ۇلتتىق مۋزەي تاعى ءبىر التىن اداممەن تولىقتى
«ۇلتتىق مۋزەي زالداردى رەكسپوزيتسيالاۋ باعىتىنداعى كەڭ كولەمدى جۇمىستى قولعا الدى. مۋزەي زالىنا جاڭادان رەكسپوزيتسيادان وتكەن «التىن زالىنا» «بەرەل»، «تاسارىق»، «اۋليەكول»، «تۇيەتاس»، «قاراقابا»، «ايان» جانە تاعى دا باسقا وتە سيرەك كەزدەسەتىن ارتەفاكتىلەر قويىلدى. ونداعى ەڭ باستى ەكسپونات ب. ز. د. IV- III عاسىرلاردا جەرلەنگەن تەڭدەسى جوق ابىز- ايەل»، - دەپ حابارلايدى مۋزەيدىڭ باسپا ءسوز قىزمەتى.
حابارلامادا ايتىلعانداي، تاسارىق قورعانىنان تابىلعان ابىز-ايەل «ۇرجار حانشايىمى» اتالعان. ونىڭ قاڭقا سۇيەكتەرىندە جاسىل جانە كوك ءتۇستى ماتانىڭ قالدىقتارى ساقتالعان. سونداي-اق، قورعاننان قىش جانە اعاش ىدىستار، قوي سۇيەگى جانە التىن اشەكەيلى باس كيىم تابىلعان.
«1969-جىلى ەسىك قالاسىنان تابىلعان «التىن ادامنان» كەيىن، 50 جىلدىڭ ىشىندە كۇنى كەشە تابىلعان «ەلەكە سازى» التىن ادامىن قوسقاندا، قازاقستان وڭىرىنەن 7 التىن ادام تابىلدى. مۇنىڭ بارلىعى ءبىزدىڭ ەرتە زاماندا ءومىر سۇرگەن رۋحى مىقتى، مادەنيەتى زور حالىقتىڭ ۇرپاعى ەكەنىمىزدى كورسەتەدى. ال 2013-جىلى تابىلعان «ۇرجار حانشايىمى» مۋزەيدەگى باستى جادىگەردىڭ ءبىرى بولماق»، - دەدى ق ر ۇلتتىق مۋزەيى ديرەكتورىنىڭ مىندەتىن اتقارۋشى الماز نۇرازحان.