+7 (701) 759 90 19 Лента
-5 °С : استانا
-1 °С : الماتى
USD 376.26 EUR 425.63
RUB 5.68 CNY 55.61
جاڭالىقتار

ەمتيحانعا دايىندىق: كوپ نارسەنى قالايشا وپ-وڭاي ەستە ساقتاۋعا بولادى

12 اقپان 17:44 206
:ءبولىسۋ
ەمتيحانعا دايىندىق: كوپ نارسەنى قالايشا وپ-وڭاي ەستە ساقتاۋعا بولادى

 استانا. قازاقپارات - ەگەر ەمتيحان الدىنداعى تۇندە بارلىق بيلەتتەردى وقىپ شىعۋ سىزگە قول ەمەس بولسا، وندا بۇل ماقالا سىزگە ارنالعان دەپ ءبىلىڭىز.

مۇندا ءبىز سىزگە الىپتىڭ كۇشىن، ارىقتىڭ ءتىسىن جۇمساماي-اق، ماتەريالداردى ەستە ساقتاۋدىڭ جانە ەمتيحانداردى ۇزدىك باعاعا تاپسىرۋدىڭ امالدارىن تاۋىپ قويدىق.

ءوزىڭىزدىڭ وقىپ-زەردەلەۋ ءستيلىڭىزدى انىقتاپ الىڭىز

 ءبىز ءبىر بىرىمىزگە ۇقساي بەرمەيمىز جانە ءبىزدىڭ ەمتيحانعا دايىندالۋ ستراتەگيامىز دا ءبىر بىرىمىزدىكىنەن وزگەشە بولادى. ءوزىڭىزدىڭ جەكە باسىڭىزدىڭ ەرەكشەلىكتەرىن انىقتاپ الۋدان باستاڭىز. ەگەر اۋديال بولساڭىز، وقۋلىقتار مەن كونسپەكتىلەردى داۋىستاپ وقىڭىز، كينەستەتيك بولساڭىز - كونسپەكتىلەرىڭىزدەن شپارگالكا جازىپ، جاۋاپ بەرۋ جوسپارىن جاساڭىز.

تاعى ءبىر ۇتىمدى ءادىس - وي كارتاسى. بۇل ۇزاق ۋاقىت وتكەننەن كەيىن دە اقپاراتتى قۇرىلىمداۋدىڭ، بىلگەنىڭدى ەسكە ءتۇسىرۋدىڭ جانە تاقىرىپتىڭ مانىنە ءۇڭىلۋدىڭ كەرەمەت ءتاسىلى.

اۋەلى قانداي سۇراقتارعا دايىندالعان ءجون؟ وقۋ بارىسىندا ءپاندى ءتاپ-ءتاۋىر ءتۇسىنىپ جۇرگەن بولساڭىز، ءوزىڭىزدىڭ حابارىڭىز بار سۇراقتارعا كىرىسىڭىز.

ەگەر ءار بلوكتى الدىنداعىسىن بىلمەي تۇرىپ ءتۇسىنۋ مۇمكىن بولماسا، ءبىر-اق جول بار: ءبارىن باستان اياق رەتىمەن وقۋ.

سونداي-اق، قىيىن سۇراقتاردان، ولاردى وقىپ-زەردەلەۋگە جەتكىلىكتى ۋاقىت بولە وتىرىپ، باستاعان ابزال. شارشاپ، جالىعىپ كەتپەي تۇرعاندا سولاردى قىپ ءتۇسىنىپ العان دۇرىس. وڭاي سۇراقتاردى كەيىنگە ىسىرۋعا بولادى.

جانە جۇيەلىلىكتەن تانباڭىز. ەمتيحان ۋاقىتى جاقىنداعان كەزدە ۇرەيگە بوي الدىرا باستاساڭىز دا، تاڭداپ العان ستراتەگياڭىزدان اۋىتقىماڭىز.

جاتتاپ الۋعا ەمەس، ءتۇسىنىپ الۋعا تىرىسىڭىز

بيلەتتىڭ مانىنە ءۇڭىلىڭىز، جاتتاي بەرۋگە تالپىنباڭىز. قۇر جاتتاۋ - كوپ ۋاقىتىڭىزدى الىپ قانا قويماي، اۋەل باستان- اق ابىروي اپەرمەيتىنى بەلگىلى ستراتەگيا. سۇراقتاردىڭ لوگيكالىق بايلانىستارىن ىزدەپ، اسسوتسياتسيالار ويلاپ تابىڭىز.

