قۋعىن-سۇرگىن جانە ەتنوستاردىڭ قازاقستان دالاسىنا جەر اۋدارىلۋى كەزەڭىندە توزىمدىلىگى مەن قوناقجايلىلىعى ءۇشىن العىس بىلدىرە الادى.
«مەرەكەنىڭ نەگىزدەمەلەرىنىڭ ءبىرى - «ءوز تاريحىڭدى ۇمىتپا جانە ونى ماقتان ەت». وسى جىلى ول پرەزيدەنتتىڭ «ۇلى دالانىڭ جەتى قىرى» ماقالاسىنا ۇندەسىپ وتىرعانىن اتاپ وتكەن ءجون بولار. وسى مەرەكەگە استانادا قىمىز كورمەسى ورايلاستىرىلىپ وتىر - سەبەبى قازاقتار ەجەلگى كەزدە كيىز ءۇيىنىڭ ەسىگىنە توقتاعان جولاۋشىعا ەڭ الدىمەن قىمىز، سودان كەيىن ءدام ۇسىنعان»، - دەلىنگەن حابارلامادا.
ايتا كەتەرلىگى، قىمىزمۇرىندىق پەن بيە بايلاۋ يۋنەسكو مادەني مۇرالارىنىڭ قاتارىنا ەندى.