جۇرەك-قان تامىر اۋرۋلارىنىڭ الدىن الاتىن جەمىس
عالىمداردىڭ سوڭعى زەرتتەۋلەرى كورسەتكەندەي، شيە تۇز بايلانۋ اۋرۋلارىن ەمدەيتىن دارىلەردىڭ ادام اعزاسىنا اسەرىن كۇشەيتەدى. جەمىستىڭ قۇرامىندا تاڭقۋراي مەن قاراقاتقا قاراعاندا اس قورىتۋ جۇيەسىنە پايدالى انتوتسيان زاتى مول.
ا ق ش- تاعى ميچيگان ۋنيۆەرسيتەتىنىڭ عالىمدارى جۋىردا شيە ديەتاسىنا زەرتتەۋ جۇرگىزىپ كوردى. ءبىراق، تاجىريبە ادامدارعا ەمەس، كادىمگى كەمىرگىش تىشقاندارعا جۇرگىزىلگەن. ونىڭ ناتيجەسى كورسەتكەندەي، كەمىرگىشتەردىڭ يممۋنيتەتى كۇشەيىپ، ءتۇرلى اۋرۋلارعا اعزالارى قارسى تۇرا بىلگەن. سەبەبى، تىشقانداردىڭ قان قۇرامىنداعى حولەستەرين زاتىنىڭ دەڭگەيى تومەندەپتى. ال، بۇل ءوز كەزەگىندە جۇرەك-قان تامىرلارى اۋرۋىنا شالدىعۋدى تويتارادى.
مۇنان كەيىنگى تاجىريبە ادامدار اراسىندا جۇرگىزىلدى. كۇندەلىكتى شيە شىرىنىن ىشكەن ولاردىڭ دەنساۋلىعى ايتارلىقتاي وزگەرگەن: يممۋنيتەتتەرى كوتەرىلىپ، اعزا وزدىگىنەن كەيبىر اۋرۋ تۇرلەرىن جەڭە الاتىن دارەجەگە جەتىپتى.
ايتا كەتۋ كەرەك، شيە قۇرامىنداعى انتيوكسيدانتتار اعزاداعى قىشقىلداردى رەتتەپ، دارۋمەن، مينەرالدار مەن وزگە ميكروەلەمەنتتەردىڭ ۋاقىتىلى جەتكىزىلۋىن قامتاماسىز ەتەدى.
ماماندار شيە جەگەن ادامنىڭ تابەتى دە جاقسى بولادى دەگەن كەڭەس ايتىپ وتىر. سونداي-اق، اتالعان جەمىس دەنە تەمپەراتۋراسىن ءبىرقالىپتى ەتە الاتىن قاسيەتكە يە. سونىمەن قاتار، شيەدە تەمىر ءجۇزىم، مۇكجيدەك جانە ليمونعا قاراعاندا ەكى ەسە كوپ.
شيە شىرىنى ستافيلوكوكك جانە سترەپتوكوكك سىندى باكتەريالاردى جويادى، ياعني اياعى اۋىر ايەلدەرگە پايداسى وراسان زور.