البەتتە، ءار پاندە داتالار، فورمۋلالار، انىقتامالار تاقىلەتتەس جاتقا ءبىلۋ كەرەك اقپارات بولادى. الايدا، لوگيكاسىن ءتۇسىنىپ الساڭىز، ولاردىڭ ءوزىن ەستە ساقتاۋ وڭاي بولادى.

جاۋابىڭىز تولىق، كولەمدى بولۋى ءۇشىن ەمتيحان كەزىندە ماتەريالدى ءوز سوزىڭىزبەن ايتىپ، ءوز ويىڭىزبەن تولىقتىرىڭىز.

«3- 4- 5» ادىستەمەسى

 از ۋاقىت ارالىعىندا ەمتيحانعا دايىندالۋ قاجەت بولعان كەزدە قولدانۋعا بولاتىن جاقسى ءادىس. نەبارى ءۇش كۇن كەتەدى، ءبىراق اتقاراتىن جۇمىسىڭىز كوپ بولادى. ءار كۇنى بۇكىل ماتەريالدى قاراپ شىعىڭىز، ءبىراق بىرتىندەپ شومىپ، ءار ءتۇرلى دەڭگەيگە وقىپ وتىرىڭىز.

العاشقى كۇنى ءپان بويىنشا بار بىلەتىنىڭىزدى ەسكە ءتۇسىرىپ، بىلايشا ايتقاندا كىرىسۋ ءۇشىن، كونسپەكتىڭىزدى نەمەسە ادىستەمە قۇرالىن وقىپ شىعاسىز. شارتتى تۇردە ءسىز قازىردىڭ وزىندە ەمتيحاندى «ۇشكە» تاپسىرا الاسىز دەپ ەسەپتەيمىز.

ەكىنشى كۇنى انىعىراق، تولىعىراق ءبىلۋ ءۇشىن ءدال سول سۇراقتاردى وقۋلىق بويىنشا سارالايسىز. تىرىسىپ دايىندالساڭىز، ەندى «ءتورت» الۋدان ۇمىتتەنە بەرسەڭىز بولادى.

سوڭعى كۇنى بەرەتىن جاۋاپتارىڭىزدى مۇلتىكسىز ەتەسىز: قايتالايسىز، ءالى دە بولسا تۇسىنىكسىزدەۋ تۇستاردى پىسىقتايسىز، ەسكە ساقتايسىز. ءۇشىنشى كۇنگى دايىندىقتان سوڭ ەمتيحاندى «ۇزدىك» باعاعا تاپسىرۋعا ءازىرسىز.

ەكى كۇن وقىپ، ءبىر كۇن قايتالاۋ

بۇل وتە قاراپايىم جۇيە: بۇكىل ماتەريالدى بىردەي ەكى بولىككە ءبولىپ، ونى ەكى كۇندە وقىپ شىعۋ. ءۇشىنشى كۇن باسى ءبۇتىن قايتالاۋعا ارنالادى.

دايىندالۋ ۋاقىتىن شەكتەڭىز

 ءار تاقىرىپتى تولىعىراق بىلە ءتۇسۋدىڭ ءتۇبى جوق، سوندىقتان بارلىق قىرى مەن سىرىن ەستە ساقتاۋعا تىرىسپاڭىز. وقۋلىقتاعى ۇلكەن تاراۋدىڭ نەگىزگى- نەگىزگى دەگەن تۇيىندەرىن ءتۇسىنىپ الىڭىز: كولەمى از قۇرىلىمدالعان ماتەريالدى ۇعىپ الۋ وڭاي.

بارلىق بيلەتتى توپتاعى ستۋدەنتتەر اراسىندا ءبولىپ الىپ، اركىم العانى بويىنشا قىسقاشا كونسپەكت جاساۋعا بولادى. ءسىز وقيتىن توپتا ءوزارا كومەكتەسۋ دەگەن جوق بولسا، جوعارى كۋرس ستۋدەنتتەرىنىڭ ماتەريالدارى مەن شپارگالكالارىن سۇراپ الىڭىز.

