ەلىمىزدە ءاربىر بەسىنشى جەتكىنشەك سەمىزدىكتىڭ زاردابىن تارتىپ ءجۇر

استانا. قازاقپارات - ەلىمىزدە ءاربىر بەسىنشى جەتكىنشەك ارتىق سالماقتىڭ زاردابىن تارتىپ وتىر.

بۇعان پايداسىز تاعامداردى كوپ تۇتىنۋ سەبەپ. وتكەن جىلى استانادا مەكتەپ اسحاناسىنا ساپاسىز تاعام تاسىمالداعان 18 كاسىپكەرگە ايىپپۇل سالىندى. ءبىلىم باسقارماسى ولارمەن كەلىسىمدى بۇزعان. قوعامدىق دەنساۋلىقتى قورعاۋ دەپارتامەنتى تەكسەرۋ جۇمىستارىن كۇشەيتە ما؟ جاڭا تاسىمالداۋشىلارعا تالاپ قانداي؟

گۇلبانۋ ابەنوۆا استانا مەكتەپتەرىندەگى ءبىراز اسحانانى ارالاعان. ارنايى كوميسسيا قۇرامىنا ەنگەن ول بالالاردىڭ جەپ وتىرعان اسقا كوڭىلى تولماعانىن جەتكىزدى. وقۋشىلار تاماقتاناتىن ورىندارعا بەينەباقىلاۋ كامەراسىن ورناتۋ كەرەك. سەبەبى جۇمىرتقادان ءجۇن قىرىققان كەيبىر جاۋاپسىز كاسىپكەرلەر بارىن ايتادى.

گۇلبانۋ ابەنوۆا، اتا-انا:

- بالالاردىڭ اسحاناداعى ءدامسىز تاماقتاردى جەگىسى كەلمەيدى. ءسويتىپ، جول بويىنداعى دۇكەندەردەن جىلدام دايىندالاتىن ونىمدەردى الۋعا ءماجبۇر بولادى. تىيىم سالىنعان تاماقتاردى جەيدى. جاڭا تەندەرگە جاۋاپكەرشىلىگى بار ادامدار قاتىسسا دەيمىز. بالالار ءۇشىن قاۋىپسىزدىك ماڭىزدى. مىسالى، اشىقتىق ءۇشىن كارتامەن تولەۋ ءۇردىسى ۇنايدى ماعان. تەك كەي تاسىمالداۋشىلار وعان قارسى. سەبەبى ولاردىڭ كوزدەگەنى پايدا.

استانادا ءتۇرلى دەڭگەيدەگى 100-گە تارتا مەكتەپ بار. وقۋشىلاردىڭ ساپالى ءبىلىم الۋىنان بولەك، دۇرىس تاماقتانعانى دا ابزال. ءبىراق، راسىمەن دە، مەكتەپ اسحاناسىنا تاعام تاسىمالدايتىن كاسىپكەرلەردىڭ جاۋاپكەرشىلىگى ءارتۇرلى. وتكەن جىلى عانا وسىنداي 18 تاسىمالداۋشىعا ايىپپۇل سالىنىپ، جۇمىستى جالعاستىرۋ بويىنشا كەلىسىمشارت بۇزىلعان.

دۋلات جەكەبايەۆ، قالالىق ءبىلىم باسقارماسى باسشىسىنىڭ ورىنباسارى:

- 2019 -جىلدان باستاپ، 598 جاڭا بۇيرىق بويىنشا جۇمىس جاساپ جاتىرمىز. ول بۇيرىقتىڭ ىشىندەگى وزگەرىستەر مەملەكەتتىك ساتىپ الۋعا بايلانىستى. ەگەر بۇرىنعى 717 بۇيرىق بويىنشا مەكتەپ باسشىلارى وزدەرىنىڭ كوميسسياسىمەن مەملەكەتتىك ساتىپ الۋلار جۇرگىزسە، قازىر ونى مەكتەپ تە ەمەس، ءبىلىم باسقارماسى دا ەمەس، باسقا ارنايى ورگان كونكۋرس وتكىزىپ جاتىر. جۇيەلى جۇمىس ناتيجەسىن بەرىپ جاتىر. بۇل №62 مەكتەپ- ليتسەيىنىڭ اسحاناسى.

وقۋشىلار بوس ۋاقىتىندا ىستىق ءبالىش جەپ، شاي ىشۋگە كەلگەن. ايتۋلارىنا قاراعاندا، ۇسىنىلعان تاعامدار ولاردىڭ كوڭىلىنەن شىعادى ەكەن.

ديانا، وقۋشى:

- اسحانانىڭ تاماعى كوڭىلىمىزدەن شىعادى. ۇلكەن ءۇزىلىس بولعان كەزدە كەلىپ، شاي نەمەسە ىستىق تاماق جەيمىز. باعاسى نەگىزى قولجەتىمدى. اسا قىمبات ەمەس.

نۇراي، وقۋشى:

- ءبىز ساعات وندا ءۇشىنشى ساباقتان كەيىن اسحاناعا بارىپ، ءدامدى تاماق جەيمىز. مەنىڭ كلاستاستارىم ءسۇيسىنىپ تاماق جەيدى. وتە ءدامدى. انامنىڭ ءتاتتى توقاشىنداي. ءبىز ىستىق تاماقتان جەمەيمىز. ويتكەنى 1-4 -كلاسقا دەيىن بىزگە تەگىن.

مەكتەپتە 4 اپتاعا ارنالعان ارنايى اس ءمازىرى ەنگىزىلگەن.

اينۇر جازيتوۆا، №62 -مەكتەپ- ليتسەيىنىڭ الەۋمەتتىك پەداگوگى:

- تاڭعى استان باستاپ، بالالاردىڭ ەڭ سوڭعى تاماقتانۋىنا دەيىنگى ارالىقتا، مىسالى، ءبىر عانا اس ءمازىرى بولاتىن. تولىعىمەن ءبىر كۇن بويى بوتقا بەرىلەتىن بولسا، كۇنى بويى سول بوتقالار بەرىلەتىن. قازىر جاڭا ايتقانىمداي تاڭعى كەزدە بالالاردىڭ دامۋ، جاس ەرەكشەلىكتەرىنە بايلانىستى تاماقتانۋ اكادەمياسى جانە استانا ءبىلىم باسقارماسىنىڭ كەلىسۋىمەن وسى اس ءمازىرى ەنگىزىلگەن.

حالىق دانالىعىندا «اۋرۋ استان» دەگەن بار. سالاۋاتتى ەمەس تاعام اسقازان-ىشەك جولدارى اۋرۋلارىنىڭ، سەمىزدىكتىڭ دامۋىنا اكەپ سوعۋى مۇمكىن. وسى ورايدا دەنساۋلىق ساقتاۋ مينيسترلىگىنىڭ شەشىمىمەن مەكتەپ اسحاناسىنداعى اس مازىرىنەن شۇجىق، سۇزبەشە، گازدالعان سۋسىندار الىنىپ تاستالدى.

 

www.24.kz