نۇرجان التايەۆ ءماجىلىس دەپۋتاتى بولدى
بۇل تۋرالى بۇگىن پارلامەنت ءماجىلىسىنىڭ جالپى وتىرىسىندا ءمالىم بولدى، دەپ حابارلايدى قازاقپارات.
«كەشە قازاقستان رەسپۋبليكاسى ورتالىق سايلاۋ كوميسسياسىنىڭ قاۋلىسىمەن «نۇر وتان» پارتياسىنىڭ مۇشەسى نۇرجان باۋىرجان ۇلى التايەۆ ق ر پارلامەنتى ءماجىلىسىنىڭ دەپۋتاتى رەتىندە تىركەلدى. وسىعان بايلانىستى جاڭا سايلانعان ارىپتەسىمىزدى بارشا دەپۋتتاردىڭ اتىنان قۇتتىقتايمىن»، - دەدى ءماجىلىس ءتوراعاسى نۇرلان نىعماتۋلين.
ءوز كەزەگىندە جاڭادان سايلانعان دەپۋتات جالپى وتىرىس بارىسىندا انت بەردى.
«قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ تۇتاستىعى مەن تاۋەلسىزدىگىن نىعايتۋعا، ونىڭ كونستيتۋتسياسى مەن زاڭدارىنا قاتاڭ باعىنۋعا، وزىمە جۇكتەلگەن مارتەبەلى مىندەتتەردى ادال اتقارۋعا انت ەتەمىن»، - دەدى ن. التايەۆ.
نۇرجان باۋىرجان ۇلى وسىعان دەيىن ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى قىزمەتىن اتقاردى.
ايتا كەتەيىك، ن. التايەۆ بۇعان دەيىن ءماجىلىس دەپۋتاتى بولعان سەرىك ساپيەۆتىڭ ورنىنا كەلدى. سەرىك ساپيەۆ ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى ءتوراعاسى قىزمەتىنە اۋىسقان بولاتىن.