ءبىر ورىندا قاتىپ قالماڭىز

ەگەر ءبىر سۇراققا دايىندالۋىڭىز ۇزاققا كەتىپ بارا جاتسا، كەلەسىسىنە كوشىڭىز. دايىندىق كەزىندەگى ەڭ جاقسى موتيۆاتور - تايمەر. ءبىر بيلەت بويىنشا دايىندالۋ ۋاقىتىن بەلگىلەڭىز دە، مىسالى 30 مينۋت، سول ۋاقىت بىتكەن سوڭ، كەلەسى بيلەتكە كوشىڭىز. قالىپ كەتكەن سۇراقتارعا ءبىر كوز سالىپ ءوتۋ ءۇشىن ەمتيحان الدىندا بىرنەشە ساعاتىڭىزدى ارناڭىز.

بيلەتكە جاۋاپ بەرۋ جوسپارىن جاساڭىز

كەز كەلگەن، ءتىپتى شەتى- شەگى كورىنبەيتىن ماسەلەنىڭ ءوزىن بىرنەشە سوزبەن-اق سيپاتتاپ بەرۋگە بولادى. بۇل رەتتە ءاربىر تەزيس باسقالارمەن بايلانىسىپ وتىرۋى ءتيىس.

بۇنداي جوسپارعا ەمتيحان الدىندا تەز كوز جۇگىرتىپ شىعىپ، كەرەكتى كۇيگە تۇسۋگە بولادى. «ءۇش سويلەم» ءادىسى بار: ءار سۇراق بويىنشا پروبلەماسىن، ەڭ باستى ويىن جانە شەشىمىن جازىپ الىپ وتىرىڭىز.

قالاي وقۋ كەرەگى پانگە بايلانىستى

 جەكە- دارا ەرەكشەلىكتەر سىزدە عانا ەمەس، وقىلىپ جاتقان پاندە دە بار. مىسالى، ناقتى عىلىمدار - ماتەماتيكا، فيزيكا - پراكتيكانى تالاپ ەتەدى. گۋمانيتارلىق عىلىمداردا اقپاراتتىڭ ۇلكەن كولەمدەرىن وڭدەي الۋ، داتالار مەن ادام اتى- جوندەرىن، انىقتامالاردى ەستە ساقتاي ءبىلۋ ماڭىزدى.

ءبىراق، قايتالاپ ايتايىن، سۇراقتاردى ۇعىنىپ، ءتۇسىنىپ الۋعا تىرىسىپ، كەز كەلگەن ءپاندى وقۋعا بەل شەشىپ كىرىسۋ كەرەك.

 ەمتيحاننىڭ فورماتى دا ماڭىزعا يە. ەگەر اۋىزشا ەمتيحانعا دايىندالىپ جاتساڭىز، بەرەتىن جاۋاپتارىڭىزدى داۋىستاپ ايتىڭىز. تاعى ءبىر جاقسى تاكتيكا - ماتەريالداردى ۇيدەگىلەردىڭ بىرىنە، ولار قۇلشىنىس تانىتپاسا، اينانىڭ الدىندا تۇرىپ الىپ، وزىڭە ايتۋ. بىرەۋ تىڭداپ قانا قويماي، تۇسىنىكسىز نارسە بولسا، سۇراقتارىن قويىپ تۇرسا، ءتىپتى جاقسى.

ەگەر تەستىلەۋگە دايىندالىپ جاتساڭىز، ونداعان ۇلگىلىك تەستتەن ءوتىپ، قاتەلەرىڭىزدى جازىپ الىپ، ناشار بىلەتىن تاقىرىپتاردى قايتالاپ، ءبارىن تاعى تاپسىرعان ءجون.

ەگەر ەمتيحان جازباشا بولسا، بەرىلەتىن جاۋاپتىڭ قۇرىلىمىن الدىن الا ويلاستىرىپ قويىڭىز.

ەكەۋ نەمەسە ۇشەۋ بولىپ دايىندالىڭىز

وزدەرىڭىزگە ەڭ قيىن بولعان تاقىرىپتاردى جازىپ شىعىڭىز - ۇجىمدىق سانا ولاردى تەزىرەك ءتۇسىنىپ الۋعا جاردەمدەسەدى. ەڭ دۇرىسى - وقۋعا ىنتاسى بار توپتاستارىڭىزبەن بىرىگۋ، ايتپەسە، ەمتيحانعا دايىندىق كۇندە بولىپ تۇراتىن جانعا جايلى ءازىل- قالجىڭدى وتىرىسقا اينالىپ كەتۋى مۇمكىن.

