ەلباسى تامشىلاتىپ سۋارۋدىڭ تيىمدىلىگى تۋرالى ايتتى

None
None
استانا. قازاقپارات - بۇگىن «قازاقستاننىڭ 100 جاڭا ەسىمى» جەڭىمپازدارىمەن كەزدەسۋى بارىسىندا ەلباسى نۇرسۇلتان نازاربايەۆ ەلىمىزدە يزرايلدىك تەحنولوگيانىڭ ارقاسىندا اۋىل شارۋاشىلىعى دامىپ كەلە جاتقانىن ايتتى، دەپ حابارلايدى قازاقپارات ءتىلشىسى.

«قازاقستان تابيعي رەسۋرسقا باي. بۇل جامان ەمەس، ول ءبىزدىڭ قورىمىز، بارلىق ۋاقىتتا دا كومەكتەسەدى. دەگەنمەن، جەردىڭ استىنداعىنىڭ بارلىعى بايلىق ەمەس. ونى شىعارىپ، ادامداردىڭ يگىلىگىنە اينالدىرۋ قاجەت. وعان دا عىلىم كەرەك. (...) 1949-جىلى يزرايل مەملەكەتى قۇرىلىپ، 500 مىڭ ەۆرەيدى پالەستينا جەرىنە اپارىپ تاستادى. ول جەردە تاس پەن قۇمنان باسقا ەشتەڭە جوق. جالعىز يوردان وزەنىن ەشكى كەسىپ وتە بەرەدى. الايدا، بۇگىندە يزرايل مەملەكەتى قىس بويى ءبىزدى قۇلپىنايمەن قامتاماسىز ەتىپ وتىر. ولار جەرورتا تەڭىزىنىڭ سۋىن تۇشىتىپ پايدالانۋدا. ءبىز ولاردان تامشىلاتىپ سۋارۋدى ۇيرەنۋدەمىز»، - دەدى ەلباسى.

ق ر پرەزيدەنتىنىڭ ايتۋىنشا، وڭتۇستىك قازاقستان وبلىسى بۇعان دەيىن 1 گەكتار جەردەن 20 تسەنتنەر قىزاناق الىپ كەلسە، تامشىلاتىپ سۋارۋدى ەنگىزگەننەن كەيىن 100 تسەنتنەر ءونىم الۋدا. بۇعان قوسا، سۋدى 5 ەسە از پايدالانادى.

«بىزگە ولار ۇيرەتتى. ولار - الەمدەگى ەڭ دامىعان ەلدىڭ ءبىرى. وڭتۇستىك كورەيادا دا جەر قويناۋىندا ءبىر ءتۇيىر كومىر جوق. ءبىراق، باي مەملەكەت. شۆەيتساريانىڭ دا جەر قويناۋىندا ەشتەڭە جوق. بۇل دا باي مەملەكەت. سەبەبى ولار جۇمىستارىنا اقىل-ويدى قوسا الدى»، - دەدى مەملەكەت باسشىسى.

سوڭعى جاڭالىقتار