اكتريسا اجال قۇشقان كولىك اپاتى: كۋاگەرلەر بولعان وقيعانى ايتىپ بەردى

None
None
الماتى. قازاقپارات - الماتىدا 3 ادامنىڭ ءومىرىن جالماعان ءىلياس كارعا قاتىستى سوت وتىرىسىندا بولعان وقيعانى كوزىمەن كورگەن كۋاگەرلەر سۇرالدى، دەپ حابارلايدى قازاقپارات ءتىلشىسى.

بولعان وقيعانى ەسەپشى ەلەنا نيكونوۆا كورگەن. ونىڭ ايتۋىنشا، سول كۇنى جول اشىق، كوشە تازا بولعان. ايەل سەيفۋللين كوشەسىمەن اباي داڭعىلىنا تاڭعى 5 شاماسىندا باعدارشامعا كەلىپ توقتاعان.

بىرنەشە سەكۋندتان سوڭ كوز الدىندا جانتۇرشىگەرلىك اپات بولعان.

«مەن Mitsubishi Galant ارتىنان كەلىپ توقتادىم. ءبىزدىڭ سول جاعىمىزدا اۆتوبۋس توقتاپ تۇرعان. ول دا جول اپاتىنىڭ بولۋىنا ءوز ۇلەسىن قوستى دەسەك بولادى. اۆتوبۋستىڭ ار جاعىندا Gelandewagen ۇشىپ كەلە جاتقانىن كورمەدىك. Galant جاسىل شامعا ءجۇرىپ كەتتى، ارتىنان مەن قوزعالدىم. وسى كەزدە كولدەنەڭ تۇسكەن قارا كولىكتىڭ ەسىگى كورىندى. سول ساتتە قاتتى سوعىلدى، مەنىڭ كولىگىمە اينەكتىڭ سىنىقتارى شاشىرادى. مەن شوكتان ەسىمدى جيىپ، كولىگىمدى جول شەتىنە قويىپ، وقيعا ورنىنا جۇگىرىپ باردىم»، - دەدى ەلەنا نيكونوۆا.

كۋاگەردىڭ ايتۋىنشا، Galant جولاۋشىلارى العاشىندا ءتىرى بولعان.

«كولىكتى اۋدارعان كەزدە، ەسىكتەر جاپىرىلىپ قالعاندىقتان، قىزداردى باگاجنيك ارقىلى الىپ شىقتى. جەدەل جاردەم كەلگەنشە ولاردىڭ جۇرەگى سوعىپ جاتتى»، - دەدى ول.

ەلەنا نيكونوۆا Gelandewagen جۇرگىزۋشىسىنىڭ كەتىپ بارا جاتقانىن كورگەن سىڭايلى بولدى.

«مەن بىلمەيمىن، مۇمكىن قاتەلەسەتىن بولارمىن. ءبىراق Gelandewagen جۇرگىزۋشىسىن ەكى ادام كەلىپ ەكى قولتىعىنان الىپ بارا جاتقانىن كورگەندەي بولدىم. بۇل اپاتتان كەيىن شامامەن 5 مينۋت وتكەن سوڭ بولدى. ءبارى ەستەرىن جيىپ جان-جاعىنا قاراعاندا سول ۇشەۋى باسقا كولىككە وتىرىپ كەتىپ بارا جاتقانىن كوردىك. جۇرگىزۋشىنىڭ اياعى تالتىرەكتەپ تۇرعانى بايقالدى. بۇل اپاتتان ەمەس، ول انىق. جول اپاتىنان كەۋدە اۋىرۋى مۇمكىن. ءبىراق اياققا زاقىم كەلمەيدى»، - دەدى ول.

ايتا كەتۋ كەرەك، قايعىلى وقيعا 29 -جەلتوقساندا بولعان ەدى. اباي مەن سەيفۋللين كوشەلەرىنىڭ قيىلىسىندا ەكى كولىك سوقتىعىسقان بولاتىن. Gelandewagen كولىگى باعدارشامنىڭ قىزىل تۇسىنە ءوتىپ كەتكەن. جول اپاتىنان 3 ادام: Mitsubishi Galant جۇرگىزۋشىسى مەن ەكى جولاۋشى كوز جۇمدى.

ولاردىڭ اراسىندا بەلگىلى اكتريسا شولپان ەلگەزەك بار. كەيىن بەلگىلى بولعانداي، 34 جاستاعى Gelandewagen جۇرگىزۋشىسى كولىگىن ماس كۇيىندە ايداعان.

«Mercedes Gelandewagen» ماركالى اۆتوموبيل جۇرگىزۋشىسى، 1985 -جىلى تۋعان كار ءىلياس اباي جانە سەيفۋللين داڭعىلدارىنىڭ قيىلىسىندا جول اپاتىن جاساعاندىقتان، ق ر قىلمىستىق- پروتسەستىك كودەكسىنىڭ 128-بابىنا سايكەس ۇستالدى. سوتقا دەيىنگى تەرگەپ- تەكسەرۋلەر ق ر قىلمىستىق كودەكسىنىڭ 345-بابىنا جانە 347-بابىنىڭ 3-بولىگىنە سايكەس جۇرگىزىلدى.

ايتا كەتەر بولساق، اتالعان جول اپاتىنان امان قالعان جالعىز ادام - اكتريسا ايزادا ساتىبالديەۆا قابىرعالارى سىنىپ، اۋىر كۇيدە اۋرۋحاناعا تۇسكەن بولاتىن. 2 اپتادان سوڭ اكتريسانىڭ بەتى بەرى قاراپ اۋرۋحانادان ۇيىنە شىعارىلدى.

سوڭعى جاڭالىقتار