ءمادينا ءابىلقاسىموۆا: سىننان قورىتىندى شىعارامىز
بۇگىن ۇكىمەت وتىرىسىنان كەيىن ب ا ق وكىلدەرىنىڭ الدىنا شىققان مينيستردەن ەڭ الدىمەن «قوعامداعى نارازىلىققا بايلانىستى وتستاۆكاعا كەتەسىز بە؟» دەگەن ساۋال قويىلعان ەدى. الايدا مينيستر تىكە قويىلعان سۇراقتان جالتارا جاۋاپ بەرىپ، سىننان قورىتىندى شىعاراتىندىعىن ايتىپ اقتالدى.
«ءبىز سىندى ەستىپ تۇرامىز. ەڭ باستىسى، بۇل سىننان قورىتىندى شىعارامىز. جاعدايدى بارىنشا جاقسارتۋعا تىرىسامىز. جۇزەگە اسىرىلىپ جاتقان مەملەكەتتىك ساياساتتىڭ تيىمدىلىگىن ارتتىرۋعا باعىتتالعان شارالار قابىلداناتىن بولادى»، - دەدى ول.
سونىمەن قاتار، مينيستر ق ر ۇكىمەتىنىڭ جانىنان قۇرىلعان ەل ازاماتتارىنىڭ تابىسىن ارتتىرۋ، تۇرمىس ساپاسىن جاقسارتۋ، سونداي-اق كوپبالالى وتباسىلارعا قولداۋ شارالارىن كۇشەيتۋ جونىندەگى جۇمىس توبى اياسىندا كوپبالالى وتباسىلاردى باسپانامەن قامتاماسىز ەتۋ ماسەلەسى ەرەكشە قاراستىرىلاتىندىعىن ايتتى.
«قازىرگى ۋاقىتتا جەرگىلىكتى اتقارۋشى ورگاندارمەن بىرلەسىپ، كەلىپ جاتقان بارلىق ۇسىنىستاردى جيناپ جاتىرمىز. يندۋستريا جانە ينفراقۇرىلىمدىق دامۋ مينيسترلىگى سول ارقىلى ارنايى ەسەبىن شىعارۋدا. بارلىق تالاپتاردى جيناۋدامىز. اتقارۋشى ورگاندارعا عانا ەمەس ءبىزدىڭ مينيسترلىككە دە كوپبالا انالار كەلىپ جاتىر. بۇگىن دە كەزدەسۋ بولادى. ۇسىنىستاردىڭ بارلىعىن جۇمىس توبى اياسىندا شەشۋگە تىرىسامىز»، - دەدى م. ءابىلقاسىموۆا.