اقتوبەدە ساق-عۇن تۇركى الەمىنىڭ حالىقارالىق فورۋمى وتەدى

اقتوبە. قازاقپارات - كۇزدە اقتوبەدە «ۇلى دالا مۇراگەرلەرى» ساق-عۇن تۇركى الەمىنىڭ حالىقارالىق فورۋمى وتەدى، دەپ حابارلايدى قازاقپارات ءتىلشىسى.

اقتوبە وبلىسىندا «نۇر وتان» پارتياسىنىڭ كەزەكتەن تىس ХХVІ  كونفەرەنتسياسى ءوتتى. جيىن كەزىندە وبلىس اكىمىنىڭ ورىنباسارى مارات توعجانوۆ اقتوبەدە اتقارىلىپ جاتقان ىستەرگە توقتالدى. بيىل وڭىردە تاريحي فورۋم وتەدى. قىركۇيەك ايىنا «ۇلى دالا مۇراگەرلەرى» فورۋمى جوسپارلانعان. ەلباسى نۇرسۇلتان نازاربايەۆتىڭ «ۇلى دالانىڭ جەتى قىرى» ماقالاسى اياسىندا، «رۋحاني جاڭعىرۋ» باعدارلاماسىن ىسكە اسىرۋ كەزىندە بارلىعى 200 گە جۋىق شارا ۇيىمداستىرىلادى.

«2019-جىلدىڭ ەڭ باستى جوباسى - اقتوبە قالاسىندا «ۇلى دالا مۇراگەرلەرى» ساق-عۇن تۇركى الەمىنىڭ حالىقارالىق فورۋمىن وتكىزۋ. فورۋم اياسىندا «ۇلى دالا شەجىرەسى» ەسكەرتكىش-كەشەنىن اشىلۋى، «ۇلى دالا جاۋھارلارى» اتتى كورمە، «ۇلى دالا مۇراگەرلەرى» تەاترلاندىرىلعان قويىلىمى بولادى. تۇركى حالىقتارىنىڭ «ۇلى دالا ەپوسى جانە مۋزىكالىق مادەنيەتى» حالىقارالىق فولكلورلىق فەستيۆالى، «ءتۇيىن ءتۇيىپ، تەمىردەن تاس قاشاعان» اتتى تاس-تەمىر مۇسىندەرىنىڭ حالىقارالىق سيمپوزيۋمى، «ۇلى دالا شەبەرلەرىنىڭ ۇلى مۇراسى» حالىقارالىق ەتنوفەستيۆالى، «ارال-كاسپي ايماعى - ەۆرازيا تاريحى مەن مادەنيەت اياسىندا» حالىقارالىق عىلىمي كونفەرەنسياسىن وتكىزىلۋى جوسپارلانعان»، - دەدى وبلىس اكىمىنىڭ ورىنباسارى مارات توعجانوۆ.

ايتا كەتەيىك، بيىل «تۋعان جەرگە تاعزىم» اكسياسى اياسىندا 532 جوبا ىسكە اسىرىلادى. «اۋىل قامقورشىسى» الەۋمەتتىك جوباسى دا نازاردان تىس قالمايدى. مەتسەناتتاردىڭ قولداۋىمەن اقتوبە قالاسىندا ءجالاڭتوس باھادۇرگە، ەدىگە باتىرعا، بوكەنباي باتىرعا، ەسەت باتىرعا، باۋىرجان مومىش ۇلىنا ارنالعان ەسكەرتكىشتەر ورناتىلادى. «دالامنىڭ دارا جىرلارى» جىرشىلار انتولوگياسىن، «اقتوبە ايتىسكەرلەرى» مونوگرافياسىن شىعارۋ جانە «ۇلى دالا ۇلاعاتى» ايماقتىق فولكلورلىق انسامبلدەر بايقاۋىن ۇيىمداستىرۋ مىندەتى تۇر.