ەلباسى كوشە سىپىرۋشى تۋرالى حيكايانى ايتىپ بەردى
«مەنىڭ ەسىمە ءبىر حيكايا ءتۇسىپ وتىر. ءبىر كوشە سىپىرۋشىسى بولعان. ول ءىرى بانك عيماراتى ماڭىن جيناۋمەن اينالىسقان. ءبىر كۇنى بانك باسشىلىعى ءوز قىزمەتكەرلەرىن بىلىمىنە قاراي تەكسەرىپ شىعۋدى ۇيعاردى. ونى دا شاقىرىپ، قول قويۋدى سۇرايدى. جاڭاعى كوشە سىپىرۋشىسى قول قويا المايمىن، ساۋساقتىڭ ءىزىن عانا قالدىرا الامىن دەيدى. سوندا مەكتەپتە وقىعان جوقسىڭ با؟ جوق دەيدى. جوعارى ءبىلىمىڭ دە جوق پا؟ جوق. سوندا بانك باسشىلىعى ونىڭ سىپايى، ىزەتتى ءارى ءوز جۇمىسىن ۇلكەن جاۋاپكەرشىلىكپەن اتقارعانىنا قاراماستان جۇمىستان شىعارىپ جىبەردى. بىزگە ءبىلىمى بار ادام كەرەك دەپ، شىعارىپ سالدى» ، - دەدى ن. نازاربايەۆ.
پرەزيدەنتتىڭ ايتۋىنشا، جاڭاعى كوشە سىپىرۋشىسى ءبىراز ۋاقىت جۇمىس ىزدەپ ءجۇردى. سوسىن ءوزى سياقتى ادامداردى تاۋىپ الدى دا، كوشە جينايتىن كومپانيانى قۇردى.
«اتالعان كومپانيا قالادا ەڭ ۇزدىك كاسىپورىنداردىڭ قاتارىنا ەندى. ال كوشە سىپىرۋشىسى ەڭ باي ادامعا اينالدى. ءبىر كۇنى ونى بۇرىن جۇمىس ىستەگەن بانككە قايتادان شاقىرىپتى. ءسىزدىڭ ەسەپشوتىڭىزدا وسىنشاما اقشا بار، قول قويۋىڭىز قاجەت دەدى. سول كەزدە ول مەن قول قويا المايمىن، تەك ساۋساعىمنىڭ ءىزىن عانا قالدىرىپ كەتەمىن دەپتى. سوندا مەكتەپتە وقىعان جوقسىڭ با؟ جوق دەيدى. جوعارى ءبىلىمىڭ دە جوق پا؟ جوق. باي ادامعا قالاي اينالدىڭىز؟ مەنى جۇمىستان شىعارىپ جىبەرگەن ءبىر بانكيردىڭ ارقاسىندا وسىنداي دەڭگەيگە جەتتىم دەگەن ەكەن. سوندىقتان مەن ۇنەمى وسى ءبىر ماڭىزدى ماسەلەنى ايتىپ وتىرامىن. كەيبىر ادامدار وكسفورد، كەمبريدجدى ءبىتىرىپ كەلەدى. ءبىراق ەشقانداي جەتىستىككە جەتە المايدى. بارلىعى ادامنىڭ وزىنە بايلانىستى. ماقساتقا جەتۋگە تىرىسۋ قاجەت. ارمانى بولۋى كەرەك. ارمانىن ورىنداعان ادام عانا ءوزىنىڭ ويلاعان ويىنا جەتەدى» ، - دەپ اتاپ كورسەتتى مەملەكەت باسشىسى.
ايتا كەتەيىك، استاناداعى «قازمەديا» ورتالىعىندا ەلباسى نۇرسۇلتان نازاربايەۆتىڭ «قازاقستاننىڭ 100 جاڭا ەسىمى» جوباسىنىڭ ەكىنشى كەزەڭى جەڭىمپازدارىمەن كەزدەسۋى ءوتىپ جاتىر. ولاردىڭ ىشىندە 29 جاستاعى ەرجان سالىمگەرەيەۆ تە بار. ول ءۇشىنشى سىنىپتا وقىپ جۇرگەندە ترانسفورماتوردىڭ ىشىنە كىرىپ، توققا ءتۇسىپ قالدى. سول كەزدە ول ءبىر قول جانە ءبىر اياعىنان ايىرىلدى. ءبىراق قيىنشىلىققا مويىماي، حالىقارالىق دارەجەدەگى سپورت شەبەرى، الەم كۋبوگىنىڭ ءتورت دۇركىن يەگەرى، ازيا ويىندارىنىڭ ەكى مارتە جەڭىمپازى دارەجەسىنە دەيىن جەتتى.