ءيا، بۇل قالجىڭداسىپ، تىنىعۋعا بولمايدى دەگەن ءسوز ەمەس. ايتەۋىر جينالىستىڭ نەگىزگى ماقساتىن ۇمىتىپ كەتپەسەڭىز بولدى.

ەمتيحانعا دايىندالۋ جونىندەگى تاعى بىرنەشە كەڭەس

 1. ءۇزىلىس جاساپ تۇرىڭىز. بۇنىڭ بويىڭىزدى ەركىن ۇستاپ، جاڭا اقپاراتتى ۇعىپ الۋىڭىزعا كومەگى تيەدى.

2. تەلەفونىڭىزدى ءوشىرىپ قويىڭىز، الەۋمەتتىك جەلىلەرگە كىرمەي، ت ۆ-عا جولاۋشى بولماڭىز.

3. ۇيقىڭىزدى قاندىرىڭىز.

4. تاماق تۋرالى دا ۇمىتىپ كەتپەڭىز: بۇل ءسىزدىڭ ورگانيزىمىڭىزگە قوسىمشا كۇش- قۋات بەرەدى. ارتىق جەۋگە دە بولمايدى. ادەتتەگى جاعدايدا تويىپ تاماق ىشكەن سوڭ ۇيقى كەلىپ، وقۋعا زاۋقىڭ سوقپاي قالادى.

5. كۇيزەلىسكە تۇسىرەتىن جاعدايلار مەن باسقا ادامداردىڭ نەگاتيۆتى كوڭىل- كۇيىنەن اۋلاق ءجۇرىڭىز. وقىپ دايىندالۋ كەزىندە احۋال مەيلىنشە جايلى بولۋى ءتيىس.

 6. شپارگالكالار مەن كوشىرىپ الۋ مۇمكىندىگىنە كوپ ءۇمىت ارتپاي- اق قويىڭىز. ەگەر كوشىرىپ الۋدى جاقسى بىلمەسەڭىز (بۇعان دا ەپتىلىك كەرەك ەكەنىنە كەلىسەتىن شىعارسىز)، باستاماي- اق قويعانىڭىز ءجون.

7. دايىندىق ورنىن جايلاستىرىڭىز: جارىق، ىڭعايلى، قاجەتتى ماتەريالداردىڭ ءبارى بار بولاتىن بولسىن. توسەك ەڭ قولايلى جەر ەمەس: قىزىق ەمەس تاقىرىپتى وقىپ جاتىپ ۇيىقتاپ قالۋ ىقتيمالدىعى جوعارى.

8. ماركەرمەن بەلگىلەنگەن تىزىمدەردى جاساڭىز: ولاردى ەسكە ساقتاپ قويۋ وڭاي.

9. باسقا نارسەلەرگە كوڭىل اۋدارىپ، ۇزاق وتىرىپ وقۋ كەزىندە ۇيىپ قالعان بۇلشىق ەتكە قان جۇگىرتۋگە سپورتپەن اينالىسۋ كومەكتەسەدى. ونىڭ ۇستىنە، جۇگىرىس، ۆەلوسيپەد تەبۋ نەمەسە سولار سياقتى باسقا فيزيكالىق تۇرعىداعى بەلسەندىلىك كەزىندە اسىقپاي قىيىن سۇراقتار جايىندا ويلانىپ كورۋگە بولادى.

10. ەگەر وقۋعا زاۋقىڭىز سوقپاي تۇرعانىن سەزسەڭىز، ءسىزدى ەڭ كوپ قىزىقتىرۋى مۇمكىن تاقىرىپتان باستاڭىز. بۇل سىزگە ىنتاڭىزدى وياتۋعا كومەكتەسەدى.

11. كەشكى ۋاقىتتا سەرۋەندەڭىز. دايىندىق كەزىندە، ادەتتە جۇيكە جۇقارىپ تۇرادى، سوندىقتان ءبىر ءسات ارقانى كەڭگە سالىپ تۇرۋ كەرەك.

12. ناقتى دايىندىق جوسپارىن جاساپ الىڭىز.


باستى سوزدەر: قوعام,
:ءبولىسۋ

اأتور:

novasa

ونلاين قىزمەتكەرلەر
مۇراعات